ជាតិ
CNRP ថា តុលាការកំពុងរំលោភសិទ្ធិសេរីភាពឯកឧត្តម កឹម សុខា
× តុលាការចេញសេចក្ដីសម្រេចដាក់ឯកឧត្តម កឹម សុខា ប្រធានស្តីទីគណបក្សសង្គ្រោះជាតិឲ្យស្ថិតនៅក្រោមការត្រួតពិនិត្យរបស់តុលាការ ដែលឯកឧត្តម កឹម សុខា កំពុងជាប់បទចោទ«បដិសេដក្នុងការចូលខ្លួន»។ ក្រុមសមាជិកសភាគណបក្សសង្គ្រោះជាតិ យល់ថា ការសម្រេចរបស់តុលាការនេះ គឺជាការរំលោភសិទ្ធិសេរីភាពឯកឧត្តម កឹម សុខា។
ក្រុមសមាជិកសភា ចាត់ទុកទង្វើររបស់តុលាការនេះ គឺបង្ហាញកាន់តែច្បាស់ថា ករណីឯកឧត្តម កឹម សុខា គឺជារឿងនយោបាយ។
សេចក្ដីថ្លែងការណ៍ចុះថ្ងៃទី១៤កក្កដា របស់សមាជិកសភាគណបក្សសង្គ្រោះជាតិ បានបញ្ជាក់ដូច្នេះថា៖«ការសម្រេចរបស់តុលាការដែលដាក់ឲ្យឯកឧត្តម កឹម សុខា ជាអ្នកតំណាងរាស្ត្រមានអភ័យឯកសិទ្ធិ ឲ្យស្ថិតនៅក្រោមការត្រួតពិនិត្យតាមផ្លូវតុលាការ គឺជាការរំលោភសិទ្ធិសេរីភាពតំណាងរាស្ត្រ និងការរំលោភម្ដងហើយម្ដងទៀតទៅលើមាត្រា៨០ នៃរដ្ឋធម្មនុញ្ញនៃព្រះរាជាណាចក្រកម្ពុជា»។
គណបក្សសង្គ្រោះជាតិ បានរំឮកថា មាត្រា៨០ រដ្ឋធម្មនុញ្ញ បានចែងថា តំណាងរាស្ត្ររូបណាក៏ដោយ មិនអាចត្រូវបានចោទប្រកាន់ ចាប់ខ្លួន ឃុំខ្លួន ដោយមិនបានលើកអភ័យឯកសិទ្ធិសភានោះទេ។ ហើយរហូតមកដល់ពេលនេះ សភា ពុំបានបំពេញតាមនិតិវិធីត្រឹមត្រូវ ដែលច្បាប់បានកំណត់ឡើយ។
នៅព្រឹកថ្ងៃទី១៤ កក្កដានេះ ចៅក្រមស៊ើបសួរសាលាដំបូងរាជធានីភ្នំពេញ លោក ថាន់ ឡេង បានចេញដីការសម្រេចយកទៅបិទនៅជញ្ជាំងផ្ទះលោក កឹម សុខា ដោយបញ្ជាក់ថា លោក កឹម សុខា ត្រូវបានដាក់ឲ្យស្ថិតនៅក្នុងការពិនិត្យពីបទ «បដិសេធក្នុងការចូលខ្លួន» ប្រព្រឹត្តនៅរាជធានីភ្នំពេញ កាលពីថ្ងៃទី២៦ ខែឧសភា ឆ្នាំ២០១៦ តាមមាត្រា ៥៣៨ នៃក្រមព្រហ្មទណ្ឌ ជាបទល្មើស ដែលច្បាប់តម្រូវឲ្យផ្តន្ទាទោសដាក់ពន្ធនាគារ។
បើតាមដីកាសម្រេច ចៅក្រមស៊ើបសួរដាក់ឯកឧត្តម កឹម សុខា ឲ្យស្ថិតក្រោមការត្រួតពិនិត្យតាមផ្លូវតុលាការ តាមបញ្ញត្តិមាត្រា ២២៣ នៃក្រមនិតិវិធីព្រហ្មទណ្ឌ ដោយឯកឧត្តម កឹម សុខា ត្រូវអនុវត្តនូវកាតព្វកិច្ចដូចជា មិនត្រូវចេញក្រៅព្រំប្រទល់ដែនដី ដែលកំណត់ដោយចៅក្រមស៊ើបសួរ។ ត្រូវចូលបង្ហាញខ្លួនតាមការកំណត់នៅអង្គភាពនគរបាល ឬកងរាជអាវុធហត្ថ ដែលចាត់តាំងដោយចៅក្រម។ ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រម និងប្រគលជូនដល់ការិយាល័យក្រឡាបញ្ជីគ្រប់ឯកសារបញ្ជាក់អំពីអត្តសញ្ញាណ៕
© រក្សាសិទ្ធិដោយ thmeythmey.com