ផែនទីហានិភ័យអាចឲ្យគេដឹងពីកន្លែងគ្រោះថ្នាក់មុនក្នុងតំបន់អង្គរ

ជាតិ

ផែនទីហានិភ័យអាចឲ្យគេដឹងពីកន្លែងគ្រោះថ្នាក់មុនក្នុងតំបន់អង្គរ

29, Jun 2016 , 8:19 am

រូបភាព

ដោយ: ថ្មីៗ

សៀមរាប៖ អាជ្ញាធរជាតិអប្សរា កំពុងរៀបចំផែនទីហានិភ័យនៅក្នុងរមណីយដ្ឋានអង្គរ។ ផែនទី នឹងអនុញ្ញាតឲ្យភ្ញៀវទេសចរដឹងពីទីតាំងគ្រោះថ្នាក់នានា នៅតាមប្រាសាទ និងនៅដើមឈើក្នុងតំបន់អង្គរ។

ផែនទីហានិភ័យ គឺជាផែនទីម្យ៉ាងដែលអាចបង្ហាញពីស្ថានភាពគ្រោះថ្នាក់មួយចំនួននៅតាមប្រាសាទ និងនៅតាមរចនាសម្ព័ន្ធបុរាណដ្ឋាននានា ក្នុងគោលដៅរកឲ្យឃើញថា តើចំណុចណាមួយកំពុងបង្កគ្រោះថ្នាក់ខ្លាំង មធ្យម និងតិចតួច។ ផែនទីនេះ ក៏នឹងអាចឲ្យអ្នកអភិរក្ស ងាយស្រួលដើម្បីសង្គ្រោះទីតាំងហានិភ័យទាំងនោះផងដែរ។

ព័ត៌មានដែលចេញផ្សាយក្នុងទំព័រហ្វេសប៊ុករបស់អាជ្ញាធរជាតិអប្សរា បានសរសេរថា លោក ហង់ ពៅ អគ្គនាយករងអាជ្ញាធរជាតិអប្សរា បានឡើងធ្វើបទបង្ហាញជុំវិញផែនទីហានិភ័យនេះ ក្នុងកិច្ចប្រជុំអាយស៊ីស៊ីអង្គរ កាលពីថ្ងៃទី២២ មិថុនាកន្លងទៅ។ លោក ហង់ ពៅបញ្ជាក់ថា ផែនទីហានិភ័យ ត្រូវបានបង្កើតឡើងនៅឆ្នាំ២០១២ ក្នុងគោលដៅ សិក្សាពីហានិភ័យប្រាសាទ អាកាសធាតុ ប្រព័ន្ធធារាសាស្ត្រ ប្រជាជន និងភ្ញៀវទេសចរជាដើម ព្រោះវាមានទំនាក់ទំនង។

លោក ហង់ ពៅ បន្តថា ប្រាង្គប្រាសាទក្នុងតំបន់អង្គរមានសភាពទ្រុឌទ្រោមដោយកត្តាធម្មជាតិ កត្តាមនុស្ស សង្គ្រាម ។ល។ ដូច្នេះ គេចាំបាច់ត្រូវរៀបចំផែនទីហានិភ័យនៅតាមប្រាសាទនានា ដើម្បីសម្រួលលើការងារអភិរក្ស ជួសជុល ក៏ដូចជាបង្ការការគ្រោះថ្នាក់ដល់ភ្ញៀវទេសចរជាយថាហេតុ។

បច្ចុប្បន្ន ក្រុមការងាររបស់អាជ្ញាធរជាតិអប្សរា កំពុងរៀបចំធ្វើផែនទីហានិភ័យ នៅប្រាសាទបាយ័ន។ អ្នកជំនាញនឹងរៀបចំដាក់ពណ៌រាល់ចំណុះដែលបានត្រួតពិនិត្យ និងចុះបញ្ជីសារពើភណ្ឌជាដើម។ ឧទាហរណ៍ ពណ៌ក្រហមគ្រោះថ្នាក់ខ្លាំង ពណ៌ខៀវគ្រោះថ្នាក់មធ្យម និងទឹកក្រូច ត្រូវប្រុងប្រយ័ត្នជាដើម។

លោកអគ្គនាយករងអាជ្ញាធរជាតិអប្សរាបានបញ្ជាក់បន្ថែមថា«បច្ចុប្បន្ន ក្រុមការងារកំពុងបង្កើតប្រព័ន្ធមួយឲ្យឈ្មោះថា GIS វាជាប្រព័ន្ធមួយទាក់ទងនឹងភូមិសាស្ត្រដែលអនុញ្ញាតឲ្យយើងអាចគណនា ដោយគ្រាន់តែអ្នកជំនាញ បញ្ចូលទិន្នន័យទៅ ប្រព័ន្ធGISនេះអាចគណនាប្រាប់យើងថា នេះជាហានិភ័យដែលនឹងមកដល់បើសិនជាក្នុងករណីមានប្រជាពលរដ្ឋឬភ្ញៀវទេសចរទៅកន្លែងនោះ។ ការធ្វើនេះ យើងត្រូវការអ្នកជំនាញគ្រប់ផ្នែកទាំងអស់ប្រមូលនិងបញ្ចូលទិន្នន័យទៅប្រព័ន្ធ GIS ដើម្បីគណនាហានិភ័យ ដែលវានឹងកើតមានឡើងបើសិនជាយើងមិនព្រមទប់ស្កាត់មុនទេ»។

លោក ហង់ ពៅ មិនបានបញ្ជាក់ថា គម្រោងផែនទីហានិភ័យដែលកំពុងដំណើរការនេះ គ្រោងនឹងបញ្ចប់នៅពេលណានោះទេ តែលោកថា ក្រុមការងារគ្រោងនឹងធ្វើ ផែនទីអាទិភាពបន្ទាប់ពីនេះ។ ផែនទីអាទិភាពនេះជាផែនទីមួយសម្រាប់អ្នកដឹកនាំ សម្រេចថាគួរធ្វើអ្វីមុននិងគួរធ្វើអ្វីក្រោយទៅតាមស្ថានភាពជាក់ស្តែង៕