អន្តរជាតិ
អាមេរិក ៖ អ្នកទោសហែកទ្វារគុកដើម្បីទៅជួយសង្គ្រោះអ្នកយាមម្នាក់
× អ្នកទោស ៨ នាក់នៃពន្ធនាគារ Weatherford រដ្ឋតិចសាស់ បានហែកទ្វារគុកចេញ ដើម្បីជួយសង្គ្រោះអ្នកយាមម្នាក់ដែលបានសន្លប់បាត់ស្មារតី។
រឿងហេតុបានកើតឡើងកាលពីថ្ងៃទី ២៣ មិថុនាកន្លងទៅនេះ។ ក្រោយពីនិយាយលេងសើចជាមួយនឹងក្រុមអ្នកទោសទាំងនេះរួចមក អ្នកយាមម្នាក់ស្រាប់តែដួលធ្លាក់ពីលើកៅអី រួចក៏បាត់ស្មារតីតែម្តង។ គាត់ទំនងជាគាំងបេះដូង។ ឃើញដូច្នោះ ក្រុមអ្នកទោសបាននាំគ្នាស្រែករកជំនួយ រួចក៏គាស់ទ្វារគុកចេញ ទាំងដៃជាប់ខ្នោះ។ ពួកគេសង្កេតឃើញថា ជីពចររបស់អ្នកយាមរូបនោះពុំលោតទេ។ ពួកគេព្យាយាមបង្កជាសំឡេងខ្លាំងៗ ដើម្បីទាក់ទាញចំណាប់អារម្មណ៍របស់អ្នកយាមផ្សេងទៀត ដោយស្រែក និងគោះទ្វារឲ្យឮៗ។ ដំបូងឡើយ ក្រុមអ្នកយាមស្មានថា អ្នកទោសទាំងនោះចង់បះបោរបង្កចលាចល លុះឃើញគ្នារបស់ខ្លួនម្នាក់ដេកសន្លប់ស្តូកស្តឹង ទើបពួកគេប្រញាប់ហៅរថយន្តសង្គ្រោះបន្ទាន់ និងបញ្ជូនអ្នកទោសចូលទៅក្នុងគុកវិញ។
បើទោះបីជាសកម្មភាពគាស់ទ្វារគុកនេះធ្វើឡើងក្នុងបំណងល្អក៏ដោយ ប៉ុន្តែ ចាប់ពីពេលនេះទៅ មន្ទីរឃុំឃាំងនេះនឹងរឹតបន្តឹងសន្តិសុខបន្ថែមទៀត ដើម្បីកុំឲ្យមានករណីនេះកើតឡើងម្តងទៀតបាន៕
ប្រភព៖ Daily Mail
វីដេអូ ចុចទីនេះ
© រក្សាសិទ្ធិដោយ thmeythmey.com