ពីនេះ ពីនោះ
តើពាក្យ«បែកស្លុយ»មានន័យដូចម្ដេច?
× នៅក្នុងបណ្ដាញសង្គមហ្វេសប៊ុក ពាក្យថា «បែកស្លុយ» គឺពិតជាពេញនិយមណាស់ ចំពោះបណ្ដាយុវវ័យ ដែលប្រើប្រាស់បណ្ដាញសង្គមមួយនេះ។ ប៉ុន្តែពាក្យនេះចំពោះ មនុស្សជំនាន់មុន ប្រហែលជាមិនសូវយល់ ឬក៏មិនយល់តែម្ដងចំពោះអត្ថន័យ នៃពាក្យ មួយនេះ។
ចំពោះពាក្យថា «បែកស្លុយ» នេះ អ្នកប្រើប្រាស់បណ្ដាញសង្គមសព្វថ្ងៃ ប្រើក្នុងន័យសំដៅ ចំអកចំអន់ ទៅអ្នកណាម្នាក់ ថាមានបញ្ហាមិនប្រក្រតីផ្នែកគំនិត មានបញ្ហាចិត្តមិននឹងធឹង និយាយអ្វីមិនដឹងក្បាលមិនដឹងកន្ទុយ និយាយនិងធ្វើអ្វីៗប្លែកៗ ចម្លែកៗ ជាដើម។
ពាក្យនេះគឺមិនទាន់មាននៅក្នុងវចនានុក្រមខ្មែរ របស់សម្ដេចព្រះសង្ឃរាជ ជួន ណាត នោះទេ។ ប៉ុន្តែចំពោះពាក្យថា «បែក» និង «ស្លុយ» គឺមាននៅក្នុងវចនានុក្រម គឺមានរួចហើយ តែមានអត្ថន័យ ផ្សេងពីអត្ថន័យនៃពាក្យថា«បែកស្លុយ»នេះ។ ពាក្យ «បែក» ជាកិរិយាសព្ទ មានន័យថា ឃ្លាតចេញពីគ្នា សាយភាយ ចេញព្រាតព្រោង ជាដើម។ ចំណែកពាក្យ «ស្លុយ» ជាគុណនាម មានន័យថា យារដោយសម្រុងៈ សំពត់ស្លុយ ស្លៀកសម្លុយស្លុយហៀរកែង។ តាមរយៈអត្ថន័យនៃពាក្យទាំងពីរនេះ ទោះដាក់បញ្ចូលគ្នាក៏មិនមានអត្ថន័យដូចពាក្យ «បែកស្លុយ» ដែលអ្នកប្រើប្រាស់បណ្ដាញសង្គមបានកំណត់ន័យក្នុងពេលបច្ចុប្បន្ននេះទេ ។ ពាក្យថា «បែកស្លុយ» អាចនិយាយបានជាពាក្យថ្មី និងមានអត្ថន័យថ្មី ដែលអ្នកជំនាញផ្នែកអក្សសាស្ត្រខ្មែរ គួរសិក្សារកប្រភព កំណត់ថ្នាក់ពាក្យ និងអត្ថន័យ ចងក្រង ជាលក្ខណៈផ្លូវការ។
© រក្សាសិទ្ធិដោយ thmeythmey.com