អូស្ត្រាលីនៅតែជឿថា ការសម្រេចចិត្តឈ្លានពានអ៊ីរ៉ាក់ជាមួយអាមេរិកជារឿងត្រឹមត្រូវ

អន្តរជាតិ

អូស្ត្រាលីនៅតែជឿថា ការសម្រេចចិត្តឈ្លានពានអ៊ីរ៉ាក់ជាមួយអាមេរិកជារឿងត្រឹមត្រូវ

07, Jul 2016 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

អតីតនាយករដ្ឋមន្ត្រីអូស្ត្រាលីលោក John Howard បានអះអាងថា លោកនៅតែចាត់ទុកការឈ្លានពានអ៊ីរ៉ាក់ឆ្នាំ ២០០៣ ជាមួយអាមេរិកនិងអង់គ្លេសជារឿងដែលសមស្របមួយ។ ការបញ្ជាក់បែបនេះធ្វើឡើងក្រោយពេលដែល របាយការណ៍ Chilcot របស់អង់គ្លេសបកអាក្រាតថាការសម្រេចចិត្តធ្វើសង្គ្រាមនៅអ៊ីរ៉ាក់ របស់លោក តូនី ប្ល៊ែរ(Tony Blair) ធ្វើឡើងដោយពឹងលើព័ត៌មានចារកម្មខុស។

ការអន្តរាគមន៍នៅអ៊ីរ៉ាក់ ទោះកើតឡើងជាង១០ឆ្នាំមុនក៏ដោយ វានៅតែជារឿងចម្រូងចម្រាសនិងស្មុគស្មាញបំផុតដែរ។ សំណុំរឿងនេះកាន់តែចម្រូងចម្រាសខ្លាំងនៅពេលដែលរបាយការណ៍អង់គ្លេស Chilcot ចេញផ្សាយថា ការសម្រេចចិត្តរបស់នាយករដ្ឋមន្ត្រីអង់គ្លេសកាលនោះគឺលោក តូនី ប្ល៊ែរ ពឹងលើរបាយការណ៍ចារកម្មខុស ហើយលោកមិនបានប្រើប្រាស់ឲ្យអស់រាល់មធ្យោបាយដើម្បីដោះស្រាយបញ្ហានៅអ៊ីរ៉ាក់ឡើយ។

ចំណែក នៅអូស្ត្រាលីវិញ អតីតនាយករដ្ឋមន្ត្រីលោក John Howard ក៏ត្រូវគេសួរនាំផងដែរជុំវិញការបញ្ជូនទ័ពទៅអន្តរាគមន៍ជាមួយសម្ព័ន្ធមិត្តអាមេរិកនិងអង់គ្លេស ខណៈដែលលោកចូលរួមក្នុងសន្និសីទសារព័ត៌មាននៅក្រុង Sydney ថ្ងៃពុធទី ៦កក្កដា។ លោក John Howard ដែលកាន់តំណែងពីឆ្នាំ១៩៩៦ ដល់ឆ្នាំ ២០០៧ នោះ នៅតែការពារអ្វីដែលលោកបានធ្វើដោយបញ្ជាក់ថា ការសម្រេចចិត្តចូលរួមជាមួយអាមេរិកនិងអង់គ្លេសដើម្បីឈ្លានពានអ៊ីរ៉ាក់ជារឿងសមស្របមួយ។ តែលោកសោកស្តាយចំពោះការបាត់បង់ជីវិតរបស់ប្រជាជននិងកងម្លាំងយោធាដែរព្រោះអូស្ត្រាលីបញ្ជូនទ័ពប្រហែល ២០០០នាក់ទៅចូលរួមក្នុងអន្តរាគមន៍នេះដែរ។

អតីតនាយករដមន្ត្រីអូស្ត្រាលីរូបនេះបានថ្លែងថា៖ «ខ្ញុំជឿជាក់ថាការសម្រេចចិត្តទៅធ្វើសង្គ្រាមប្រឆាំងអ៊ីរ៉ាក់គឺជារឿងសមស្របកាលនោះ ហើយខ្ញុំមិនប្តូរជំហរបស់ខ្ញុំឡើយព្រោះខ្ញុំគិតច្បាស់ហើយថាវាជាការសម្រេចចិត្តដ៏ត្រឹមត្រូវមួយ»។

ក្នុងពេលនោះមានអ្នកសារព័ត៌មានសាកសួរលោកផងដែរថាតើលោកអាចសុំអភ័យចំពោះក្រុមគ្រួសារយោធាអូស្ត្រាលីឬអត់ ហើយលោកឆ្លើយតបថាលោកពិតជាសោកស្តាយ តែមិនសុំអភ័យទោសចំពោះការសម្រេចចិត្តឡើយ។ លោកលើកឡើងថា៖« តាមពិតទៅខ្ញុំសោកស្តាយចំពោះការស្លាប់និងរបួស ប៉ុន្តែបើសិនជាឲ្យខ្ញុំសុំអភ័យទោសចំពោះការចូលរួមក្នុងអន្តរាគមន៍នៅអ៊ីរ៉ាក់នោះ ខ្ញុំសូមនិយាយថាអ្វីខ្ញុំការពារការសម្រេចចូលរួមក្នុងអន្តរាគមន៍នេះ»។

តាមពិតទៅការអន្តរាគមន៍យោធាក្នុងឆ្នាំ ២០០៣ ដោយឈ្លានពានអ៊ីរ៉ាក់ ធ្វើឡើងក្នុងគោលដៅតាមប្រមាញ់អាវុធមហាប្រល័យដែលលោក សាដាម ហ៊ូសេន លាក់ទុក ហើយមួយទៀតគេក៏ចង់គាស់រំលើងរបបផ្តាច់ការនិងបណ្តុះលទ្ធិប្រជាធិបតេយ្យនៅមជ្ឈិមបូព៌ាផង។ ប៉ុន្តែក្រោយការអន្តរាគមន៍ គេរកមិនឃើញអាវុធមហាប្រល័យសោះ ហើយគេមិនត្រឹមតែមិនអាចជួយសាបព្រួសប្រជាធិបតេយ្យឡើយ អាមេរិកនិងសម្ព័ន្ធមិត្តក៏ចូលរូមបង្កើតចលនាហិង្សាសាសនា រហូតលេចចេញជាក្រុមភេរវជនរដ្ឋឥស្លាមឬក្រុមដែស្ហនេះទៀត៕