អន្តរជាតិ
មហាយក្សអាស៊ីខាងត្បូងឥណ្ឌាពង្រឹងឥទ្ធិពលប្រជែងចិននៅទ្វីបអាហ្វ្រិក
× នាយករដ្ឋមន្ត្រីឥណ្ឌាលោក នារិន្ទ្រាម៉ូឌី ចាប់ផ្តើមដំណើរទស្សនកិច្ចទៅកាន់ប្រទេសអាហ្វ្រិកចំនួន ៤ដើម្បីពង្រឹងចំណងការទូតនិងកិច្ចសហប្រតិបត្តិការសេដ្ឋកិច្ចជាមួយទ្វីបអាហ្វ្រិក។មហាយក្សអាស៊ីខាងត្បូងឥណ្ឌានេះហាក់ដូចជាកំពុងពង្រឹងឥទ្ធិពលរបស់ខ្លួនដើម្បីប្រជែងឥទ្ធិពលមហាយក្សចិនដែលមានឥទ្ធិពលគ្របដណ្តប់អាហ្វ្រិកទៅហើយនោះ។
សូមស្ដាប់ព័ត៌មានលម្អិត៖
ទស្សនកិច្ចផ្លូវរដ្ឋទៅកាន់ប្រទេស៤នៅទ្វីបអាហ្វ្រិករបស់ប្រមុខរដ្ឋាភិបាលឥណ្ឌាលោក នារិន្ទ្រាម៉ូឌី ចាប់ផ្តើមឡើងនៅថ្ងៃព្រហស្បតិ៍ទី៧ កក្កដា។ វត្តមានប្រមុខរដ្ឋាភិបាលមហាយក្សអាស៊ីខាងត្បូងនៅលើទឹកដីអាហ្វ្រិកនេះបញ្ជាក់ច្បាស់ថា ឥណ្ឌាចាប់ផ្តើមពង្រីកឥទ្ធិពលរបស់ខ្លួនទៅកាន់អាហ្វ្រិកដើម្បីប្រជែងចិនហើយនៅពេលនេះ។
យោងតាមទីភ្នាក់ងារព័ត៌មាន AFP លោក នារិន្ទ្រាម៉ួឌី ចាប់ផ្តើមទស្សនកិច្ចរបស់លោកដោយអញ្ជើញទៅប្រទេសម៉ូសំប៊ិក មុនបន្តទៅប្រទេសផ្សេងទៀតដូចជាអាហ្វ្រិកខាងត្បូង តង់ហ្សានី និងកេនយ៉ា។ ទស្សនកិច្ចនេះមានគោលដៅសំខាន់ផ្តោតលើការពង្រឹងកិច្ចសហប្រតិបត្តិការលើវិស័យកសិកម្ម សន្តិសុខសមុទ្រ ពាណិជ្ជកម្ម និងវិនិយោគ សន្តិសុខស្បៀង ជាដើម។
លោក នារិន្ទ្រា ម៉ូឌី បានក្លាយជានាយករដ្ឋមន្ត្រីឥណ្ឌាដំបូងបំផុតដែលទៅទស្សនកិច្ចនៅប្រទេសម៉ូសំប៊ិក ក្នុងរយៈពេលជាង ៣ទស្សវត្សរ៍កន្លងមកនេះ។ ពេលអញ្ជើញទៅដល់ប្រទេសម៉ូសំប៊ិក លោក នារិន្ទ្រាម៉ូឌី បានអះអាងថា ម៉ូសំប៊ិកនេះជា «មិត្តគួរឲ្យទុកចិត្ត»របស់ឥណ្ឌា ហើយនាយករដ្ឋមន្ត្រីរូបនេះបានបញ្ជាក់ដែរថា ឥណ្ឌាចង់ឃើញការលូតលាស់របស់ប្រទេសម៉ូសំប៊ិកផងដែរ។ អ្វីដែលគួរឲ្យកត់សម្គាល់នោះ មេដឹកនាំប្រទេសទាំងពីរបានប្រកាសបង្កើតកិច្ចព្រមព្រៀងពង្រឹងកិច្ចសហប្រតិបត្តិការទ្វេភាគីជាច្រើនផងដែរ ក្នុងពេលដែលលោកជួបពិភាក្សាជាមួយប្រធានាធិបតី Filipe Nyusi ។
ក្រោយបញ្ចប់ទស្សនកិច្ចនៅប្រទេសម៉ូសំប៊ិក លោក នារិន្ទ្រាម៉ូឌី បន្តដំណើរទៅកាន់អាហ្វ្រិកខាងត្បូងទៀត។ នៅអាហ្វ្រិកខាងត្បូង គេឃើញមានប្រជាជនឥណ្ឌារស់នៅប្រហែល ១.៣ លាននាក់ឯណោះ។ នាយករដ្ឋមន្ត្រីឥណ្ឌានឹងជួបពិភាក្សាជាមួយប្រធានាធិបតីអាហ្វ្រិកខាងត្បូងលោក Jacob Zuma ផងដែរ ដោយកិច្ចពិភាក្សាផ្តោតលើបញ្ហាសំខាន់ជាច្រើនជាពិសេសកិច្ចសហប្រតិបត្តិការសេដ្ឋកិច្ច និងពាណិជ្ជកម្ម រួមទាំងបញ្ហាសាកលដូចជា បញ្ហាសន្តិសុខ និងការកំណែទម្រង់ក្រុមប្រឹក្សាសន្តិសុខអង្គការសប្រជាជាតិផងដែរ។
តាមពិតទៅ ឥណ្ឌា កំពុងប្រឹងប្រែងពង្រឹងឥទ្ធិពល និងតួនាទីរបស់ខ្លួននៅក្នុងតំបន់អាហ្វ្រិក ដូចចិនដែលជាម្ចាស់ជំនួយដ៏មានឥទ្ធិពលរបស់រដ្ឋអាហ្វ្រិកដែរ។ អាចថា ឥណ្ឌាចង់ពង្រឹងឥទ្ធិពលរបស់ខ្លួនដើម្បីកាត់បន្ថយឥទ្ធិពលរបស់ចិន ដោយឥណ្ឌានឹងស្វះស្វែងលើកស្ទួយទំនាក់ទំនងពាណិជ្ជកម្មនិងបង្កើនការវិនិយោគនៅអាហ្វ្រិក។ ពាក់ព័ន្ធបញ្ហាសេដ្ឋកិច្ច ទំហំពាណិជ្ជកម្មរវាងឥណ្ឌានិងប្រទេសអាហ្វ្រិកកើនឡើងដល់ ២០០ពាន់លានដុល្លារអាមេរិកគិតត្រឹមឆ្នាំ២០១៥។ ហើយទាក់ទងបញ្ហានយោបាយ និងទំនាក់ទំនងរវាងរដ្ឋាភិបាលនិងរដ្ឋាភិបាល កាលពីឆ្នាំមុន ឥណ្ឌាបានសម្រេចរៀបចំសន្និសីទកំពូលប្រមុខរដ្ឋអាហ្វ្រិកនៅទីក្រុង ញ៉ូដេលីផងដែរ ដោយកិច្ចប្រជុំផ្តោតសំខាន់លើកិច្ចសហប្រតិបត្តិការរវាងឥណ្ឌានិងអាហ្វ្រិក និងការកសាងទំនុកចិត្តនយោបាយជាដើម។
ប៉ុន្តែថ្វីបើឥណ្ឌាមានទំនាក់ទំនងពាណិជ្ជកម្មនិងកិច្ចសហប្រតិបត្តិការល្អជាមួយបណ្តារដ្ឋអាហ្វ្រិកក៏ដោយ បញ្ហាមួយចំនួនបានកើតឡើងបណ្តាលឲ្យទំនាក់ទំនងនេះល្អក់ករកផងដែរ។ នោះគឺការផ្ទុះឡើងនៅការស្អប់ខ្ពើមប្រជាជអាហ្វ្រិករហូតដល់មានការប្រើប្រាស់ហិង្សាប្រឆាំងជនជាតិអាហ្វ្រិកក្នុងប្រទេសឥណ្ឌាថែមទៀតផង៕
© រក្សាសិទ្ធិដោយ thmeythmey.com