អាមេរិកផ្តល់ជំនួយមនុស្សធម៌បន្ថែម២៣លានដុល្លារទៅឲ្យប្រទេសអ៊ុយក្រែន

អន្តរជាតិ

នយោបាយអន្តរជាតិ

អាមេរិកផ្តល់ជំនួយមនុស្សធម៌បន្ថែម២៣លានដុល្លារទៅឲ្យប្រទេសអ៊ុយក្រែន

09, Jul 2016 , 7:10 am

រូបភាព

ដោយ: VOA

សហរដ្ឋអាមេរិកនឹងផ្តល់ប្រាក់បន្ថែមចំនួន២៣លានដុល្លារដែលជាជំនួយមនុស្សធម៌ដល់ប្រទេសអ៊ុយក្រែនដើម្បីជួយប្រទេសនេះដោះស្រាយវិបត្តិនៅក្នុងតំបន់ភាគខាងកើតរបស់ខ្លួន។

លោក John Kerry រដ្ឋមន្ត្រីការបរទេសសហរដ្ឋអាមេរិក បានប្រកាសកម្មវិធីជំនួយថ្មីនេះនៅក្នុងក្រុង Kyiv កាលពីថ្ងៃព្រហស្បតិ៍ដែលនៅទីនោះលោក បានជួបជាមួយក្រុមមន្ត្រីកំពូល រួមមានប្រធានាធិបតី Petro Poroshenko និងលោក Volodymyr Groysman នាយករដ្ឋមន្ត្រីដើម្បីពិភាក្សាកំណែទម្រង់របស់ប្រទេសអ៊ុយក្រែនហើយនឹងភាពផុយស្រួយនៃការឈប់បាញ់គ្នានៅក្នុងតំបន់ភាគខាងកើតនៃប្រទេសអ៊ុយក្រែន។

ជំនួយមនុស្សធម៌របស់សហរដ្ឋអាមេរិកដល់ប្រទេសអ៊ុយក្រែនចាប់តាំងពីការចាប់ផ្តើមមានវិបត្តិមកឥឡូវនេះមានចំនួនសរុបទាំងអស់១៣៥លានដុល្លារ។

ថវិកាទាំងនោះ នឹងគាំទ្រទីភ្នាក់ងារទទួលបន្ទុកជនភៀសខ្លួនរបស់អង្គការសហប្រជាជាតិ (UNHCR) និងអង្គការមនុស្សធម៌ផ្សេងៗទៀតដើម្បីផ្តល់សេចក្តីត្រូវការសំខាន់ៗដល់មនុស្សរាប់ពាន់នាក់ដែលរងផលប៉ះពាល់ដោយជម្លោះដែលកំពុងកើតមានឡើងរវាងកងទ័ពរដ្ឋាភិបាលនៃប្រទេសអ៊ុយក្រែន និងពួកទាមទារបំបែករដ្ឋដែលគាំទ្រដោយរុស្ស៊ីនៅក្នុងតំបន់ Donetskនិង Luhansk នៅផ្នែកខាងកើតនៃប្រទេសអ៊ុយក្រែន។

យោងតាមអង្គការសហប្រជាជាតិ បានប្រាប់ឲ្យដឹងថា មានមនុស្សងាយទទួលរងគ្រោះជាង១លាន៣សែននាក់នៅក្នុងប្រទេសអ៊ុយក្រែន រួមមានកុមារ ជនពិការនិងចាស់ជរាជាច្រើន។

ថ្លែងទៅកាន់ពួកអ្នកយកព័ត៌មាននៅក្នុងរដ្ឋធានី Kyiv លោករដ្ឋមន្ត្រីការបរទេសអាមេរិកាំង បានមានប្រសាសន៍ថា មានភាពចាំបាច់ជាបន្ទាន់ដើម្បីអនុវត្តឲ្យបានពេញលេញនូវកិច្ចព្រមព្រៀងទីក្រុងមីនស្កិ៍ (Minsk) ដើម្បីបញ្ចប់នៅផ្នែកខាងកើតនៃប្រទេសអ៊ុយក្រែន៕

ដោយ VOA News

សណ្ដែកកួរ ឡើងដល់៤ម៉ឺនរៀល ក្នុងមួយគីឡូក្រាម

6 ថ្ងៃ

«ប្រទានកម្ម»មានន័យដូចម្តេច?

10 ម៉ោង

«ប្រសប់»និង«ប្រសព្វ» មានសូរសព្ទដូចគ្នា តែន័យខុសគ្នា!

1 សប្តាហ៍

តើពេលណាដែលគេសរសេរ«បរិបូរ, បរិបូណ៌ និង បរិបូរណ៍»នៅក្នុងសំណេរភាសាខ្មែរ?

1 ថ្ងៃ

«រឭក»,«រំឮក»,«រំលឹក» និង«រម្លឹក» ពាក្យណាត្រឹមត្រូវ?

2 ថ្ងៃ

អត្ថបទពេញនិយមបន្ថែម