ជាតិ
UN សោកស្តាយពីការស្លាប់លោក កែម ឡី និងស្នើអាជ្ញាធរ ស៊ើបអង្កេតឲ្យបានត្រឹមត្រូវ លោក Stéphane Dujarric អ្នកនាំពាក្យអគ្គលេខាធិការអង្គការសហប្រជាជាតិ
× លោក Stéphane Dujarric អ្នកនាំពាក្យអគ្គលេខាធិការអង្គការសហប្រជាជាតិ បានថ្លែងនៅក្នុងឱកាសសង្ខេបព័ត៌មានប្រចាំថ្ងៃនាថ្ងៃទី១៣ ខែកក្កដា ម្សិលមិញថា លោកអគ្គលេខាធិការ បាន គីមូន ពិតជាមានការសោកស្តាយចំពោះការស្លាប់របស់លោកបណ្ឌិត កែម ឡី។ លោក ក៏បានបន្ថែមដែរថា «យើង សង្ឃឹមថា អាជ្ញាធរ នឹងធ្វើការស៊ើបអង្កេតឲ្យពេញលេញ និងត្រឹមត្រូវទៅលើសំណុំរឿងនៃការបាញ់សម្លាប់នេះ។
ឆ្លៀតឱកាសនោះដែរ លោក ក៏បានបញ្ជាក់ដែរថា លោកអគ្គលេខាធិការ បាន គីមូន នៅតែព្រួយបារម្ភចំពោះស្ថានភាពនៅកម្ពុជាដែលរាប់បញ្ចូលទាំងរបាយការណ៍នៃការគំរាមកំហែង ការរុកកួន និងការចាប់ខ្លួនសមាជិក សង្គមស៊ីវិល ប្រព័ន្ធផ្សព្ធផ្សាយ សមាជិកបក្សប្រឆាំង និងគណៈកម្មាធិការរៀបចំការបោះឆ្នោតផងដែរ។
តាមការអះអាងរបស់អ្នកនាំពាក្យដដែលនោះ លោក បាន គីមូន ក៏បានទទួចឲ្យមានការគោរពសិទ្ធិមនុស្ស ដែលរាប់បញ្ចូលទាំងសេរីភាពនៃការបញ្ចេញមតិ សមាគម និងការជួបជុំផងដែរ៕
© រក្សាសិទ្ធិដោយ thmeythmey.com