កូរ៉េខាងជើង៖ សាកល្បងនុយក្លេអ៊ែរទៀតឬអត់ គឺអាស្រ័យលើអាមេរិក

អន្តរជាតិ

នយោបាយអន្តរជាតិ

កូរ៉េខាងជើង៖ សាកល្បងនុយក្លេអ៊ែរទៀតឬអត់ គឺអាស្រ័យលើអាមេរិក

28, Jul 2016 , 7:39 am

រូបភាព

លោក Ri Yong ho រដ្ឋមន្ត្រីការបរទេសកូរ៉េខាងជើង

ដោយ: តន ចាន់រិទ្ធារ៉ា

កូរ៉េខាងជើង និងសហរដ្ឋអាមេរិក បានបន្ទោសគ្នាទៅវិញទៅមកជុំវិញស្ថានការណ៍តានតឹងនៅឧបទ្វីបកូរ៉េ។ រដ្ឋមន្ត្រីការបរទេសអាមេរិកបញ្ជាក់ថា កូរ៉េខាងជើង នឹងរងផលវិបាកពិតប្រាកដ បើនៅតែបន្តធ្វើសកម្មភាពសាកល្បងអាវុធផ្គើនការសម្រេចរបស់អន្តរជាតិ ប៉ុន្តែកូរ៉េខាងជើងឆ្លើយវិញថា ការសម្រេចចិត្តសាកល្បងអាវុធនៅពេលខាងមុខឬយ៉ាងណានោះ គឺពឹងផ្អែកលើអាកប្បកិរិយារបស់អាមេរិកទៅវិញទេ។

លោក តន ចាន់រិទ្ធារ៉ាលម្អិតព័ត៌មាន

ពីកិច្ចប្រជុំនៅរដ្ឋធានីវៀងចន្ទន៍ រដ្ឋមន្ត្រីការបរទេសកូរ៉េខាងជើង និងរដ្ឋមន្ត្រីការបរទេសអាមេរិក បានឆ្លើយឆ្លងពាក្យសម្ដីគ្នាលើការសាកល្បងអាវុធនុយក្លេអ៊ែររបស់កូរ៉េខាងជើង ដែលធ្វើឲ្យឧបទ្វីកូរ៉េ ឡើងកម្ដៅយ៉ាងខ្លាំង។ មួយវិញទៀត កូរ៉េខាងជើង ក៏បានបន្ទោសអាមេរិក ថា នៅពីក្រោយបរាជ័យនៃកិច្ចចរចា៦ភាគី ដែលរាំងស្ទះអស់ពេលជាច្រើនឆ្នាំមកហើយនោះ។

លោក Ri Yong-ho ដែលទើបតែត្រូវបានតែងតាំងជារដ្ឋមន្ត្រីការបរទេសកូរ៉េខាងជើង បានប្រាប់អ្នករាយការណ៍ព័ត៌មាននៅថ្ងៃទី២៦ ខែកក្កដា ថា កូរ៉េខាងជើងនឹងសាកល្បងនុយក្លេអ៊ែរបន្ថែមទៀតឬអត់នោះ គឺអាស្រ័យទាំងស្រុងលើអាកប្បកិរិយារបស់អាមេរិក។ ប្រមុខការទូតកូរ៉េខាងជើងរូបនេះ បន្តទៀតថា ការលុបបំបាត់នុយក្លេអ៊ែរនៅឧបទ្វីបកូរ៉េ ក៏បានរសាត់ទៅឆ្ងាយដោយសារតែអាមេរិក។

បើតាមទីភ្នាក់ងារព័ត៌មាន AFP ប្រមុខការទូតកូរ៉េខាងជើង និយាយដូចនេះ ខណៈលោក ក៏ដូចជារដ្ឋមន្ត្រីការបរទេសអាមេរិក ចូលរួមកិច្ចប្រជុំតំបន់នៅឡាវ។ ហើយប្រតិកម្មខ្លាំងៗនេះ ក៏ធ្វើឡើងបន្ទាប់ពីប្រមុខការទូតអាមេរិក បានព្រមានកូរ៉េខាងជើងពីផលវិបាកជាក់ស្ដែង ប្រសិនបើបន្តសាកល្បងនុយក្លេអ៊ែរ និងមីស៊ីល ផ្ទុយពីការសម្រេចរបស់អង្គការសហប្រជាជាតិ។

នៅថ្ងៃដដែលនោះ មុនប្រតិកម្មរបស់កូរ៉េខាងជើង រដ្ឋមន្ត្រីការបរទេស ចន ឃែរី និយាយថា យើងត្រូវមានជំហររឹងប៉ឹង ដើម្បីប្រាកដថា កូរ៉េខាងជើងនឹងយល់ពីផលវិបាកដែលកើតឡើង ដោយសារសកម្មភាពរបស់ខ្លួន។ លើសពីនោះ អាមេរិក ក៏បានឲ្យកូរ៉េខាងជើងរៀនតាមអ៊ីរ៉ង់ ដែលបានចុះកិច្ចព្រមព្រៀងជាមួយអន្តរជាតិ លើករណីកម្មវិធីនុយក្លេអ៊ែររបស់ខ្លួន។

ដោយលើកឡើងពីទណ្ឌកម្មសេដ្ឋកិច្ច ដែលដាក់ដោយសហគមន៍អន្តរជាតិ រដ្ឋមន្ត្រីការបរទេសកូរ៉េខាងជើង បញ្ជាក់ថា កត្តសំខាន់ដែលបំផ្លាញស្ថានភាពនេះ គឺនយោបាយប្រទូស្តរាយរបស់អាមេរិក ហើយស្ថានការណ៍ក៏កាន់តែអាក្រក់។ នេះក៏ដោយសារតែ បន្ទាប់ពីការសាកល្បងមីស៊ីលបន្តបន្ទាប់រួចមក អង្គការសហប្រជាជាតិ បានសម្រេចដាក់ទណ្ឌកម្មសេដ្ឋកិច្ចធ្ងន់ៗលើកូរ៉េខាងជើង ដែលសូម្បីតែចិន ដែលជាសម្ព័ន្ធមិត្តរបស់កូរ៉េខាងជើង ក៏យល់ស្របផងដែរ៕