អន្តរជាតិ
Malia កូនស្រីលោក អូបាម៉ា ទៅចុះកម្មសិក្សានៅស្ថានទូតអាមេរិកនៅអេស្ប៉ាញ
×
នៅប៉ុន្មានសប្ដាហ៍ខាងមុខ កូនស្រីច្បងប្រធានាធិបតីអាមេរិក បារ៉ាក់ អូបាម៉ា គឺ Malia នឹងចាកចេញពីគេហដ្ឋាននៅ Pennsylvania Avenue ទៅកាន់ទឹកដីអេស្ប៉ាញ ដើម្បីហាត់ការងារនៅស្ថានទូតអាមេរិក ប្រចាំក្រុងម៉ាឌ្រីដ។ នេះបើយោងតាមការផ្សាយរបស់សារព័ត៌មានអេស្ប៉ាញ ABC។
Malia ដែលទើបតែអាយុ១៨ឆ្នាំ នឹងត្រូវបែកពីឪពុកគឺលោក បារ៉ាក់ អូបាម៉ា ដើម្បីធ្វើដំណើរទៅកាន់អេស្ប៉ាញ។ Malia មានគម្រោងចុះកម្មសិក្សារដូវក្ដៅនៅស្ថានទូតអាមេរិក។ នេះក៏ដោយសារតែលោកប្រធានាធិបតី អូបាម៉ា និងអគ្គរដ្ឋទូតអាមេរិក ប្រចាំក្រុងម៉ាឌ្រីដ មានទំនាក់ទំនងល្អនឹងគ្នា។
កូនស្រីប្រធានាធិបតីរូបនេះ ត្រូវគេរាយការណ៍ថា បន្ទាប់ពីបញ្ចប់ការសិក្សា Sidwell Friends នាងអាចឈប់សម្រាកមួយរយៈសិន នៅមុនពេលចាប់ផ្ដើមឆ្នាំសិក្សាថ្មី នៅសកលវិទ្យាល័យ Harvard នៅរដូវស្លឹកឈើជ្រុះឆ្នាំ២០១៧។ នេះមានន័យថា នាងមានពេលក្នុងការចុះកម្មសិក្សាបាន។
តាមធម្មតា ស្ថានទូតអាមេរិក តែងតែទទួលអ្នកចុះកម្មសិក្សា ជាពិសេសអ្នកដែលទើបបញ្ចប់ការសិក្សាថ្មី។ បើតាមសារព័ត៌មាន ABC ការសម្រេចចិត្តធ្វើការនៅអេស្ប៉ាញ ទំនងជាបណ្ដាលមកពីមិត្តភាពរវាងលោក អូបាម៉ា និងទូតអាមេរិកប្រចាំអេស្ប៉ាញលោក James Costos និងដៃគូរបស់លោក Michael S. Smith។
សូមបញ្ជាក់ថា លោក Costos ជាអ្នកឧបត្ថម្ភដ៏ធំមួយរបស់លោក អូបាម៉ា ក្នុងយុទ្ធនាការបោះឆ្នោតក្នុងឆ្នាំ២០១២។ នៅមុនពេលធ្វើជាទូត លោក Costos ជាប្រធានប្រតិបត្តិក្នុងឧស្សាហកម្មលក់រាយ និងការកំសាន្ត ចំណែកលោក Smith គឺជាអ្នករចនាម៉ូតបន្ទប់ក្នុងសេតវិមាន។
មួយវិញទៀតនោះ Malia ជ្រើសរើសអេស្ប៉ាញ ព្រោះកម្រិតភាសាអេស្ប៉ាញរបស់នាង ក៏ប្រើបានគួរសមផងដែរ។ បើគេចាំមិនភ្លេច ក្នុងទស្សនកិច្ចររបស់លោក អូបាម៉ា ទៅកាន់គុយបាក្នុងខែមីនា Malia គឺជាអ្នកបកប្រែមិនផ្លូវការរបស់ឪពុកនាងផងដែរ។ Malia អាចនឹងចាប់ផ្ដើមការងារនៅទីក្រុងម៉ាឌ្រីដ បន្ទាប់ពីលោក អូបាម៉ា បញ្ចប់ទស្សនកិច្ចនៅអេស្ប៉ាញ ចាប់ពីថ្ងៃទី៩ ដល់ថ្ងៃទី១១ ខែកក្កដាខាងមុខ៕
Tag:
Malia Obama
អាមេរិក
© រក្សាសិទ្ធិដោយ thmeythmey.com