អន្តរជាតិ
នាយករដ្ឋមន្ត្រីថៃ ទូរសព្ទទៅប្រមុខ UN បកស្រាយរឿងរឹតត្បិតសេរីភាពបញ្ចេញមតិ
× ប្រមុខអង្គការសហប្រជាជាតិ បង្ហាញការព្រួយបារម្ភចំពោះសេរីភាពបញ្ចេញមតិនៅក្នុងប្រទេសថៃ បន្ទាប់ពីមានបណ្ដឹងពីមេដឹកនាំក្រុមអាវក្រហម ដាក់ទៅកាន់ទីភ្នាក់ងារអង្គការសហប្រជាជាតិប្រចាំក្រុងបាងកក ប្រឆាំងនឹងរដ្ឋាភិបាលយោធាថៃ។ យ៉ាងណាក្ដី មេដឹកនាំរបបយោធាថៃ បានបកស្រាយបញ្ហានេះ ទៅកាន់ប្រមុខអង្គការសហប្រជាជាតិ តាមរយៈកិច្ចសន្ទនាទូរសព្ទជាងកន្លះម៉ោង។
សូមស្ដាប់ព័ត៌មានលម្អិត៖
នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចន្ទអូចា បានទូរសព្ទដោយផ្ទាល់ទៅកាន់អគ្គលេខាធិការអង្គការសហប្រជាជាតិ លោក បាន គីមូន ដើម្បីពន្យល់ជុំវិញការរឹតត្បិតសេរីភាពបញ្ចេញមតិ បន្ទាប់ពីក្រុមអាវក្រហមបានប្ដឹងរបបយោធា ដែលរារាំងការបើកមជ្ឈមណ្ឌលត្រួតពិនិត្យការធ្វើប្រជាមតិ ទៅទីស្នាក់ការសិទ្ធិមនុស្សអង្គការសហប្រជាជាតិក្នុងប្រទេសថៃ ។
ក្នុងការសន្ទនារយៈពេលកន្លះម៉ោង នៅថ្ងៃទី២០ ខែមិថុនា នាយករដ្ឋមន្ត្រីថៃ បានចំណាយពេលរហូតដល់២៥នាទី ដើម្បីពន្យល់លោកអគ្គលេខាធិការ ពីអ្វីដែលកំពុងកើតឡើងក្នុងប្រទេសថៃ ខណៈដែលលោក បាន គីមូន និយាយតែ៥នាទីប៉ុណ្ណោះ ជុំវិញការព្រួយបារម្ភរបស់លោក ចំពោះការរឹតត្បិតសេរីភាព។ លោក ប្រាយុទ្ធ ក៏បានលើកឡើងពីការធ្វើប្រជាមតិ និងការរៀបចំបោះឆ្នោតទូទៅផងដែរ ដោយលោកបញ្ជាក់ថា អ្វីៗកំពុងតែដើរតាមផែនទីចង្អុលផ្លូវ។
ក្រៅពីបញ្ហាបោះឆ្នោត មេដឹកនាំរបបយោធាថៃ ថែមទាំងប្រាប់លោក បាន គីមូន ពីសកម្មភាពរបស់មនុស្សមួយក្រុម ដែលមានបំណងអាក្រក់ ទៅលើប្រទេសថៃទៀតផង។ ចំពោះការព្រួយបារម្ភរបស់អគ្គលេខាធិការអង្គការសហប្រជាជាតិ លើបញ្ហាសេរីភាពបញ្ចេញមតិ លោក ប្រាយុទ្ធ ឆ្លើយតបថា ប្រទេសថៃនៅតែគោរពសិទ្ធិបញ្ចេញមតិ ហើយរដ្ឋធម្មនុញ្ញព្រាងថ្មី ក៏បានផ្ដល់សិទ្ធិដល់ប្រជាជន ដើម្បីបញ្ចេញមតិផងដែរ។
សូមរម្លឹកថា នៅថ្ងៃទី២០ ខែមិថុនា មេដឹកនាំក្រុមអាវក្រហមជាច្រើននាក់ បានដាក់ញត្តិមួយ ទៅឧត្តមស្នងការអង្គការសហប្រជាតិទទួលបន្ទុកសិទ្ធិមនុស្ស ក្នុងទីក្រុងបាងកក។ ពួកគេអះអាងថា សិទ្ធិរបស់ពួកគេត្រូវបានបំពាន បន្ទាប់របបយោធាថៃហាមឃាត់សមាជិករបស់ខ្លួន ពីការបើកមជ្ឈមណ្ឌលត្រួតពិនិត្យការធ្វើប្រជាមតិខែសីហា ក្នុងខេត្តចំនួន២៩។
បើតាមកាសែត Bangkok Post លោក Nattawut Saikuar មេដឹកនាំម្នាក់នៃក្រុមអាវក្រហម និយាយថា ក្រុមអាវក្រហមចង់ឲ្យទីភ្នាក់ងារអង្គការសហប្រជាជាតិ ដឹងបរិយាកាសប្រទេសថៃ នៅមុនការមកដល់ថ្ងៃធ្វើប្រជាមតិ ដែលមានលក្ខណៈខុសប្លែកពីប្រទេសដទៃ។ លោកបន្តថា ប្រជាជនគ្មានសិទ្ធិ ឬសេរីភាពអ្វីទេ ហើយសកម្មភាពរបស់ចលនាអាវក្រហម ត្រូវរដ្ឋាភិបាលចោទថា មិនស្របច្បាប់ទៀតផង៕
Tag:
ប្រាយុទ្ធចន្ទអូចា
បានគីមូន
ថៃ
UN
© រក្សាសិទ្ធិដោយ thmeythmey.com