អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
បេក្ខជនប្រធានាធិបតីអាមេរិកមកពីគណបក្សសាធារណរដ្ឋ លោក ដូណាល់ ត្រាំ បានវាយប្រហារខ្លាំងៗលើ លោកស្រី ហ៊ីឡារី គ្លីនតុន ដោយចោទប្រកាន់ លោកស្រី ជាមនុស្សកុហក មិនសមនឹងតំណែងប្រធានាធិបតី និងលួចកិបកេងលុយរដ្ឋ។ បេក្ខជនទាំងពីរ បានបន្តឆ្លើយឆ្លងសំដីគ្នា ជាហូរហែ ខណៈដែលការបោះឆ្នោតជ្រើសរើសប្រធានាធិបតី នឹងធ្វើនៅខែវិច្ឆិកា ឯណោះ។
សេដ្ឋីអចលនទ្រព្យ លោក ដូណាល់ ត្រាំ នៅថ្ងៃទី២២ ខែមិថុនា បានឆ្លើយតបនឹងការវាយប្រហាររបស់បេក្ខជនប្រធានាធិបតី លោកស្រី ហ៊ីឡារី គ្លីនតុន ដែលចាត់ទុកលោក ជាអ្នកជំនួញគ្រោះថ្នាក់ សម្រាប់អាមេរិក។ លោក ត្រាំ ហៅលោកស្រី ជាអ្នកដែលពូកែកុហកលំដាប់ពិភពលោក និងរិះគន់នយោបាយលោកស្រី ចំពោះពាណិជ្ជកម្ម នយោបាយបរទេស និងអន្តោប្រវេសន៍ជាដើម។
ថ្លែងទៅកាន់អ្នកគាំទ្ររបស់នៅសណ្ឋាគារផ្កាយប្រាំ Trump SoHo បេក្ខជនប្រធានាធិបតីបក្សសាធារណរដ្ឋរូបនេះ ថែមទាំងចាត់ទុកលោកស្រី គ្លីនតុន ជាបេក្ខជនពុករលួយខ្លាំង ដែលចង់ធ្វើប្រធានាធិបតី។ លោកបន្តថា លោកស្រី គ្លីនតុន កំពុងតែមានបាន ហើយធ្វើឲ្យយើងកាន់តែក្រទៅ។
ជាមួយគ្នានោះ សារព័ត៌មាន The Guardian ផ្សាយថា លោក ដូណាល់ ត្រាំ ក៏វាយប្រហារលោកស្រី គ្លីនតុន ចំពោះតួនាទីជារដ្ឋមន្ត្រីការបរទេសផងដែរ។ លោកបញ្ជាក់ថា លោកស្រី គ្លីនតុន គ្រប់គ្រងក្រសួងការបរទេស ដូចជាក្រសួងផ្ទាល់របស់លោកស្រី ហើយតែងតែស្របតាមរបបផ្ដាច់ការ ជាថ្នូរនឹងប្រាក់។ លោក ត្រាំ បន្តចោទទៀតថា លោកស្រី បានលក់ប្រទេស និងកម្មករអាមេរិក ទៅឲ្យក្រុងប៉េកាំង។
ដោយលើកឡើងពីការវាយប្រហារលើកុងស៊ុលអាមេរិក ក្នុងក្រុងBenghazi ដែលសម្លាប់ទូតអាមរិកផងនោះ បេក្ខជនវ័យ៧០ឆ្នាំនេះ ចាត់ទុករឿងនេះ ជាការទទួលខុសត្រូវរបស់លោកស្រី គ្លីនតុន។ លោកនិយាយថា លោក Chris Stevens ត្រូវទុកឲ្យស្លាប់ ដោយគ្មានជំនួយអ្វី ខណៈលោកស្រី កំពុងតែសម្រាកលើគ្រែទៅវិញ។ នេះជាការសម្រេចចិត្តមួយ ដែលបណ្ដាលឲ្យមានការបាត់បង់ជីវិត ការបំផ្លិចបំផ្លាញ និងភេរវកម្ម គ្រប់កន្លែង។
ក្រៅពីការវាយប្រហារលើអ្នកដទៃ លោក ដូណាល់ ត្រាំ ក៏មិនភ្លេចអួតពីខ្លួនឯងនោះទេ។ លោកអះអាងថា លោកជាមនុស្សមានគំនិតច្នៃប្រឌិត ដែលមានសមត្ថភាពបំពេញការងារបានជោគជ័យ។ មួយវិញទៀត លោកក៏អាចការពារអ្នកបោះឆ្នោតទាំងអស់ ពីប្រព័ន្ធនយោបាយ និងសេដ្ឋកិច្ច ដែលចងរឹតដោយអ្នកនយោបាយខ្លះ រួមទាំងលោកស្រី គ្លីនតុន ផងដែរ៕
Tag:
អាមេរិក
ដូណាល់ត្រាំ
ហ៊ីឡារីគ្លីនតុន
© រក្សាសិទ្ធិដោយ thmeythmey.com
