រូបត្លុក
សមុទ្រចិនខាងត្បូង ធ្វើឲ្យ«គោលការណ៍ឯកច្ឆន្ទអាស៊ាន»ទន់ខ្សោយ
× សមាគមប្រជាជាតិអាស៊ីអាគ្នេយ៍ ឬហៅថាអាស៊ាន ត្រូវបានបង្កើតឡើងតាំងពីឆ្នាំ១៩៦៧មកម្ល៉េះ។ បច្ចុប្បន្ន អង្គការក្នុងតំបន់មួយនេះ មានសមាជិកសរុបទាំងអស់១០ប្រទេសរួមមាន ព្រុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។ ដូចបានកំណត់នៅក្នុងធម្មនុញ្ញអាស៊ាន ដើម្បីចេញសេចក្តីសម្រេច ឬសេចក្តីថ្លែងកាណ៍ណាមួយ អាស៊ាន ត្រូវឈរលើគោលការណ៍«ឯកច្ឆន្ទ» ពោលគឺ ត្រូវមានការព្រមព្រៀងពីរាល់សមាជិកទាំងអស់ជាមុនសិន។
អ្វីគួរកត់សម្គាល់នោះ ដោយសារតែបញ្ហាសមុទ្រចិនខាងត្បូង បានធ្វើឲ្យអាស៊ាន ហាក់ដូចជាបែកបាក់សាមគ្គីភាព។ នោះក៏ព្រោះតែរដ្ឋសមាជិកមានគោលជំហ និងផលប្រយោជន៍ផ្សេងៗគ្នាលើជម្លោះនេះ។ ជម្លោះសមុទ្រចិនខាងត្បូង មានរដ្ឋពាក់ព័ន្ធ ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ ប្រទេសអាស៊ាន មួយចំនួន មាននិន្នាការទៅរកចិន និងមួយចំនួនទៀត មាននិន្នាការប្រឆាំងចិនជ្រុល។
ជាឧទាហរណ៍ ក្នុងឆ្នាំ២០១២ ក្នុងពេលដែលកម្ពុជា ធ្វើជាប្រធានអាស៊ានជាលើកទី២ អាស៊ាន មិនអាចចេញសេចក្តីថ្លែងការណ៍រួមមួយក្រោយបញ្ចប់កិច្ចប្រជុំរដ្ឋមន្ត្រីការបរទេសបានឡើយ។ នោះក៏ព្រោះតែមានភាពចម្រូងចម្រាសគ្នារវាងបណ្តាប្រទេសសមាជិកក្នុងការដាក់បញ្ចូលបញ្ហារសើបនៃសមុទ្រចិនខាងត្បូងនៅក្នុងសេចក្តីថ្លែងកាណ៍នោះ៕
© រក្សាសិទ្ធិដោយ thmeythmey.com