លោក រស់ សារ៉ុម នឹងធ្វើសន្និសីទកាសែត ដើម្បីសូមទោសគ.ជ.ប

ជាតិ

នយោបាយជាតិ

លោក រស់ សារ៉ុម នឹងធ្វើសន្និសីទកាសែត ដើម្បីសូមទោសគ.ជ.ប

10, Jun 2016 , 12:23 pm

រូបភាព

ដោយ: ម៉ៅ សុផា

ភ្នំពេញ៖ លោក រស់ សារ៉ុម ប្រធានសមាគមជ័យលាភីបញ្ញាជន ប្រកាសធ្វើសន្និសីទសារព័ត៌មាន ដើម្បីសុំទោសសមាជិក គ.ជ.ប ជាសាធារណៈ ដែលលោក ចោទថា បានប្រព្រឹត្តអំពើពុករលួយ។ សន្និសីទសារព័ត៌មាននេះ នឹងប្រព្រឹត្តទៅនៅថ្ងៃទី១៣ ខែមិថុនា ឆ្នាំ២០១៦ ។

ដើម្បីបង្ហាញទំនួលខុសត្រូវរបស់ខ្លួន លោក រស់ សារ៉ុម មិនរារែកក្នុងការសារភាពកំហុស ដែលបានប្រព្រឹត្តចំពោះសមាជិកគ.ជ.ប នោះទេ។ ជាងនេះទៀត លោក នឹងបញ្ជាក់ពីភាពស្អាតស្អំរបស់ស្ថាប័នគ.ជ.ប ឡើយវិញ តាមរយៈសន្និសីទសារព័ត៌មានមួយ នៅសប្តាហ៍ក្រោយ។

ថ្លែងប្រាប់សារព័ត៌មានថ្មីៗ លោក រស់ សារ៉ុម បានផ្ញើសារទៅកាន់បញ្ញវន្ត និងមន្ត្រីសង្គមស៊ីវិល រួមទាំងអ្នកនយោបាយគ្រប់គណបក្ស ឲ្យមានភាពក្លាហាន ក្នុងការទទួលស្គាល់កំ ហុសរបស់ខ្លួន ដើម្បីធ្វើជាគំរូល្អក្នុងសង្គម។ ប្រធានសមាគមរូបនេះ បានបញ្ជាក់យ៉ាងខ្លីថា៖«វាមិនថោកទាបអ្វីទេ ដែលយើងហ៊ានសារភាពកំហុសរបស់យើង»។

បន្ទាប់ពីដឹងកំហុសរបស់ខ្លួន ដែលប្តឹងសមាជិកគ.ជ.ប ដោយគ្មានមូលដ្ឋានច្បាស់លាស់ លោក រស់ សារ៉ុម ប្រធានសមាគមជ័យលាភីបញ្ញាជន បានសុំទោសបុគ្គល ដែលខ្លួនចោទប្រកាន់ តាមរយៈលិខិតមួយច្បាប់ រួចម្តងហើយ។ លោក ហង្ស ពុទ្ធា អ្នកនាំពាក្យរបស់គ.ជ.ប លើកឡើងថា ការទទួលកំហុសបែបនេះ បង្ហាញពីភាពទន់ភ្លន់ និងការភ្ញាក់រឭក ដែលគ.ជ.ប គួរអន់ឱនឱ្យបាន ហើយមិនយកទោសពៃរ៍ ពីលោក រស់ សារ៉ុម នោះទេ។

យ៉ាងណាក៏ដោយ អ្នកនាំពាក្យរូបនេះ លើកឡើងថា ដើម្បីស័ក្តិសមទៅនឹងកំហុសរបស់ខ្លួន លោក រស់ សារ៉ុម គួរតែធ្វើសន្និសីទសារព័ត៌មាន ដើម្បីសូមទោសនិងសាងភាពស្អាតស្អំឲ្យស្ថាបន័គ.ជ.ប ឡើងវិញ ព្រោះកាលពីលោកចោទប្រកាន់ គ.ជ.ប ក៏ធ្វើតាមរយៈ សន្និសីទសារព័តមានដែរ។

កាលពីថ្ងៃ២ ខែមិថុនា លោក រស់ សារ៉ុម បានប្តឹងទៅកាន់អង្គភាពប្រឆាំងអំពើពុករលួយ ដើម្បីស្នើឲ្យស្ថាប័នមួយនេះ ស៊ើបអង្កេតលើមន្ត្រីជាន់ខ្ពស់គ.ជ.ប ៤រូប ដែលលោក សង្ស័យថារួមគ្នាប្រព្រឹត្តអំពើពុករលួយ។ មន្ត្រីជាន់ខ្ពស់ដែល លោក រស់ សារ៉ុម ប្តឹង គឹ លោក ស៊ិក ប៊ុនហុក ប្រធានគ.ជ.ប, លោក គួយ ប៊ុនរឿន អនុប្រធានគ.ជ.ប, លោក ហង្ស ពុទ្ធា សមាជិកនិងជាអ្នកនាំពាក្យគ.ជ.ប រួមទាំងលោក ម៉ៅ សុភារិទ្ធ ដែលជាអគ្គលេខាធិការរងនៃគ.ជ.ប។ ប៉ុន្តែ ពាក្យបណ្តឹងរបស់លោក រស់ សារ៉ុម ត្រូវបានអង្គភាពប្រឆាំងអំពើពុករលួយ ទាល់ចោល ដោយសារតែរកមិនឃើញភស្តុតាងណាមួយ ដែលបញ្ជាក់ថា អ្នកទាំង៤រូប បានប្រព្រឹត្តអំពើពុករលួយ៕