អន្តរជាតិ
ចិន មិនឲ្យលោក គីម ជុងអ៊ុន ឯកាឡើយ
× ទណ្ឌកម្មឯកតោភាគីប្រឆាំងមេដឹកនាំកំពូលកូរ៉េខាងជើង លោក គីម ជុងអ៊ុន របស់រដ្ឋាភិបាលក្រុងវ៉ាស៊ីនតោន បានធ្វើឲ្យរដ្ឋាភិបាលក្រុងព្យុងយ៉ាង ខឹងសម្បារជាខ្លាំង និងថែមទាំងហៅចំណាត់ការនោះ ថាជាការប្រកាសសង្គ្រាមទៀតផង។ រដ្ឋបងប្អូន និងជាអ្នកជិតខាង កូរ៉េខាងត្បូង បានសាទរចំពោះការដាក់សម្ពាធមួយនេះ ខណៈចិន មើលឃើញថាជាសកម្មភាពមិនសមគួរ។
រដ្ឋាភិបាលក្រុងវ៉ាស៊ីនតោន នៅថ្ងៃទី០៦ ខែកក្កដា កន្លងទៅថ្មីៗនេះ បានប្រកាសទណ្ឌកម្មជាឯកតោភាគីទៅលើបុគ្គលសំខាន់២៣រូប ដែលក្នុងនោះ ក៏រាប់បញ្ចូលទាំងប្រធានាធិបតីកូរ៉េខាងជើង លោក គីម ជុងអ៊ុន។ តាមការអះអាងរបស់មន្ត្រីជាន់ខ្ពស់រដ្ឋបាលក្រសួងការបរទេសអាមេរិក ទណ្ឌកម្មលើលោក គីម ជុងអ៊ុន ដោយសារលោកគឺជាអ្នកទទួលខុសត្រូវក្នុងរបបដឹកនាំដែលមានការសម្លាប់ក្រៅប្រព័ន្ធតុលាការ ការចាប់ខ្លួន និងឃុំខ្លួនខុសច្បាប់ និងការធ្វើទារុណ្ឌកម្មជាដើម។
ភ្លាមៗនោះ ក្រសួងការបរទេសកូរ៉េខាងជើង បានចេញសេចក្តីថ្លែងការណ៍មួយ ដែលចុះផ្សាយដោយភ្នាក់ងារព័ត៌មានជាតិកូរ៉េខាងជើង KCNA ដោយបានបញ្ជាក់ថា «អាមេរិក ហ៊ានប្រមាថចំពោះកិត្តិនាមរបស់មេដឹកនាំកំពូលកូរ៉េខាងជើង ដែលសកម្មភាពនេះ ប្រៀបប្រដូចទៅនឹងកូនឆ្កែដែលមិនខ្លាចខ្លាដូច្នេះឯង»។ ក្រសួង ក៏បានបញ្ជាក់ផងដែរថាការធ្វើបែបនេះ គឺជារឿងមួយដ៏ផុយស្រួយបំផុត និងជាការប្រកាសសង្គ្រាមយ៉ាងចំហរប្រឆាំងកូរ៉េខាងជើង ដែលនេះ គឺវាបានចាកឆ្ងាយពីបញ្ហាសិទ្ធិមនុស្សទៅទៀត។
អ្វីគួរកត់សម្គាល់នោះ ក្រោយការប្រកាសនេះមួយថ្ងៃ រដ្ឋាភិបាលក្រុងសេអ៊ូល បានចេញសេចក្តីថ្លែងការណ៍ដោយបានសាទរចំពោះចំណាត់ការរបស់ក្រុងវ៉ាស៊ីនតោនក្នុងការដាក់សម្ពាធក្រុងព្យុងយ៉ាង។ អ្នកនាំពាក្យក្រសួងការបរទេសកូរ៉េខាងត្បូង បានថ្លែងថា វា ពិតជាសំខាន់ណាស់ក្នុងការដាក់សម្ពាធលើក្រុងព្យុងយ៉ាងដើម្បីផ្លាស់ប្តូរគោលជំហរ និងងាកមករកការចរចាវិញ។
ដោយឡែកសម្រាប់ក្រុងប៉េកាំង បើទោះបីជានៅរយៈពេលចុងក្រោយនេះ ហាក់ដូចជាមិនសូវមានភាពស្និទ្ធស្នាលជាមួយគ្នាក៏ដោយ ក្រុងប៉េកាំង មិនដែលបោះបង់ឲ្យក្រុងព្យុងយ៉ាងរងគំនាបផ្ទួនៗនោះទេ។ការមិនអាចជិតស្និទ្ធរវាងភាគីទាំងពីរនោះគឺ ក្រុងព្យុងយ៉ាងមិនសូវស្តាប់ការណែនាំរបស់ក្រុងប៉េកាំង លើសកម្មភាពនៃការសាកល្បងបាញ់មីស៊ីលជាបន្តបន្ទាប់។
អ្នកនាំពាក្យក្រសួងការបរទេសចិន លោក ហុង ឡី នៅថ្ងៃទី០៧ ខែកក្កដា ម្សិលមិញ បានអះអាងថាបញ្ហាសិទ្ធិមនុស្ស គួរតែដោះស្រាយតាមកិច្ចសន្ទនាបែបស្ថាបនា និងកិច្ចសហប្រតិបត្តិការដោយឈរលើគោលការណ៍សមភាព និងការគោរពគ្នាទៅវិញទៅមក។ លើសពីនេះទៅទៀត លោក ក៏បានជំទាស់លើការដាក់សម្ពាធជាលក្ខណៈសាធារណៈ ការប្រឈមមុខគ្នា ការប្រើប្រាស់ដំណោះស្រាយចុងក្រោយតាមរយៈទណ្ឌកម្មឯកតោភាគីប្រឆាំងប្រទេសដទៃដោយផ្អែកតាមច្បាប់ក្នុងស្រុករបស់ខ្លួន និងបំផ្លាញភាពស្របច្បាប់ និងផលប្រយោជន៍ប្រទេសដទៃផងដែរ។
អ្នកនាំពាក្យរូបនោះ ក៏បានអះអាងថា ស្ថានភាពឧបទ្វីបកូរ៉េបច្ចុប្បន្ន គឺជាមានលក្ខណៈស្មុគស្មាញ និងរសើបខ្លាំង ដូច្នេះ ភាគីពាក់ព័ន្ធគួរតែចៀសវាងការបង្កើតសកម្មភាពបង្កហេតុដែលអាចបញ្ឆេះភាពតានតឹង និងធ្វើសកម្មភាពឲ្យកាន់តែច្រើនដើម្បីបង្កើតសន្តិភាព និងស្ថិរភាពនៅក្នុងឧបទ្វីបកូរ៉េ៕
© រក្សាសិទ្ធិដោយ thmeythmey.com