អន្តរជាតិ
តួកគី៖ មន្ត្រីយោធា៣៩នាក់ត្រូវបានបណ្ដេញចេញ ខណៈជាង១៥០០នាក់ទៀតត្រូវចាប់ខ្លួន
× ក្រុមយោធាស្មោះត្រង់នឹងរដ្ឋាភិបាលតួកគី បានចាប់ខ្លួនទាហាន និងមន្ត្រីយោធាចំនួន១៥៦៣នាក់ ដែលជាប់ពាក់ព័ន្ធនឹងការធ្វើរដ្ឋប្រហារមិនជោគជ័យមួយ នៅយប់ថ្ងៃទី១៥ ខែកក្កដា។ ការប៉ុនប៉ងធ្វើរដ្ឋប្រហារដែលចង់ផ្ដួលរំលំរដ្ឋាភិបាលតួកគី បង្កជាអំពើហិង្សា ដែលបណ្ដាលឲ្យមនុស្សស្លាប់កើនដល់៩០នាក់ និងមនុស្សលើសមួយពាន់នាក់ រងរបួស។
មន្ត្រីយោធាជាន់ខ្ពស់តួកគីថា្នក់វរសេនីយ៍ចំនួន២៩នាក់ និងថ្នាក់ឧត្តមសេនីយ៍៥នាក់ ត្រូវបណ្ដេញចេញពីតំណែង ខណៈទាហានច្រើនជាង១៥០០នាក់ទៀត ត្រូវបានចាប់ខ្លួន ដោយកងកម្លាំងរដ្ឋាភិបាលប្រធានាធិបតី Recep Tayyip Erdogan បន្ទាប់ពីពួកគេ ធ្វើការបះបោរមិនជោគជ័យ។ ហេតុការណ៍ ដែលកើតឡើងក្នុងរដ្ឋធានីអង់ការ៉ា និងទីក្រុងអ៊ីស្តង់ប៊ុល បណ្ដាលឲ្យមនុស្សជិតមួយរយនាក់ បាត់បង់ជីវិត និងជាច្រើននាក់ទៀត ត្រូវបានបញ្ជូនទៅមន្ទីរពេទ្យ។
ដោយស្រង់ប្រភពពីមន្ត្រីយោធាតួកគី ទីភ្នាក់ងារព័ត៌មាន Reuters ផ្សាយថា កងកម្លាំងរដ្ឋាភិបាលតួកគី បានចូលកាន់កាប់ទីស្នាក់ការកងទ័ព ប៉ុន្តែនៅតែមានក្រុមយោធាដែលចូលរួមធ្វើរដ្ឋប្រហារមួយចំនួនទៀត នៅបន្តធ្វើសកម្មភាពដដែល។ មួយវិញទៀត មេបញ្ជាការកងទ័ពតួកគី លោកឧត្តមសេនីយ៍ Hulusi Akar ដែលបាត់ខ្លួនក្នុងពេលរដ្ឋប្រហារ និងត្រូវចាប់ខ្លួនដោយក្រុមយោធានោះ ក៏ត្រូវបានរំដោះផងដែរ។ លោក គឺជាមន្ត្រីជាន់ខ្ពស់ជាងគេ ដែលស្ថិតក្នុងដៃក្រុមនេះ។
បន្ថែមពីនេះទៀត ក្រុមយោធា ដែលត្រូវចាត់ទុកជាក្រុមឧទ្ទាមនោះ ក៏មានឧទ្ធម្ភាគចក្រប្រយុទ្ធជាច្រើនគ្រឿង ក្នុងដៃផងដែរ។ ប៉ុន្តែ នាយករដ្ឋមន្ត្រីតួកគី ក៏ដាក់បញ្ជាឲ្យបាញ់ទម្លាក់ចោលទាំងអស់ ប្រសិនបើហ៊ានហោះ ខណៈមានយន្តហោះមួយគ្រឿង បានវាយប្រហារមកលើអាគាររដ្ឋាភិបាលរួចមក។
លើសពីនេះ ប្រធានាធិបតី Recep Tayyip Erdogan ដែលបានប្រកាសថា រដ្ឋាភិបាលកំពុងគ្រប់គ្រងស្ថានការណ៍នោះ ក៏បានស្នើឲ្យប្រជាជនទាំងអស់ បន្តស្ថិតនៅតាមទីតាំងសាធារណៈទាំងឡាយ បើទោះជាក្រុមយោធាធ្វើរដ្ឋប្រហារ ដាក់បម្រាមគោចរក៏ដោយ។ លោក Erdogan និយាយថា ការប៉ុនប៉ងធ្វើរដ្ឋប្រហារបានបញ្ចប់ ហើយអ្នកពាក់ព័ន្ធ នឹងមិនត្រូវបានលើកលែងនោះទេ។
សូមបញ្ជាក់ថា មេដឹកនាំពិភពលោក បានបង្ហាញការព្រួយបារម្ភរបស់ខ្លួន ជុំវិញស្ថានការប៉ុនប៉ងធ្វើរដ្ឋប្រហារពីសំណាក់យោធាមួយក្រុមនៅតួកគី ដើម្បីទម្លាក់រដ្ឋាភិបាល។ សហរដ្ឋអាមេរិក រុស្សី សហភាពអឺរ៉ុប សម្ព័ន្ធយោធាណាតូ និងអង្គការសហប្រជាជាតិ បានអំពាវនាវ ឲ្យមានការរក្សាស្ថិរភាពនៅក្នុងតួកគី គ្រាដែលយោធាប៉ុនប៉ងធ្វើរដ្ឋប្រហារមួយ នៅថ្ងៃទី១៥ ខែកក្កដា។ ប្រធានាធិបតីអាមេរិក បារ៉ាក់ អូបាម៉ា ស្នើឲ្យភាគីទាំងអស់ គាំទ្ររដ្ឋាភិបាលដែលចេញពីការបោះឆ្នោតបែបប្រជាធិបតេយ្យ៕
Tag:
តួកគី
រដ្ឋប្រហារ
© រក្សាសិទ្ធិដោយ thmeythmey.com