ជាតិ
ឃាតកម្មលើលោក កែម ឡី អាចគំរាមកំហែងដល់សេរីភាពផ្នែកសារព័ត៌មាន?
× ភ្នំពេញ៖ នៅថ្ងៃទី១៨ ខែកក្កដា អង្គការអន្តរជាតិមួយ ដែលមានឈ្មោះថា «អ្នកកាសែតគ្មានព្រំដែន» បានចេញសេចក្តីប្រកាសព័ត៌មាន ជុំវិញឃាតកម្មលើលោក កែម ឡី អ្នកវិភាគនយោបាយ និងជាអ្នកស្រាវជ្រាវការអភិវឌ្ឍសង្គម។ ឃាតកម្មលើលោក កែម ឡី ធ្វើឲ្យអង្គការនេះ ព្រួយបារម្ភ ចំពោះប្រព័ន្ធផ្សព្វផ្សាយ ដែលអាចរងការវាយប្រហារជាបន្តបន្ទាប់។ ប៉ុន្តែអ្នកនាំពាក្យរបស់ក្រសួងសារព័ត៌មាន នៅតែអះអាងថា សេរីភាពផ្នែកសារព័ត៌មាននៅកម្ពុជា មានភាពល្អប្រសើរ ហើយគ្មានការគាបសង្កត់អ្វីនោះទេ។
អង្គការអ្នកកាសែតគ្មានព្រំដែនប្រចាំកម្ពុជា ដែលហៅកាត់ថា RSF បានសង្កេតឃើញសញ្ញាណនៃការគំរាមកំហែងលើអ្នកសារព័ត៌មាន ហើយប្រព័ន្ធផ្សព្វផ្សាយនៅកម្ពុជា កាន់តែជួបសភាពធ្ងន់ធ្ងរឡើងៗ បន្ទាប់ពីមានឃាតកម្មដ៏សាហាវលើលោក កែម ឡី នៅក្នុងស្តាម៉ាតមួយ (Star Mart) ដែលស្ថិតនៅម្តុំស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦ កន្លងទៅ។ អង្គការអន្តរជាតិ ដែលធ្វើការលើកស្ទួយវិស័យសារព័ត៌មានមួយនេះ បានស្នើឲ្យរដ្ឋាភិបាលកម្ពុជា បញ្ឈប់ការបំភិតបំភ័យលើប្រព័ន្ធផ្សព្វផ្សាយ និងការរំលោភលើសេរីភាពផ្នែកសារព័តមាន។
«អ្នកកាសែតគ្មានព្រំដែន» បានលើកឡើងក្នុងសេចក្តីប្រកាសព័ត៌មាននោះថា បើទោះបីជាសមត្ថកិច្ច ប្រកាសធ្វើការស៊ើបអង្កេតតឹងរឹង ចំពោះឃាតកម្មលើលោក កែម ឡីក៏ពិតមែន ប៉ុន្តែសេរីភាពសារព័ត៌មាន ហាក់ដូចជាមានហានិភ័យកាន់តែខ្លាំងទៅៗ ហើយអ្នកសារព័ត៌មាន នៅតែជាគោលដៅនៃការគំរាមកំហែងដដែល។ អង្គការនេះ កត់សម្គាល់ទៀតថា ឃាតកម្មលើលោក កែម ឡី ទើបតែកើតឡើងប៉ុន្មានថ្ងៃប៉ុណ្ណោះ បន្ទាប់ពីលោក ផ្តល់បទសម្ភាសន៍ជាមួយវិទ្យុអាស៊ីសេរី ទាក់ទងនឹងរបាយការណ៍មួយរបស់អង្គការ Global Witness ។
យ៉ាងណាក៏ដោយ លោក អ៊ុក គឹមសេង អ្នកនាំពាក្យរបស់ក្រសួងព័ត៌មាន មិនយល់ស្របឡើយ ចំពោះខ្លឹមសារនៃសេចក្តីប្រកាសព័ត៌មានរបស់អង្គការ «អ្នកកាសែតគ្មានព្រំដែន»។ ថ្លែងប្រាប់សារព័ត៌មានថ្មីៗនៅរសៀលនេះ លោក អ៊ុក គឹមសេង បានអះអាងថា រាជរដ្ឋាភិបាល តែងខិតខំធ្វើយ៉ាងណា ដើម្បីពង្រឹងវិស័យសារព័ត៌មាននៅកម្ពុជា។ លោក បន្តទៀតថា សេរីភាពផ្នែកសារព័ត៌មាន គ្មានអ្វីគូរឲ្យព្រួយបារម្ភនោះទេ ព្រោះការផ្សាព្វផ្សាយតាមទូរទស្សន៍ឬវិទ្យុ នៅតែដំណើរការជាធម្មតា។
ចំណែកឯឃាតកម្មលើលោក កែម ឡី អ្នកនាំពាក្យរូបនេះ លើកឡើងថា រដ្ឋាភិបាល រួមទាំងសង្គមស៊ីវិល ពិតជាសោកស្តាយយ៉ាងខ្លាំងចំពោះព្រឹត្តិការណ៍ដ៏គួរឲ្យតក់ស្លុតមួយនេះ។ លោក អ៊ុក គឹមសេង សង្កត់ធ្ងន់ថា អំពើឃាតកម្មលើលោក កែម ឡី គឺជាចំណាត់ការបស់អាជ្ញាធរ និងកម្លាំងសមត្ថកិច្ច ដែលត្រូវដោះស្រាយ។ ហេតុដូច្នេះហើយ លោក បានស្នើឲ្យមជ្ឈដ្ឋានជាតិ និងអន្តរជាតិ រងចាំមើលសមត្ថកិច្ច បំពេញភារកិច្ចជាមុនសិន ដោយមិនត្រូវចោទអ្នកណាឡើយ។
ម្យ៉ាងទៀត ការកើតមានឃាតកម្មនេះ មិនមែនបានន័យថា ដោយសារតែលោក កែម ឡី ផ្តល់បទសម្ភាសជាមួយវិទ្យាអាស៊ីសេរី ទាក់ទងនឹង របាយការណ៍ Global Witness នោះទេ។ នេះជាការបន្ថែមរបស់លោក អ៊ុក គីមសេង ហើយបន្ទាប់មកលោក ក៏អំពាវនាវទៅកាន់មហាជនដូច្នេះថា៖«យើងកុំទាន់ចង្អុលដាក់អ្នកនេះឬអ្នកនោះ។ យើងរង់ចាំមើលសមត្ថកិច្ចធ្វើការសិន។ រឿងនេះរដ្ឋាភិបាលជាអ្នកខាត ដូច្នេះពួកអ្នកឱកាសនិយម អាចនឹងឆ្លៀតឱកាស។ យើងចាំមើលសិន»៕
Tag:
កែម ឡី
RSF
អ៊ុក គីមសេង
© រក្សាសិទ្ធិដោយ thmeythmey.com