មូសុងនិរតី បន្តមានឥទ្ធិពលនៅកម្ពុជា ធ្វើឲ្យមានបាតុភូតផ្គរ រន្ទះ និងខ្យល់កន្ត្រាក់ជាច្រើន

ជាតិ

មូសុងនិរតី បន្តមានឥទ្ធិពលនៅកម្ពុជា ធ្វើឲ្យមានបាតុភូតផ្គរ រន្ទះ និងខ្យល់កន្ត្រាក់ជាច្រើន

19, Jul 2016 , 12:41 pm

រូបភាព

កម្ពុជានៅតែបន្តរងឥទ្ធិពលខ្យល់មូសុងនីរតី។ រូបថត៖ ញឹក ស្រីល័ក្ខ

ដោយ: ញឹក ស្រីល័ក្ខ (Nhek Sreyleak)

យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម បានបង្ហាញអោយដឹងថា ខ្យល់មូសុងនិរតីខ្សោយ និងជ្រលងសម្ពាធទាប កំពុងបន្តមានឥទ្ធិពលមកលើប្រទេសកម្ពុជាឡើងវិញ ចាប់ពីថ្ងៃទី១៩ ដល់២៥ កក្កដានេះ។ ម្យ៉ាងវិញទៀត ស្ថានភាព ទឹកភ្លៀង អាចបណ្ដាលឲ្យមានភ្លៀងធ្លាក់ពីតិចទៅបង្គួរ ស្ទើរគ្រប់តំបន់ក្នុងប្រទេសកម្ពុជា។

អាកាសធាតុប្រទេសកម្ពុជា ចាប់ពីថ្ងៃទី១៩ ដល់២៥ កក្កដាខាងមុខនេះ កំពុងទទួលឥទ្ធិពលពីខ្យល់មូសុងនិរតីខ្សោយ និងជ្រលងសម្ពាធទាបឡើងវិញ ដែលបង្កឲ្យមានការប្រែប្រួលអាកាសធាតុនៅតាមតំបន់មួយចំនួន។ សម្រាប់តំបន់ខ្ពង់រាប និងតំបន់វាលទំនាប ស្ថានភាពទឹកភ្លៀង អាចនឹងមានភ្លៀងធ្លាក់រាយប៉ាយពីមធ្យម ទៅបង្គួរចាប់ពីថ្ងៃទី១៩ ដល់២៥ ខែកក្កដា ឆ្នាំ២០១៦។

ទន្ទឹមនឹងនេះ នៅក្នុងតំបន់មាត់សមុទ្រ ស្ថានភាពទឹកភ្លៀង អាចនឹងមានភ្លៀងធ្លាក់ពីតិចទៅបង្គួរ ចាប់ពីថ្ងៃទី១៩ ដល់២៥ ខែកក្កដា។ ជាមួយគ្នានេះ ក្រសួងធនធានទឹក បានអំពាវនាវដល់ប្រជាពលរដ្ឋឲ្យមានប្រុងប្រយ័ត្នខ្ពស់ ចំពោះបាតុភូតផ្គរ រន្ទះ និងខ្យល់កន្ត្រាក់ អាចនឹងកើតមានច្រើន ជាពិសេសក្នុងតំបន់វាលទំនាប នៅពេលមេឃរកកលភ្លៀង។ ដើម្បីជៀសវាងនូវគ្រោះថ្នាក់ផ្សេងៗ ដែលកើតដោយយថាហេតុ ក្នុងពេលមេឃរកកលភ្លៀង៕