អន្តរជាតិ
សន្តិសុខ និងការប្រឈមមុខយោធាតំបន់អាស៊ីកាន់តែផុយស្រួយខ្លាំង
× សកម្មភាពដ៏គឃ្លើននឹងបម្រាមសហគមន៍អន្តរជាតិរបស់រដ្ឋាភិបាលក្រុងព្យុងយ៉ាងក្នុងការពង្រឹងសមត្ថភាពការពារជាតិ និងសកម្មភាពវាតទីរបស់ចិននៅក្នុងតំបន់ជម្លោះសមុទ្រចិនខាងត្បូងដោយឯកតោភាគី រួមជាមួយនឹងអន្តរាគមន៍ភាគីខាងក្រៅ បាននិងកំពុងតែជំរុញឲ្យសន្តិសុខនៅក្នុងតំបន់កាន់តែផុយស្រួយខ្លាំង។ នោះក៏ព្រោះតែ នឹងមានវត្តមានតួអង្គកាន់តែច្រើន និងស្មុគស្មាញ ចូលពាក់ព័ន្ធ ក្រោមលេសដើម្បីការពារសន្តិសុខ (ភាគីខាងក្រៅ) និងការពារដែនអធិបតេយ្យ(ភាគីពាក់ព័ន្ធ)។ ជាពិសេសនោះ វា នឹងជំរុញឲ្យមានការប្រកួតប្រជែងសព្វាវុធទៀតផង។
ការត្អួញត្អែរ និងព្រួយបារម្ភរបស់កូរ៉េខាងត្បូងពីការគំរាមកំហែងដោយការអភិវឌ្ឍអាវុធនុយក្លេអ៊ែរដែលជាមហិច្ឆតាមិនអាចបញ្ឈប់បានរបស់កូរ៉េខាងជើង បានឈានដល់ដំណាក់កាលចុងក្រោយហើយ។នោះគឺអាមេរិក និងកូរ៉េខាងត្បូង នៅថ្ងៃទី០៨ ខែកក្កដា កន្លងទៅ បានឯកភាពគ្នាលើគម្រោងពង្រាយប្រព័ន្ធការពារមីស៊ីលទំនើបរបស់អាមេរិក THAAD ទៅកាន់កូរ៉េខាងត្បូងដើម្បីទប់ទល់ការគំរាមកំហែងរបស់កូរ៉េខាងជើង។ ក្រុមការងាររួមរបស់ប្រទេសទាំងពីរកំពុងសិក្សាដើម្បីឈានទៅកំណត់ទីតាំងសមស្របសម្រាប់ដំឡើងអាវុធនេះ និងពេលវេលាសមរម្យដែលអាចបញ្ជូនអាវុធនេះទៅបានផងដែរ។
នឹងមានការប្រកួតប្រជែងសព្វាវុធកាន់តែខ្លាំងពីមហាអំណាច និងប្រទេសក្នុងតំបន់?
ភ្លាមៗជាមួយនឹងកិច្ចព្រមព្រៀងអាមេរិក និងកូរ៉េខាងត្បូងពីការដាក់ខែលការពារមីស៊ីលមួយនេះ ចិន និងរុស្ស៊ី បានបញ្ចេញកំហឹងយ៉ាងខ្លាំង និងថែមទាំងព្រមានពីផលប៉ះពាល់ និងវិធានការអវិជ្ជមានទៀតផង។ ក្រសួងការបរទេសរុស្ស៊ី បានបង្ហាញការព្រួយបារម្ភ និងជំទាស់យ៉ាងខ្លាំង ដោយព្រមានថានឹងមានការឆ្លើយតបមួយដ៏គ្រោះថា្នក់ ប្រសិនបើការពង្រាយនោះ នៅតែបន្តទៅមុខ។
បន្ថែមពីនេះ គណៈកម្មាធិការកងទ័ព នៃក្រុមប្រឹក្សាសហព័ន្ធរុស្ស៊ី នៅថ្ងៃចុះកិច្ចព្រមព្រៀងផ្លូវការដដែលនោះ ក៏បានព្រមានដែរថា អង្គភាពមីស៊ីល អាចនឹងដាក់ពង្រាយនៅភាគីខាងកើតរុស្ស៊ីដើម្បីជា ការឆ្លើយតបទៅការដាក់ពង្រាយ THAAD ផងដែរ។ នេះបើយោងតាមភ្នាក់ងារព័ត៌មាន Xinhua ដែលបានបន្ថែមដែរថា គណៈកម្មាធិការ នឹងពិចារណាលើការសម្រេចចិត្តជាក់លាក់មួយជាមួយនឹងក្រសួងការពារជាតិលើផែនការយោធាដែលរួមបញ្ចូលទាំងការពង្រាយមីស៊ីល និងកងទ័ពជើងគោកផងដែរនោះ។
សម្រាប់ក្រុងប៉េកាំងវិញ ក៏មិនខុសពីក្រុងម៉ូស្គូដែរ។ ចិន ដែលតែងតែប្រកៀកស្មាជាមួយនឹងរុស្ស៊ីប្រឆាំងនឹងការពង្រាយខែលការពារមីស៊ីលអាមេរិកតាំងពីដើមមកនោះ ក៏បានប្រកាសគោលជំហរមិនប្រែប្រួលប្រឆាំងនឹងចំណាត់ការនេះ។ ជាមួយគ្នានេះ ក្រុងប៉េកាំង ក៏បានកោះអគ្គរដ្ឋទូតអាមេរិក និងកូរ៉េខាងត្បូងដើម្បីប្រឆាំងចំពោះចំណាត់ការនេះ។ អ្នកនាំពាក្យក្រសួងការបរទេសចិន លោក ហុង ឡី បានអះអាងថា ចិន ទទូចឲ្យអាមេរិក និងកូរ៉េខាងត្បូង បញ្ឈប់ដំណើរការនៃប្រព័ន្ធការពារនេះជាបន្ទាន់ ហើយ ចៀសវាងសកម្មភាពបង្កភាពស្មុគស្មាញក្នុងតំបន់ ឬបំផ្លាញផលប្រយោជន៍យុទ្ធសាស្ត្រសន្តិសុខរបស់ចិនទៀតផង។ ក្រុងប៉េកាំង ចាត់ទុកថាសកម្មភាពនេះ មិនជួយដល់ទិសដៅនៃការកាត់បន្ថយអាវុធនុយក្លេអ៊ែរនៅក្នុងឧបទ្វីបកូរ៉េនោះទេ តែវា ប្រឆាំងទៅនឹងការប្រឹងប្រែងដោយភាគីពាក់ព័ន្ធតាមរយៈការចរចា និងពិគ្រោះយោបល់ទៅវិញនោះទេ។
សម្រាប់តួអង្គសំខាន់នៃបញ្ហាសន្តិសុខមួយនេះ គឺកូរ៉េខាងជើង ក៏បានព្រមានចាត់វិធានឆ្លើយតបតាមមធ្យោបាយយោធាវិញផងដែរ។ នេះបើយោងតាមភ្នាក់ងារព័ត៌មានជាតិកូរ៉េខាងជើង KCNA ដែលចុះផ្សាយថា ការិយាល័យកាំភ្លើងធំនៃសេនាធិការយោធាប្រជាជនកូរ៉េខាងជើង នឹងចាត់វិធានតទល់ផ្នែកយោធានៅពេលទីតាំងនៃការបំពាក់ប្រពន្ធ័ការពារមីស៊ីលអាមេរិកត្រូវបានជ្រើសរើសនោះ។
សូមជម្រាបផងដែរថា ដើម្បីទប់ទល់កូរ៉េខាងជើង អាមេរិក ក៏ពង្រាយសព្វាវុធយុទ្ធសាស្ត្រជាច្រើនទៅកាន់មូលដ្ឋានយោធារបស់ខ្លួននៅកោះហ្កាម Guam ដែលស្ថិតមហាសមុទ្រប៉ាស៊ីហ្វិក ដែលនៅមិនឆ្ងាយពីឧបទ្វីបកូរ៉េ។ បើតាមរបាយការណ៍ក្រសួងការពារជាតិអាមេរិក បច្ចុប្បន្នអាមេរិកពង្រាយប្រព័ន្ធមីស៊ីល THAAD នេះជាច្រើនគ្រឿងដែរទៅកាន់កោះ ហ្កាម (Guam) ហើយអាមេរិកនឹងបញ្ចូលអាវុធប្រភេទនេះ៤៨គ្រឿងថែមទៀតទៅបម្រើវិស័យការពារជាតិខ្លួនត្រឹមចុងឆ្នាំ២០១៦ ដែលវានឹងកើនឡើងដល់ ១៥៥ គ្រឿង។
សមុទ្រចិនខាងត្បូង កំពុងតែប្រទាញប្រទង់ភាគីជម្លោះ និងភាគីខាងក្រៅ
ងាកមកចាប់អារម្មណ៍ បញ្ហានៅក្នុងតំបន់មួយទៀត គឺភាពតានតឹងនៅសមុទ្រចិនខាងត្បូង។ ស្របពេលដែលមជ្ឈត្តការនៃតុលាការអចិន្ត្រៃយ៍ក្រុងឡាអេ នៃប្រទេសហូឡង់ ប្រកាសសាលក្រមតាមបណ្តឹងហ្វីលីពីនប្រឆាំងចិនលើបញ្ហាសមុទ្រចិនខាងត្បូង ចិន បានធ្វើសមយុទ្ធទ្រង់ទ្រាយធំ ដែលកក្រើកនៅ ភាគខាងកើតនៃកោះ Hainan របស់ចិន រហូតដល់តំបន់ក្បែរបណ្តុំកោះប៉ារ៉ាសែលផងដែរ។ បើយោងតាមការចុះផ្សាយរបស់ទូរទស្សន៍ចិន CCTV មាននាវាចម្បាំងជាច្រើនគ្រឿង បានចូលរួមក្នុងសមយុទ្ធយោធា ដែលចាប់ផ្តើមតាំងពីថ្ងៃទី០៥ ដល់ថ្ងៃទី១១ ខែកក្កដានេះ ហើយ ក៏មាននាវាពិឃាដនាំផ្លូវដែលបំពាក់ដោយមីស៊ីលពីរគ្រឿងប្រភេទ Shenyang និង Ningbo និងនាវាចម្បាំងមួយគ្រឿងប្រភេទ Chaozhou ដែលបំពាក់ដោយមីស៊ីលផងដែរ។
អ្វីគួរកត់សម្គាល់នោះ ក្រុងវ៉ាស៊ីនតោន បានប្រកាសត្រង់ៗរួចទៅហើយ ថា នឹងមានវិធានការដើម្បីអន្តរាគមន៍ ប្រសិនបើក្រុងប៉េកាំង ហ៊ានធ្វើសកម្មភាពបង្កហេតុ ក្រោយការប្រកាសសាលក្រមនោះ។ លោកស្រី Colin Willett ឧបការីទទួលបន្ទុកអាស៊ីបូព៌ានៃក្រសួងការបរទេសអាមេរិក បានបញ្ជាក់ថា ក្រុងវ៉ាស៊ីនតោនមានជម្រើសជាច្រើនដើម្បីឆ្លើយតបទៅនឹងសកម្មភាពរបស់ចិននៅក្នុងតំបន់។ នេះបើយោងតាមភ្នាក់ព័ត៌មាន Reuters ដែលបានបន្ថែមដែរថា លោកស្រី ក៏បានបញ្ជាក់យ៉ាងច្បាស់ដែលថា ស្របពេលនៃការជិតមកដល់នៃការប្រកាសសាលក្រម អាមេរិក បាននិងកំពុងតែធ្វើការរួមកម្លាំងជាមួយនឹងសម្ព័ន្ធមិត្ត និងដៃគូនៅក្នុងតំបន់ដើម្បីធានាឲ្យបានគោលជំហរនៃការប្រឈមរួមគ្នាមួយ។
លោកស្រីសង្កត់ធ្ងន់ថា «យើង, សហរដ្ឋអាមេរិក ពិតជាមានផលប្រយោជន៍មួយពិតប្រាកដនៅក្នុងតំបន់នោះ ហើយ យើងមានផលប្រយោជន៍មួយក្នុងការបង្កើនការការពារ និងដៃគូសន្តិសុខរបស់ខ្លួនផងដែរ»។
យ៉ាងណាក៏ដោយ ក្រៅពីការសម្ញែងយោធានៅតំបន់ជម្លោះដែលចិនអះអាងថា ជាសមយុទ្ធជាទមា្លប់នោះ ចិន ក៏បានព្រមានអាមេរិកតាមបែបការទូតផងដែរ។ នោះគឺរដ្ឋមន្ត្រីការបរទេសចិន លោក វ៉ាង យីង បាននិយាយទូរសព្ទជាមួយនឹងរដ្ឋមន្ត្រីការបរទេសអាមេរិក លោក ចន ឃេរី ថា បើទោះជាតុលាការសម្រេចយ៉ាងម៉េចក៏ដោយ ចិននៅតែការពារដាច់ខាតអធិបតេយ្យដែនដីរបស់ខ្លួន ក៏ដូចជាសេរីភាពនាវាចរណ៍ស្របច្បាប់ផងដែរ៕
Tag:
ឧបទ្វីបកូរ៉េ
សមុទ្រចិនខាងត្បូង
© រក្សាសិទ្ធិដោយ thmeythmey.com