អន្តរជាតិ
អ្នករត់តាក់ស៊ីម្នាក់រើសបានជាង១៨ម៉ឺនដុល្លារ ម្ចាស់លុយឲ្យរង្វាន់តែ១០០ដុល្លារ
×
អ្នកបើកបរតាក់ស៊ីម្នាក់នៅទីក្រុងប៊ូស្តុន រដ្ឋម៉ាសាឆូសសេត សហរដ្ឋអាមេរិក ខកចិត្តយ៉ាងខ្លាំងចំពោះប្រាក់រង្វាន់ ១០០ ដុល្លារដែលគាត់បានទទួល សម្រាប់ការយកប្រាក់ចំនួន ១៨៧ ០០០ ដុល្លារទៅប្រគល់ជូនម្ចាស់ដើម។ គាត់សង្ឃឹមថា យ៉ាងហោចណាស់ ក៏បានទទួលប្រាក់រង្វាន់ ៥០០ ឬ ១ ០០០ ដុល្លារ ឬមួយផ្នែកនៃកញ្ចប់ប្រាក់នោះដែរ។ តែក្តីសង្ឃឹមត្រូវរលាយដូចផ្សែង។
លោក Mac Causland អាយុ ៧២ ឆ្នាំបានបើកឡានជូនបុរសអនាថាម្នាក់ទៅកាន់សណ្ឋាគារមួយ។ ក្រោយពីបុរសរូបនោះចុះពីរថយន្ត អ្នកបើកតាក់ស៊ីរូបនេះក៏ប្រទះឃើញកាបូបមួយនៅលើអង្គុយខាងក្រោយ។ នៅពេលបើកកាបូប គាត់ភ្ញាក់ផ្អើលយ៉ាងខ្លាំងដោយឃើញក្រដាសប្រាក់យ៉ាងច្រើននៅខាងក្នុង។ គាត់មិនដែលឃើញលុយច្រើនយ៉ាងនេះទេ។ គាត់ចង់យកលុយទាំងនោះទៅទុកនៅផ្ទះរបស់គាត់ តែខ្លាចក្រែងថា បុរសនោះជាមនុស្សគ្រោះថ្នាក់។ នៅទីបំផុត គាត់សម្រេចចិត្តយកកាបូបលុយនោះទៅប្រគល់ឲ្យប៉ូលិស។
បន្ទាប់ពីប្រគល់លុយរួច បុរសដែលជាម្ចាស់លុយបានឲ្យប្រាក់រង្វាន់លោកតាបើកតាក់ស៊ីតែ ១០០ ដុល្លារប៉ុណ្ណោះ។ រួចបុរសនោះបានពឹងពាក់លោកតាឲ្យជូនទៅសណ្ឋាគារវិញ។ ម្តងនេះ លោកតាបើកតាក់ស៊ីលួចបន់ស្រន់សូមឲ្យបុរសរូបនោះភ្លេចកាបូបលុយជាលើកទីពីរ។ ប៉ុន្តែ វាមិនអាចមានរឿងល្អបែបនេះកើតឡើងផ្ទួនៗទេ៕
ប្រភព៖ Daily News
© រក្សាសិទ្ធិដោយ thmeythmey.com