ជាតិ
នយោបាយជាតិ
សាលាឧទ្ធរណ៍ច្រានចោលពាក្យបណ្ដឹងលោក សួន សេរីរដ្ឋា ប្ដឹងលោក ហោ ណាំហុង
× សាលាឧទ្ធរណ៍សម្រេចមិនចាត់ការពាក្យបណ្ដឹងប្រធានគណបក្សអំណាចខ្មែរលោក សួន សេរីរដ្ឋា ដែលប្ដឹងអតីតរដ្ឋមន្ត្រីក្រសួងការបរទេសលោក ហោ ណាំហុង ពីបទ«បរិហាកេរ្តិ៍ជាសាធារណៈ និងញុះញង់ឲ្យមានការរើសអើង»ឡើយ។ គួរបញ្ជាក់ថា ព្រះរាជអាជ្ញារងសាលាដំបូងរាជធានីភ្នំពេញ លោក មាស ចន្ទពិសិដ្ឋ បានបដិសេធពាក្យបណ្ដឹងរបស់លោក សួន សេរីរដ្ឋា ដែលប្ដឹងលោក ហោ ណាំហុង នេះ ដោយតម្កល់រឿងទុកឥតចាត់ការ កាលពីថ្ងៃទី២ កុម្ភៈ កន្លងមក ។
ក្រោយព្រះរាជអាជ្ញារសាលាឧទ្ធរណ៍លោក អ៊ុក សាវុធ បានពិនិត្យមើលកំណត់ហេតុសាលាដំបូងដែលបានសាកសួរ លោក ហោ ណាំហុង កន្លងមកនោះឃើញថា សេចក្ដីសម្រេចរបស់សាលាដំបូងគឺមានអង្គហេតុ និងអង្គច្បាប់ សមស្រមតាមគតិច្បាប់ត្រឹមត្រូវ ដែលអាចតម្កល់ទុកជាបានការ។ នេះជាឆ្លើយតបរបស់សាលាឧទ្ធរណ៍ដែលបានបញ្ជាក់ប្រាប់ប្រធានគណបក្សអំណាចខ្មែរថា ឧទ្ធរណ៍សម្រេចមិនចាត់ការពាក្យបណ្ដឹងលោក សួន សេរីរដ្ឋា ដែលប្ដឹងអតីតរដ្ឋមន្ត្រីក្រសួងការបរទេសលោក ហោ ណាំហុង ពីបទ«បរិហាកេរ្តិ៍ជាសាធារណៈ និងញុះញង់ឲ្យមានការរើសអើង»ឡើយ។
ជាការឆ្លើយតប ប្រធានគណបក្សអំណាចខ្មែរ លោក សួន សេរីរដ្ឋា យល់ថា ការសម្រេចរបស់សាលាឧទ្ធរណ៍នេះ គឺជាការបង្ហាញរូបភាពកាន់តែច្បាស់ថាតុលាការជាអាយ៉ងនយោបាយសម្រាប់បម្រើផលប្រយោជន៍គណបក្សកាន់អំណាចប៉ុណ្ណោះ ។ សម្រាប់លោក សួន សេរីរដ្ឋា បើទោះជាសាលាឧទ្ធរណ៍មិនចាត់ការលើករណីខ្លួនក៏ដោយ តែវាក៏ជោគជ័យមួយសម្រាប់លោក ដែលចង់បង្ហាញឲ្យប្រជាពលរដ្ឋ សហគមជាតិ និងអន្តរជាតិ បានដឹងពីប្រព័ន្ធតុលាការស្រុកខ្មែរ។
ថ្លែងប្រាប់សារព័ត៌មានថ្មីៗ ប្រធានគណបក្សអំណាចខ្មែររូបនេះ បានបញ្ជាក់ដូច្នេះថា៖«អត់មានអ្វីប្លែកទេ ខ្ញុំដឹងតាំងពីដំបូងហើយថា ចៅក្រម តុលាការ ប្រាកដជាមិនហ៊ានបើកសវនាការ ចាត់ការលើលោក ហោ ណាំហុង ឡើយ ព្រោះគាត់ជាមន្ត្រីដុសស្លែក្នុងគណបក្សកាន់អំណាច។ តែវាជាជោគជ័យមួយដែលអាចបង្ហាញដល់សហគមជាតិ អន្តរជាតិបានឃើញពីប្រព័ន្ធតុលាការស្រុកខ្មែរ ដែលជាអាយ៉ងបក្សកាន់អំណាចសម្រាប់ទប់អំណាចឲ្យមន្ត្រីបក្សកាន់អំណាច ព្រោះបើបក្សកាន់អំណាចចង់ប្ដឹងអ្នកណាមួយវិញ តុលាការរត់ខ្វែងដៃខ្វែងជើង»។
បើតាមលោក សួន សេរីរដ្ឋា បើទោះជាតុលាការស្ថិតក្រោមអំណាចនយោបាយក្តី ក៏លោកនៅតែបន្តដាក់ពាក្យប្ដឹងអតីតរដ្ឋមន្ត្រីក្រសួងការបរទេសលោក ហោ ណាំហុង ទៅតុលាការកំពូលទៀត ដើម្បីបង្ហាញឲ្យច្បាស់ពីភាពអយុត្តិធម៌នៃប្រព័ន្ធតុលាការកម្ពុជា។ ហើយគណបក្សលោកនឹងចង់ក្រងរបាយការណ៍ និងកំណត់ហេតុនៃប្រព័ន្ធតុលាការនេះ ដើម្បីផ្សព្វផ្សាយបង្ហាញដល់សាធារណៈជនដែរ។
គួរបញ្ជាក់ថា មូលហេតុដែលលោក សួន សេរីរដ្ឋា ប្ដឹងលោក ហោ ណាំហុង នេះ គឺដោយសារតែរដ្ឋមន្ត្រីក្រសួងការបរទេសរូបនេះ បានចោទគណបក្សលោកថា មានសមាជិកជាភេវរករ កាលពីថ្ងៃទី៧ ខែធ្នូ ឆ្នាំ២០១៥ កន្លងមក។ លោក សួន សេរីរដ្ឋា មិនអាចទទួលយកការចោទរបស់លោក ហោ ណាំហុង ឡើយ។
ប្រធានគណបក្សអំណាចខ្មែររូបនេះ អះអាងថាពាក្យសម្ដីរបស់លោក ហោ ណាំហុង ដែលបានចោទថា គណបក្សលោកមានក្រុមភេរវកម្មនេះ គឺធ្វើឲ្យខូចកេរ្តិ៍ឈ្មោះគណបក្ស និងធ្វើឲ្យប្រជាពលរដ្ឋមានការភ័យខ្លាច មិនហ៊ានគាំទ្រគណបក្សខ្លួន៕
Tag:
សួន សេរីរដ្ឋា
ហោ ណាំហុង
© រក្សាសិទ្ធិដោយ thmeythmey.com