អន្តរជាតិ
នយោបាយអន្តរជាតិ
ណាតូនឹងពង្រាយទ័ព ៤ វរសេនាតូចទៅការពាររដ្ឋបាល់ទិក និង កំញើញរុស្ស៊ី
×![]()
បក្សសម្ព័ន្ធយោធាណាតូបានសម្រេចបញ្ជូនកងទ័ពរបស់ខ្លួនចំនួន៤ វរសេនាតូចទៅកាន់អឺរ៉ុបខាងកើតដើម្បីការពាររដ្ឋបាល់ទិកចំនួន ៤ពីការគំរាមកំហែងរបស់រុស្ស៊ី។ សហរដ្ឋអាមេរិក អង់គ្លេស កាណាដា អាល្លឺម៉ង់សុទ្ធតែប្រកាសបញ្ជូនទ័ពរៀងខ្លូនតាមលទ្ធភាពរបស់ខ្លូន។ អាមេរិក ប្រកាសថា ខ្លួននឹងពង្រាយកងទ័ព ១០០០នាក់ទៅកាន់ប្រទេសប៉ូឡូញ។ 
ក្នុងកិច្ចប្រជុំកំពូលអង្គការណាតូ នៅប្រទេសប៉ូឡូញ អគ្គលេខាធិកាអង្គការណាតូលោក Jens Stoltenbergបានប្រកាសថា ណាតូនឹងបញ្ជូនកងទ័ពរបស់ខ្លូនចំនួន ៤វវសេនាតូចទៅកាន់ប្រទេសប៉ូឡូញ និងប្រទេស៣ផ្សេងទៀតនៅតំបន់បាល់ទិក។ លោកបានបញ្ជាក់ថា សហរដ្ឋអាមេរិកនឹងពង្រាយទ័ពទៅប៉ូឡូញ, កាណាតូ បញ្ជូនទ័ពប្រទេស Latvia, អាល្លឺម៉ង់បញ្ជូនទ័ពទៅ Lithuania និង អង់គ្លេសបញ្ជូនទ័ពទៅកាន់ប្រទេស Estonia ចាប់ពីឆ្នាំក្រោយទៅ។
ប្រធានាធិបតីបារ៉ាក់ អូបាម៉ា ដែលកំពុងស្ថិតនៅក្នុងកិច្ចប្រជុំកំពូលណាតូនៅប៉ូឡូញដែរនោះ បានបញ្ជាក់ថា សហរដ្ឋអាមេរិកនឹងបញ្ជូនទ័ពរបស់ខ្លួន ១០០០នាក់ទៅកាន់ប្រទេសប៉ូឡូញ។ ទ័ពអាមេរិក១០០០នាក់នេះត្រូវពង្រាយទៅប្រទេសប៉ូឡូញជាផ្នែកមួយនៃផែនការរបស់បក្សសម្ព័ន្ធណាតូក្នុងការការពារអតីតរដ្ឋសហភាពសូវៀត និងកំញើញរុស្ស៊ីថែមទៀតផង។
ក្រៅពីកងទ័ព សហរដ្ឋអាមេរិកក៏ប្តេជ្ញាថា នឹងផ្តល់ធនធានសម្រាប់បម្រើលើវិស័យយោធា ៣.៤ពាន់លានដុល្លារទៅអឺរ៉ុបផងដែរ។ ទាក់ទិនការបញ្ជូនទ័ពអាមេរិកនេះ លោកបារ៉ាក់ អូបាម៉ា បានពន្យល់ថា កងទ័ពនេះនឹងធ្វើការងារប្រកៀកស្មារជាមួយទាហានប៉ូឡូញ ហើយពួកគេនឹងមានតួនាទីចម្បងជួយផ្តល់ប្រឹក្សានិងផ្តល់ការហ្វឹកហ្វឺនថែមទៀតផង។ យ៉ាងណាក៏ដោយលោក បារ៉ាក់ អូបាម៉ា មិនបានប្រកាសប្រាប់ថា កងទ័ពទាំងនោះ នឹងត្រូវបញ្ជូនទៅតំបន់ណាមួយឡើយ។
ចំណែក កាណាដា អាល្លឺម៉ង់ និងអង់គ្លេសក៏បានប្តេជ្ញាបញ្ជូនទ័ពទៅកាន់អឺរ៉ុបខាងកើតតាមលទ្ធភាពរបស់ខ្លួនផងដែរ។អង់គ្លេស ថ្វីបើកំពុងរៀបចំគម្រោងចាកចេញពីសហភាពអឺរ៉ុបក្តី ប្រទេសនេះនៅតែប្រកាសថា ខ្លួននៅតែប្រឹងប្រែងការពារអឺរ៉ុបដដែល ហើយអង់គ្លេសនឹងបញ្ជូនទ័ព ៦៥០ នាក់ ទៅកាន់អឺរ៉ុបខាងកើតផងដែរ។
ការពង្រឹងកម្លាំងណាតូនៅអឺរ៉ុបខាងកើតនេះ ត្រូវបានគេចាត់ទុកថា ជាការឆ្លើយតបចំពោះសកម្មភាពរុស្ស៊ីនៅក្នុងប្រទេសអ៊ុយក្រែន ក៏ដូចជាដើម្បីកំញើញប្រទេសនេះកុំឲ្យបន្តគំរាមកំហែងប្រទេសតូចតាចជាពិសេសអតីតរដ្ឋសហភាពសូវៀតទៀត។ ក្រៅពីពង្រាយកងទ័ព អាមេរិកក៏បានដំឡើងខែលការពារមីស៊ីលនៅក្នុងប្រទេសប៉ូឡូញដែរ ហើយសកម្មភាពនេះបានបង្កឲ្យរុស្ស៊ីខឹងសម្បារជាខ្លាំង ហើយក៏ព្រមានតបតវិញដែរព្រោះការអត់ធ្មត់របស់រុស្ស៊ីក៏មានកំណត់ដែរ។
ការបន្តពង្រឹងសមត្ថភាពទ័ពរៀងខ្លូនរបស់រុស្ស៊ីនិងណាតូ កំពុងក្លាយជាក្តីបារម្ភខ្លាំង។ ហើយវាយតម្លៃថា ការប្រណាំងប្រជែងសព្វាវុធនិងពង្រឹងកម្លាំងរៀងខ្លួននេះកំពុងអូសឲ្យភាគីធ្លាក់ចូលក្នុងសង្គ្រាមត្រជាក់ជាថ្មីថែមទៀតផង៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
5 ម៉ោង
