ក្រសួងអប់រំត្រូវទប់ស្កាត់សកម្មភាពនយោបាយតាមគ្រឹះស្ថានអប់រំឲ្យបានស្មើភាពគ្នា

ជាតិ

ក្រសួងអប់រំត្រូវទប់ស្កាត់សកម្មភាពនយោបាយតាមគ្រឹះស្ថានអប់រំឲ្យបានស្មើភាពគ្នា

30, Jun 2016 , 8:59 pm

រូបភាព

លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា

ដោយ: ធឿន បញ្ញាឬទិ្ធ

ក្រសួងអប់រំ ចេញវិធានការទប់ស្កាត់រាល់សកម្មភាពនយោបាយ តាមគ្រឹះស្ថានអប់រំ ។ អ្នកតាមដានស្ថានការណ៍សង្គម គាំទ្រចំណាត់ការក្រសួងអប់រំ តែពួកគេស្នើឲ្យក្រសួងទប់ស្កាត់សកម្មភាពនយោបាយឲ្យបានស្មើភាពគ្នា ទៅលើគ្រប់បណ្ដាភាគីនយោបាយទាំងអស់។

សាស្ត្រាចារ្យវិទ្យាសាស្ត្រនយោបាយ និងជាអ្នកវិភាគលោក សូ ចន្ថា គាំទ្រចំណាត់ការក្រសួងអប់រំ ដែលចេញវិធានការទប់ស្កាត់រាល់សកម្មភាពនយោបាយ តាមគ្រឹះស្ថានអប់រំនេះ។ លោក សូ ចន្ថា ដែលមើលឃើញសកម្មនយោបាយ នៅក្នុងគ្រឹះស្ថានជារូបភាពមិនល្អនោះ ស្នើឲ្យក្រសួងចាត់វិធានការឲ្យច្បាស់លាស់និងអនុវត្តឲ្យបានពិតប្រាកដ និងស្មើភាពគ្នា ដោយមិនត្រូវរើសអើងឡើយ ពោលគឺត្រូវទប់ស្កាត់ទាំងសកម្មភាពនយោបាយប្រឆាំងរដ្ឋាភិបាល និងសកម្មក្រុមគាំទ្ររដ្ឋាភិបាល។

ថ្លែងប្រាប់សារព័ត៌មានថ្មីៗ សាស្ត្រាចារ្យរូបនេះ បានបញ្ជាក់ដូច្នេះថា៖«គ្រឹះស្ថានអប់រំជាកន្លែងបណ្ដុះចំណេះដឹង យោបល់សម្រាប់យុវជនទំពាំងស្នង ប៉ុន្ដែតាមគ្រឹះស្ថានខ្លះត្រូវបានគេយកទីតាំងអប់រំនោះ មកបណ្ដុះបណ្ដាលផ្នត់គំនិតនយោបាយសម្រាប់ក្រុមខ្លួនឯង។ដូចនេះក្រសួងអប់រំត្រូវអនុវត្តជាក់ស្ដែង អនុវត្តឲ្យស្មើភាពគ្នាលើគ្រប់គណបក្សនយោបាយទាំងអស់។ ហើយត្រូវលុបបំបាត់រចនាសម្ព័ន្ធនយោបាយ និងគ្រឹះស្ថានអប់រំធ្វើជាកន្លែងប្រជុំកិច្ចការគណបក្ស»។

លោក សន ជ័យ ក៏មើលឃើញដូចលោក សូ ចន្ថា ដែរ។ នាយកប្រតិបត្តិនៃសម្ព័ន្ធគណនេយ្យភាពសង្គមរូបនេះ មើលឃើញថា ថ្នាក់ដឹកនាំតាមគ្រឹះស្ថានអប់រំ និងគ្រូបង្រៀនមួយចំនួន តែងតែបង្ហាញរូបភាពគណបក្សនយោបាយ ដល់យុវជន និងនិស្សិត។ សម្រាប់លោក សន ជ័យ វិធានការក្រសួងអប់រំពេលនេះ គ្រាន់តែជាខ្លឹមសារបន្ថែមពីលើចំណាត់មុនៗប៉ុណ្ណោះ ព្រោះក្រសួងអប់រំ មិនទាន់បានបែងចែកចំណាត់ការឲ្យច្បាស់ចំពោះមន្ត្រីនយោបាយ និងមន្ត្រីដែលស្ថិតក្នុងក្របខណ្ឌរដ្ឋបាលសាធារណៈ ។ «ខ្ញុំបានឃើញខ្លឹមសារក្រសួង ហាមមិនឲ្យស្លៀកពាក់ ឃោសនានយោបាយដែរ តែមិនទាន់មានការបក្សស្រាយឲ្យបានច្បាស់ ដូច្នេះខ្ញុំខ្លាចខ្លឹមសារនេះមានការបកស្រាយច្រឡំ រវាងអភិបាលកិច្ច និងការពិភាក្សារបស់អ្នកនយោបាយ[…]។ ហើយនេះអាចមកពីការគ្រប់គ្រងមិនច្បាស់អំពីរឿងកិច្ចការនយោបាយរវាងមន្ត្រីនយោបាយ និងមន្ត្រីស្ថិតក្នុងរដ្ឋបាលសាធារណៈ ដូចនេះគួរតែបែងចែកឲ្យបានច្បាស់។ ព្រោះមានគ្រូបង្រៀនខ្លះ នៅពេលចប់ម៉ោងតែងតែធ្វើសកម្មភាពពាក់អាវគណបក្សសម្ញែង ដែលអាចប៉ះពាល់ដល់ការអប់រំ»។ នេះជាការបញ្ជាក់របស់លោក សន ជ័យ។

កាលពីថ្ងៃទី២៩ មិថុនា រដ្ឋមន្ត្រីក្រសួងអប់រំលោក ហង់ ជួនណារ៉ុន បានបង្គាប់ឲ្យសាកលវិទ្យាធិការ នាយកវិទ្យាស្ថានទាំងរដ្ឋនិងឯកជន និងប្រធានអង្គភាពក្រោមឱវាទរបស់ក្រសួង និងប្រធានមន្ទីអប់រំ ប្រធានការិយាល័យទាំងអស់ ត្រូវទប់ស្កាត់រាល់សកម្មភាពទាំងឡាយណាដែលមានចេតនាផ្សព្វផ្សាយកម្មវិធីនយោបាយនៅតាមគ្រឹះស្ថានសិក្សាទាំងនោះ។ បើតាមលោក ហង់ ជួនណារ៉ុន សកម្មភាពរៀបចំវេទិការ ការចែកចាយសម្ភារៈ សម្លៀកបំពាក់ ឬវត្ថុផ្សេងៗដែល បម្រើឲ្យសកម្មភាពនយោបាយ ឬឃោសនានយោបាយ និងមិនអនុញ្ញាតឲ្យមានបន្តទៀតឡើយនៅតាមគ្រឹះស្ថានអប់រំទាំងរដ្ឋនិងឯកជន។

ការចេញវិធានហាមឃាត់បែបនេះ គឺដើម្បីឆ្លើយតបទៅនឹងស្ថានភាពនាពេលបច្ចុប្បន្ន និងទៅអនាគត ដែលក្រសួងអប់រំបានមើលឃើញថា គ្រឹស្ថាននីមួយៗអាចបន្តមានការរៀបចំវេទិការ ការចែកចាយសម្ភារៈសម្លៀកបំពាក់ ឬវត្ថុផ្សេងៗទៀត ដែលបម្រើឲ្យសកម្មភាពនយោបាយ ឬឃោសនានយោបាយ ។ ក្រសួងចាត់ទុកបញ្ហានេះគឺផ្ទុយទៅនឹងច្បាប់ស្ដីការអប់រំ និងច្បាប់ស្ដីពីលក្ខន្តិកៈមន្ត្រីរាជការស៊ីវិល ដែលថ្នាក់ដឹកនាំគ្រឹស្ថានសិក្សាទាំងអស់ត្រូវ ត្រូវចាត់វិធានការ ផ្សព្វផ្សាយ និងពង្រឹងការអនុវត្តខ្លឹមសារមាត្រា៣៤នៃច្បាប់ស្ដីពីការអប់រំ មាត្រា៣៧នៃច្បាប់ស្ដីសហលក្ខន្តិកៈមន្ត្រីរាជការស៊ីវិល ឲ្យមានប្រសិទ្ធភាព៕