ជាតិ
អតីតសិស្សខេត្តតាកែវរៀបចំសិក្ខាសាលាដើម្បីណែនាំសិស្សប្អូនពីយុទ្ធសាស្ត្រមុនប្រឡងបាក់ឌុប
× នាថ្ងៃចន្ទ ទី១១ ខែកក្កដា ឆ្នាំ២០១៦ ខាងមុខនេះ អតីតសិស្សខេត្តតាកែវ នឹងរៀបចំសិក្ខាសាលាមួយស្ដីពី យុទ្ធសាស្ត្រមុនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) និងការទទួលបានអាហារូបករណ៍ របស់សិស្សច្បងបីជំនាន់។ សិក្ខាសាលានេះចូលរួមដោយឥតគិតថ្លៃ នៅវិទ្យាល័យជាស៊ីមតាកែវ វេលាម៉ោង១:៣០ ដល់ ៥:០០ល្ងាច។
សិក្ខាសាលានេះ រៀបចំឡើងក្នុងគោលបំណងជំរុញអោយសិស្សានុសិស្ស និងយុវជនគ្រប់រូបយល់ដឹងពី ការត្រៀមខ្លួនប្រឡងបាក់ឌុបឲ្យជាប់ ដើម្បីសម្រេចចិត្តក្នុងការជ្រើសរើសមុខជំនាញ និងការពង្រឹងសមត្ថភាពដើម្បីក្លាយជាសិស្ស និស្សិតឆ្នើម។ ទន្ទឹមនឹងនេះ ក្នុងសិក្ខាសាលានេះ ដើម្បីឲ្យមានការបង្កើនទំនាក់ទំនងរវាងសិស្សច្បង សិស្សប្អូន និងមនុស្សជុំវិញខ្លួន ដើម្បីបណ្ដុះគនិត ក្នុងការចូលរួមការងារសង្គម និងចេះស្វែងរកអាហារូបករណ៍ ក្នុង និង ក្រៅប្រទេស ឲ្យត្រូវនឹងសមត្ថភាព។
អ្នកចូលរួមសិក្ខាសាលានិងបានជួបជាមួយវាគ្មិនដែលមានបទពិសោធន៍ក្នុងការសិក្សាជាច្រើន និងផ្ដល់ការប្រឹក្សាយោបល់ទាក់ទងទៅនឹងការសិក្សារៀនសូត្រ។ វាគ្មិនវ័យក្មេងចំនួន៣រូប វាគ្មិនទី១ កញ្ញា អេន សុជាតិ ជានិស្សិតអាហារូបករណ៍ ផ្នែកសេដ្ឋកិច្ចអភិវឌ្ឍន៍ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច វាគ្មិនទី២លោក សែម សុរិយារង្សី ជានិស្សិតអាហារូបករណ៍ ផ្នែកសំណង់ នៃសាកលវិទ្យាល័យសំណង់ហាណូយ ប្រទេសវៀតណាម និងវាគ្មិនទី៣ លោក អ៊ឹម ជ្រានវុត្ថា និស្សិតអាហារូបករណ៍ ផ្នែកគណិតវិទ្យា នៃសាកលវិទ្យាល័យមហាសារខាម ប្រទេសថៃ សុទ្ធសឹងតែជាអតីតសិស្សខេត្តតាកែវ ដែលបានទទួលអាហារូបករណ៍សិក្សានៅក្រៅប្រទេស នឹងធ្វើការចែករំលែកបទពិសោធន៍ល្អៗសម្រាប់អ្នកចូលរួម។
គួរបញ្ជាក់ផងដែរថា អតីតសិស្សខេត្តតាកែវ បានរំពឹងទុកថា ៩០% និងស្គាល់អំពី សមត្ថភាពផ្ទាល់ខ្លួន ក្នុងការបែកចែកជ្រើសរើសជំនាញ ការទទួលបានអាហារូបករណ៍ដោយជោគជ័យ សម្រាប់ថ្នាក់ឧត្តមសិក្សា និងក្លាយជាបុគ្គលឆ្នើមក្នុងសង្គម។ ម្យ៉ាងវិញទៀត អតីតសិស្សខេត្តតាកែវ ក៏បានបោះពុម្ពអាវ«ខ្ញុំស្រលាញ់ខេត្តតាកែវ»សម្រាប់លក់ ដើម្បីប្រមូលថវិកាក្នុងការរៀបចំកម្មវិធីនេះផងដែរ៕
Tag:
អប់រំ
បាក់ឌុប
តាកែវ
អាហារូបករណ៍
© រក្សាសិទ្ធិដោយ thmeythmey.com