ជាតិ
អាជ្ញាធរអប្សរារៀបចំកិច្ចពិភាក្សាស្តីពីកិច្ចការអភិរក្ស និងបញ្ហាប្រឈមនៅភ្នំគូលែន រូបភាពការទន្រ្ទានកាប់ព្រៃធ្វើចំការនៅលើភ្នំគូលែន
× សៀមរាប៖ អាជ្ញាធរជាតិអប្សរា តាមរយៈសេចក្តីជូនដំណឹង ដែលចុះផ្សាយនៅថ្ងៃទី១៤ មិថុនា បានបញ្ជាក់ថា ខ្លួននឹងរៀបចំកិច្ចពិភាក្សាមួយ និយាយពីការងារអភិរក្ស និងបញ្ហាប្រឈមមួយចំនួន នៅរមណីយដ្ឋានភ្នំគូលែន។
ក្នុងសេចក្តីជូនដំណឹង ដែលចុះផ្សាយក្នុងទំព័រហ្វេសប៊ុករបស់អាជ្ញាធរជាតិអប្សរា បានសរសេរថា កិច្ចពិភាក្សារយៈពេលកន្លះថ្ងៃនៅពេលព្រឹកថ្ងៃទី២៤ មិថុនា ឆ្នាំ២០១៦ នៅស្នាក់ការអាជ្ញាធរជាតិអប្សរា។ កិច្ចពិភាក្សានេះ នឹងផ្តោតសំខាន់លើការងារអភិរក្ស ក៏ដូចជាបញ្ហាប្រឈមនៅលើភ្នំគូលែន។
វាគ្មិនសំខាន់ៗ ដែលគ្រោងចូលរួមមានលោក Tsugawa Takahisa សហប្រធានអាយស៊ីស៊ីអង្គរភាគីជប៉ុន លោកសាស្ត្រាចារ្យ Azedine Beshaouch លេខាវិទ្យាសាស្ត្រនៃគណៈកម្មាធិការអាយស៊ីស៊ីអង្គរ មន្ត្រីជំនាញនៃក្រសួងបរិស្ថាន រួមនឹងមន្ត្រីជំនាញជាច្រើនរូបទៀតនៃអាជ្ញាធរជាតិអប្សរា និងស្ថាប័នស្រាវជ្រាវផ្សេងៗ។
សម្រាប់ប្រធានបទទាក់ទងនឹងភ្នំគូលែន រួមមាន ទស្សនវិស័យពេលអនាគតស្តីពីភ្នំគូលែន គំនូរលើថ្មបុរេប្រវត្តិសាស្ត្រលើភ្នំគូលែន ភ្នំមហិន្ទ្របព៌ត(ភ្នំគូលែន)ក្នុងអារ្យធម៌ខ្មែរ កំណាយស្រាវជ្រាវ និងលទ្ធផលពិសោធន៍LiDAR។ល។ មិនតែប៉ុណ្ណោះ ផែនការមេស្តីពីការគ្រប់គ្រងបរិស្ថានភ្នំគូលែន ក៏នឹងត្រូវលើកមកបង្ហាញក្នុងសិក្ខាសាលានេះដែរ ដោយមន្ត្រីជំនាញពីក្រសួងបរិស្ថាន។ ជាមួយគ្នានេះ មន្ត្រីនៃមូលនិធិស្រាវជ្រាវ និងអភិវឌ្ឍន៍ ADF ក៏នឹងបង្ហាញអំពីតំបន់ការពារបុរាណវិទ្យា និងសហគមន៍លើខ្នងភ្នំគូលែន និងដំណោះស្រាយសម្រាប់ជីវភាពរស់នៅរបស់សហគមន៍។ ចុងក្រោយនៃកិច្ចពិភាក្សានេះ គឺជាវេទិកាសំណួរចម្លើយរវាងអ្នកចូលរួម និងវាគ្មិន ដែលអាចឈានដល់ការធ្វើសេចក្តីសន្និដ្ឋានរួមមួយ។
សិស្សនិស្សិត មគ្គុទ្ទេសក៍ទេសចរណ៍ អ្នកស្រាវជ្រាវ ត្រូវបានលើកទឹកចិត្តឲ្យចូលរួមក្នុងកិច្ចពិភាក្សាដ៏កម្រនេះ។ អាជ្ញាធរជាតិអប្សរា រំពឹងថា នឹងមានអ្នកចូលរួមច្រើន ដើម្បីដឹងរឿងរ៉ាវនានា ជុំវិញរមណីយដ្ឋានភ្នំគូលែន ដែលជាកន្លែងប្រវតិ្តសាស្ត្រដ៏សំខាន់នៅក្នុងខេត្តសៀមរាប។
គូររម្លឹកដែរថា ភ្នំគូលែន ត្រូវបានរដ្ឋាភិបាលកម្ពុជា សម្រេចដកសិទ្ធិគ្រប់គ្រងពីក្រុមហ៊ុន នគរគោកធ្លក ដែលគេស្គាល់ថា ជារបស់លោក សៀង ណាំ អ្នកតំណាងរាស្ត្រគណបក្សប្រជាជនកម្ពុជា មកគ្រប់គ្រងខ្លួនឯងវិញ។ តាមសេចក្តីសម្រេចរបស់រដ្ឋាភិបាល ព្រៃឈើនៅលើភ្នំនេះ គឺគ្រប់គ្រងដោយក្រសួងបរិស្ថាន និងបុរាណដ្ឋាន គ្រប់គ្រងដោយអាជ្ញាធរជាតិអប្សរា។ យ៉ាងណាក៏ដោយ រហូតមកដល់ថ្ងៃនេះ ការគ្រប់គ្រងនៅមិនទាន់ដំណើរការនៅឡើយទេ ដោយបច្ចុប្បន្ន ស្ថាប័នចម្រុះកំពុងបង្កើតគណៈកម្មការ ដើម្បីដោះស្រាយ និងផ្ទេរការរស់នៅរបស់ប្រជាជននៅទីនោះ។ល៕
© រក្សាសិទ្ធិដោយ thmeythmey.com