ហ្កំប៊ី ហាមឃាត់ការរៀបការជាមួយក្មេងមិនគ្រប់អាយុ

អន្តរជាតិ

ហ្កំប៊ី ហាមឃាត់ការរៀបការជាមួយក្មេងមិនគ្រប់អាយុ

10, Jul 2016 , 7:39 pm

រូបភាព

ដោយ: តន ចាន់រិទ្ធារ៉ា

រដ្ឋអាហ្វ្រិកហ្កំប៊ី បានចេញសេចក្ដីប្រកាសហាមឃាត់ការរៀបការជាមួយក្មេងមិនគ្រប់អាយុ ដោយនឹងដាក់ទោសយ៉ាងធ្ងន់ធ្ងរលើអ្នកណាដែលល្មើស ឬជាប់ពាក់ព័ន្ធនឹងការរៀបការនេះ ដោយរួមទាំងឪពុកម្ដាយរបស់ក្មេងស្រីផងដែរ។ រដ្ឋាភិបាលប្រទេសដែលមានជនមូស្លីមភាគច្រើននេះ ប្រកាសដែរថា ការរៀបការបែបនេះ មិនមានក្នុងសាសនាឥស្លាមទេ។

ប្រធានាធិបតីហ្កំប៊ី លោក Yahya Jammeh បានប្រកាសថា នឹងគ្មានការរៀបការជាមួយក្មេងគ្រប់អាយុទៀតទេ នៅក្នុងប្រទេសរបស់លោក។ ថ្លែងទៅកាន់ក្រុមមូស្លីម ក្នុងរដ្ឋធានី បង់ហ្ស៊ុល លោកប្រធានាធិបតី Jammeh និយាយថា ចាប់ពីថ្ងៃទី៦ ខែកក្កដាទៅ ការរៀបការជាមួយក្មេងមិនពេញវ័យ គឺជាអំពើខុសច្បាប់ និងត្រូវហាមឃាត់ដាច់ខាត។

លោក Jammeh បន្ថែមទៀតថា៖ «អ្នកណាដែលរៀបការជាមួយក្មេងស្រីអាយុក្រោម១៨ឆ្នាំ នឹងជាប់ទោសធ្ងន់ធ្ងរដល់ទៅ២០ឆ្នាំ។ ចំណែកឪពុកម្ដាយរបស់ក្មេងស្រីនោះ នឹងជាប់ទោស២១ឆ្នាំ ខណៈដែលអ្នកដែលដឹងពីរឿងនេះ តែមិនបានរាយការណ៍ទៅអាជ្ញាធរ នឹងជាប់គុក១០ឆ្នាំផងដែរ»។

ជាមួយគ្នានោះ ប្រធានាធិបតី Yahya Jammeh ក៏ព្រមានទៀតថា អាចារ្យ ឬអ្នកណាដែលដឹកនាំកម្មវិធីរៀបការ ក៏នឹងត្រូវបញ្ជូនទៅពន្ធធនាគារផងដែរ។ លោកបន្តថា ប្រសិនបើពួកគេចង់ដឹងថា លោកនិយាយពិត ឬមិនពិត ពួកគេអាចសាកល្បងបាន។ លើសពីនោះ លោក Jammeh ក៏បានប្រាប់ឲ្យសភា អនុម័តច្បាប់ដែលពាក់ព័ន្ធនឹងការសម្រេចនេះ ឲ្យបានមុនថ្ងៃទី២១ ខែកក្កដា ផងដែរ។

សូមរម្លឹកដែរថា កាលពីខែធ្នូ ឆ្នាំ២០១៥ សភាហ្កំប៊ី បានអនុម័តច្បាប់ប្រឆាំងនឹងការកាត់ស្បែកអង្គជាតស្ត្រីផងដែរ ហើយអ្នកណាដែលល្មើសនឹងច្បាប់នេះ នឹងត្រូវជាប់ទោសរហូតដល់បីឆ្នាំទៀតផង។ ការអនុម័តច្បាប់នេះ ធ្វើឡើងតែមួយខែប៉ុណ្ណោះ ក្រោយប្រធានាធិបតី Yahya Jammeh ចាត់ទុកសកម្មភាពបែបនេះថា ហួសសម័យ និងបានបញ្ជាឲ្យបញ្ឈប់ជាបន្ទាន់។

អ្នកនាំពាក្យរដ្ឋាភិបាលហ្កំប៊ី ប្រធានាធិបតីរូបនេះ ប្រកាសក្នុងខែវិច្ឆិកាថា ការធ្វើរបៀបនេះ មិនមែនជារបស់សាសនាឥស្លាមទេ ខណៈដែលឥស្លាម ត្រូវបានគោរពដោយប្រជាជន៩៥ភាគរយ នៃប្រជាជនហ្កំប៊ីសរុប១.៨លាននាក់៕