អន្តរជាតិ
នយោបាយអន្តរជាតិ
ប្រធានាធិបតីម៉ិកស៊ិក៖ គ្មានផ្លូវម៉ិកស៊ិក ចេញលុយធ្វើជញ្ជាំងព្រំដែនជាមួយអាមេរិកឡើយ
×
ប្រធានាធិបតីម៉ិកស៊ិក បានទាត់ចោលការលើកឡើងរបស់បេក្ខជនប្រធានាធិបតីអាមេរិក លោក ដូណាល់ ត្រាំ ដែលចង់ឲ្យម៉ិកស៊ិកចំណាយលុយ ដើម្បីសាងសង់របងព្រំដែនចន្លោះម៉ិកស៊ិក និងអាមេរិក ដើម្បីការពារលំហូរអ្នកឆ្លងកាត់ខុសច្បាប់។ លើសពីនេះ ក្នុងកិច្ចសន្ទនាជាមួយទូរទស្សន៍ CNN ប្រមុខរដ្ឋ ម៉ិកស៊ិក ក៏រិះគន់លោក ដូណាល់ ត្រាំ ដែលចាត់ទុកជនជាតិម៉ិកស៊ិក ថា ជាអ្នករត់ ពន្ធថ្នាំញៀនផងដែរ។
ក្នុងបទសម្ភាសន៍មួយ ជាមួយលោក Fareed Zakaria ជាពិធីករទូរទស្សន៍ CNN ប្រធានាធិបតីម៉ិកស៊ិក លោក Enrique Peña Nieto បានបដិសេធការសន្យារបស់លោក ដូណាល់ ត្រាំ ដែលចង់សាងសង់ជញ្ជាំងព្រំដែនជាមួយម៉ិកស៊ិក និងឲ្យម៉ិកស៊ិក ជាអ្នកចេញថ្លៃចំណាយទាំងអស់។ លោក Nieto បញ្ជាក់ច្បាស់ៗថា គ្មានផ្លូវដែលប្រទេសលោក ចេញលុយលើជញ្ជាំងនេះទេ។
ប្រធានាធិបតីរូបនេះ និយាយថា សុខដុមរមនីយកម្មផ្នែកសេដ្ឋកិច្ច និងសង្គម រវាងអាមេរិក និងម៉ិកស៊ិក គឺពឹងផ្អែកលើទំនាក់ទំនងល្អរវាងប្រទេសទាំងពីរ។ ដោយលើកឡើងពី ការ ពាក់ព័ន្ធគ្នារវាងសន្តិសុខអាមេរិក និងអ្នកជិតខាងនោះ លោកប្រធានាធិបតី Nieto បន្តថា៖« យើងមានទំនាក់ទំនងនៃការសម្រុះសម្រួលគ្នា កិច្ចសហប្រតិបត្តិការជាមួយគ្នា ក៏ដូចជា ការពួតដៃគ្នា លើវិស័យសន្តិសុខប្រទេសទាំងពីរ ហើយគ្មានផ្លូវម៉ិកស៊ិក ចាយលុយលើជញ្ជាំងរបៀបនេះឡើយ »។
ទាក់ទិននឹងការហៅជនជាតិម៉ិកស៊ិកថា ជាអ្នកឧក្រិដ្ឋ ពីសំណាក់លោក ត្រាំ ប្រធានាធិបតីម៉ិកស៊ិក មិនបានឯកភាពនឹងរឿងនេះទេ។ លោក Nieto បញ្ជាក់ថា លោកមិនអាចយល់ស្របនឹងការអធិប្បាយ ដែលហៅជនជាតិម៉ិកស៊ិកទាំងអស់ ជាមនុស្សអាក្រក់ នោះឡើយ។ លោក សង្កត់ធ្ងន់ថា ឧក្រិដ្ឋជន មាននៅគ្រប់ប្រទេស ហើយយើងគួរតែប្រយុទ្ធប្រឆាំងនឹងបញ្ហានេះ និងត្រូវអនុវត្តច្បាប់ ដើម្បីយកពួកមកកាត់ទោស។
ឆ្លៀតពេលនោះ ប្រធានាធិបតី Nieto ក៏បានលើកឡើងពីចំនួនអ្នកដែលឆ្លងកាត់ទៅមក រវាងព្រំដែនប្រទេសទាំងពីរផងដែរ។ លោក និយាយថា ក្នុងមួយថ្ងៃៗ មនុស្សមួយលាននាក់ ឆ្លងកាត់ព្រំដែនអាមេរិក និងម៉ិកស៊ិក ហើយពួកគេ ឆ្លងកាត់ដោយខុសច្បាប់។ ជាមួយគ្នានេះ ឡានដឹកទំនិញ និងឡានតូចៗចំនួន៣៧ម៉ឺនគ្រឿង តែងតែឆ្លងកាត់ព្រំដែនប្រទេសទាំងពីរ។
សូមបញ្ជាក់ថា កន្លងមក ទំនាក់ទំនងអាមេរិក និងម៉ិកស៊ិក ក៏មិនសូវល្អប៉ុន្មាននោះទេ ជាពិសេសពាក់ព័ន្ធនឹងការតាមចាប់ខ្លួនឈ្មួញគ្រឿងញៀន Joaquin El Chapo Guzman។ ជននេះ តែងត្រូវបានចាប់ខ្លួន ហើយក៏រត់គេចខ្លួនជាបន្តបន្ទាប់ ដែលធ្វើឲ្យពលរដ្ឋមិនសប្បាយចិត្តនោះទេ។ Guzman គឺជាមេឈ្មួញគ្រឿងញៀន ដែលអាមេរិក ចង់ចាប់ខ្លួនបំផុត៕
Tag:
ម៉ិកស៊ិក
អាមេរិក
© រក្សាសិទ្ធិដោយ thmeythmey.com