អន្តរជាតិ
កូរ៉េខាងជើង ថាអាមេរិកដើរផុតបន្ទាត់ក្រហមហើយ លោក Han Song Ryol អគ្គនាយកទទួលបន្ទុកកិច្ចការអាមេរិក នៃក្រសួងការបរទេសកូរ៉េខាងជើង
× មន្ត្រីការទូតជាន់ខ្ពស់របស់កូរ៉េខាងជើង ដែលទទួលបន្ទុកការងារអាមេរិក និយាយថា ក្រុងវ៉ាស៊ីនតោនបានឆ្លងផុតបន្ទាត់ក្រហមហើយ។ លើសពីនេះ មន្ត្រីកូរ៉េខាងជើងនិយាយទៀតថា ការដាក់ទណ្ឌកម្មលើមេដឹកនាំកំពូលកូរ៉េខាងជើង លោក គីម ជុងអ៊ុន គឺជាការប្រកាសសង្គ្រាម។ នេះបើយោងតាមទីភ្នាក់ងារព័ត៌មាន AP។
ក្នុងបទសម្ភាសន៍ជាមួយ AP លោក Han Song Ryol អគ្គនាយកទទួលបន្ទុកកិច្ចការអាមេរិក នៃក្រសួងការបរទេសកូរ៉េខាងជើង បញ្ជាក់ថា សកម្មភាពថ្មីៗរបស់អាមេរិក និងសម្ព័ន្ធមិត្តរបស់ខ្លួន កំពុងតែនាំឧបទ្វីបកូរ៉េខាងឈានទៅរកសង្គ្រាមហើយ។ មន្ត្រីជាន់ខ្ពស់នេះបន្តថា ការប្រឈមមុខដាក់គ្នាដ៏សាហាវ អាចនឹងផ្ទុះឡើង នៅពេលដែលអាមេរិក និងកូរ៉េខាងត្បូងធ្វើសមយុទ្ធរួមគ្នានៅខែក្រោយ។
ជាទម្លាប់នោះ សហរដ្ឋអាមេរិក និងកូរ៉េខាងត្បូងតែងធ្វើសមយុទ្ធយោធាប្រចាំឆ្នាំនៅភាគខាងត្បូងតំបន់គ្មានកងទ័ពបែងចែកកូរ៉េទាំងពីរ ហើយកូរ៉េខាងជើងតែងឆ្លើយតបនឹងសមយុទ្ធរួមគ្នា ជាពាក្យការគំរាមផ្សេងៗ ក៏ដូចជាគំរាមវាយបកផងដែរ។ ជុំវិញបញ្ហានេះ លោក Han Song Ryol និយាយថា សមយុទ្ធនេះ ក្លាយជាការជិះជាន់យ៉ាងចំហ ព្រោះមានការរាយការណ៍ថា សមយុទ្ធនេះរួមបញ្ចូលការហ្វឹកហាត់ ដើម្បីរៀបចំឈ្លានពានរដ្ឋធានីព្យុងយ៉ាង និងសំដៅធ្វើឃាតមេដឹកនាំកំពូល គីម ជុងអ៊ុន។
ថ្លែងក្នុងបទសម្ភាសន៍ដដែល មន្ត្រីជាន់ខ្ពស់រូបនេះបន្តថា ការដាក់ទណ្ឌកម្មលើលោក គីម ជុងអ៊ុន ជាជំហានចុងក្រោយហើយ។ លោកអះអាង រដ្ឋបាលលោក បារ៉ាក់ អូបាម៉ា បានទៅឆ្ងាយដែលមិនការអៀនខ្មាស់ ហ៊ានប្រជែងនឹងសេចក្ដីថ្លៃថ្នូរខ្ពស់បំផុតរបស់កូរ៉េខាងជើង។ បើតាមលោក Han ការដាក់ទណ្ឌកម្មលើមេដឹកនាំកូរ៉េខាងជើង មានន័យថា អាមេរិកឆ្លងកាត់បន្ទាត់ក្រហម និងចាត់ទុកសកម្មភាពនេះ ជាការប្រកាសសង្គ្រាម។
ទាក់ទងនឹងកម្មវិធីនុយក្លអែរវិញ លោក Han Song Ryol ឆ្លើយតបនឹងការអះអាងថា មិនមែនអាមេរិកទេ តែជាអភិវឌ្ឍនុយក្លេអ៊ែររបស់កូរ៉េខាងជើងទៅវិញទេ ដែលធ្វើឲ្យស្ថានការណ៍តានតឹង។ លោក Han បកស្រាយថា ពីមួយថ្ងៃទៅមួយថ្ងៃ ការចោទប្រកាន់របស់អាមេរិកមកលើកូរ៉េខាងជើង កាន់តែបើកចំហទៅ ប៉ុន្តែអាមេរិកទៅទេ ដែលជាអ្នកទីមួយអភិវឌ្ឍនុយក្លេអ៊ែរ ពង្រាយនុយក្លេអ៊ែរ និងជាអ្នកទីមួយដែលប្រើប្រាស់អាវុធនេះ ប្រឆាំងនឹងមនុស្សជាតិ។
ជាមួយគ្នានេះ លោក Han Song Ryol ក៏បានព្រមានពីហេតុការណ៍ដែលអាចកើតឡើង ស្របពេលដែលអាមេរិក និងកូរ៉េខាងត្បូងធ្វើសមយុទ្ធរួមគ្នា។ លោក បន្ថែមថា គ្មាននរណាអាចដឹងពីឥទ្ធិពលនៃការប្រឈមមុខនៅឧបទ្វីបកូរ៉េឡើយ ហើយសកម្មភាពប្រទូស្តរាយរបស់អាមេរិក មានន័យស្មើនឹងការប្រកាសង្គ្រាម ដែលកូរ៉េខាងជើងមានសិទ្ធិការពារខ្លួន និងឆ្លើយតបឲ្យសក្តិសម។
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com