អន្តរជាតិ
នយោបាយអន្តរជាតិ
អូបាម៉ាប្រញាប់ទៅ Dallas ក្រោយខ្មាន់កាំភ្លើងសម្លាប់ ប៉ូលិស៥នាក់
× ប្រធានាធិបតីបារ៉ាក់ អូបាម៉ា សម្រេចបញ្ចប់ទស្សនកិច្ចនៅអឺរ៉ុបនៅថ្ងៃអាទិត្យដើម្បីទៅកាន់ក្រុង Dallas នៃរដ្ឋតិចសាសវិញ។ ការផ្លាស់ប្តូរកាលវិភាគទស្សកិច្ចក្រៅប្រទេសនេះធ្វើឡើង ក្រោយខ្មាន់ស្បែកខ្មៅម្នាក់សម្លាប់មន្ត្រីប៉ូលិស៥នាក់។ ហើយវាបង្កឲ្យបញ្ហាខ្វែងគំនិតគ្នារឿងពូជសាសន៍និងពណ៌សម្បុរស្បែកកាន់តែចម្រូងចម្រាសខ្លាំង។
តាមកាលវិភាគ លោកបារ៉ាក់ អូបាម៉ា ត្រូវចាកចេញពីកិច្ចប្រជុំណាតូនៅប៉ូឡូញថ្ងៃ ចន្ទ ប៉ុន្តែដោយសារបញ្ហាចលាចលនៅក្រុង Dallas ប្រធានាធិបតីរូបនេះត្រូវផ្លាស់ប្តូរកាលវិភាគដោយត្រូវចាកចេញមកវិញថ្ងៃអាទិត្យវិញ។
នៅដើម្បីសប្តាហ៍ ក្រោយប្រធានាធិបតីជិតផុតអាណត្តិនេះទៅទស្សនកិច្ចនៅក្រុង Dallas នៃរដ្ឋតិចសាស ជាទីកន្លែងដែលមន្ត្រីប៉ូលីស៥នាក់បានស្លាប់ដោយស្នាដៃខ្មាន់កាំភ្លើងម្នាក់ជាជនស្បែកខ្មៅ។ ខណៈដែលលោកកំពុងស្ថិតនៅប្រទេសប៉ូឡូញ លោកបារ៉ាក់ អូបាម៉ា បានបញ្ជាឲ្យមន្ត្រីសេតវិមានទម្លាក់ទង់ជាតិពាក់កណ្តាលដង ដើម្បីកាន់ទុក្ខប្រាំថ្ងៃជនជាខ្មាន់កាំភ្លើងជាអតីតយុទ្ធជនមានឈ្មោះ Micah Johnson មានវ័យ ២៥ឆ្នាំ។ បើយោងតាមទីភ្នាក់ងារព័ត៌មាន AFP ជនជាខ្មាន់កាំភ្លើងនេះបានថ្លែងមុនពេលស្លាប់ដោយប៉ះទង្គិចជាមួយប៉ូលិសថា គេចង់សម្លាប់ប៉ូលិសស្បែកស ដើម្បីសងសឹកចំពោះការបាញ់ប្រហារលើជនស្បែកខ្មៅពីររូបកាលពីថ្មីៗនេះនោះ។
យ៉ាងណាមិញ ការបាញ់ប្រហារនេះបានបង្កឲ្យមានការបែកបាក់គ្នាខ្លាំងរវាងប្រជាជនស្បែកស និងប្រជាជនស្បែកខ្មៅ។អ្នកនយោបាយឱកាសនិយមអាមេរិកមួយចំនួនបានព្យាយាមលាបពណ៌ពូជសាសន៍និងពណ៌សម្បុរខ្មៅស ដើម្បីកេងចំណេញនយោបាយនិងបណ្តុះគំនិតស្អប់ខ្ពើមជាដើម។
យ៉ាងណាក៏ដោយ សេតវិមានបានប្រកាសថាជនជាខ្មាន់កាំភ្លើងនេះគ្មានទំនាក់ទំនងអ្វីជាមួយក្រុមភេរវជនឡើយ ទោះមានការអះអាងថា ជននេះមានចំណងទំនាក់ទំនងជាមួយចលនាសកម្មជនស្បែកខ្មៅជ្រុលនិយមក៏ដោយ។ ចំណែកប៉ូលិសអះអាងថា ជនជាខ្មាន់កាំភ្លើងមានធ្លាប់មានជាប់បទពិរុទ្ធអ្វីកន្លងមកទេ ប៉ុន្តែគេបានរកឃើញសម្ភារៈផលិតគ្រាប់បែកនៅក្នុងផ្ទះជនខាងលើនេះដែរ។
ភាពតានតឹងនិងការស្អប់ខ្ពើមរវាងប្រជាជនស្បែកស និងស្បែកខ្មៅនោះនៅតែជាបញ្ហាធំនៅក្នុងសង្គមអាមេរិក។ ក្រោយមានការបាញ់ប្រហារលើប៉ូលិស មេដឹកនាំបាតុករនៃចលនាក្រុម Black Lives Matters បានថ្កោលទោសហិង្សាប្រដាប់អាវុធនៅក្រុង Dallas នេះប៉ុន្តែពួកគេបានអះអាងថាគេនៅបន្តរក្សាសិទ្ធិជួបជុំគ្នានៅចុងសប្តាហ៍នេះនៅតំបន់សំខាន់ៗមួយចំនួន។តាមពិតទៅ ប្រជាជនស្បែកខ្មៅទាំងនោះតស៊ូមតិដើម្បីបញ្ចប់ការរើសអើងក្នុងការអនុវត្តច្បាប់ក្នុងសង្គមអាមេរិកនិងបញ្ហាប្រឈមផ្សេងទៀត៕
© រក្សាសិទ្ធិដោយ thmeythmey.com