ជាតិ
សង្គមជាតិ
×![]()
ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចានថុល បានស្នើសាធារណជនទាំងក្នុង និងក្រៅប្រទេសឲ្យចូលរួមផ្តល់មតិយោបល់ និងព័ត៌មានស្ថាបនាថែមទៀត ដើម្បីធានាការដំណោះស្រាយបញ្ហានានាកាន់តែប្រសើរ ខណៈហ្វេសប៊ុកក្រសួងទទួលបានអ្នកចុច Like ចំនួនជាង ២សែននាក់។
លោក ស៊ុន ចាន់ថុល មានអារម្មណ៍រីករាយ នៅពេលទំព័រហ្វេសប៊ុកក្រសួងសាធារណការ និងដឹកជញ្ជូនទទួលបានការចុចគាំទ្រជាបន្តបន្ទាប់។ រដ្ឋមន្ត្រីក្រសួងដឹកនាំដែលទើបផ្លាស់ប្តូរពីក្រសួងពាណិជ្ជកម្មនៅពាក់កណ្តាលអាណត្តិរដ្ឋាភិបាលទី៥ រូបនេះ បានស្នើសាធារណជន បន្តចូលរួមផ្តល់ព័ត៌មាន និងមតិយោបល់ថែមទៀត ដើម្បីពួកគេដោះស្រាយ។
«គ្រប់មតិយោបល់ នឹងត្រូវបានយកចិត្តទុកដាក់ពីក្រុមការងាររបស់យើងខ្ញុំ»។ នេះជាការធានាអះអាងរបស់លោក ស៊ុន ចាន់ថុល លើទំព័រហ្វេសក្រសួងសាធារណការ ឆ្លើយតបនឹងកំណើនចុច Like មកលើស្ថាប័នលោក នៅថ្ងៃទី២៩ កក្កដានេះ។
លោកបានបង្ហោះសារតាមទំព័រហ្វេសប៊ុកចាត់ទុកសារគាំទ្រ និងមតិយោបល់របស់សាធារណជន ពិតជាមានសារប្រយោជន៍ ពីព្រោះពួកគេអាចទទួលបានគំនិតបន្ថែមដើម្បីបង្កើត និងបន្សល់ទុកស្នាដៃនានា សម្រាប់អនាគតអ្នកជំនាន់ក្រោយ។
លោកបានលើកទឹកចិត្តអ្នកប្រើប្រាស់បណ្តាញសង្គមយ៉ាងដូច្នេះថា៖«សូមជំរុញលើកទឹកចិត្តមិត្តភក្តិ របស់លោកអ្នក ឲ្យចូលរួមក្នុងដំណោះជាមួយយើងខ្ញុំ ដើម្បីធ្វើឲ្យប្រសើរឡើង នូវជីវភាពរស់នៅប្រចាំថ្ងៃ របស់ប្រជាពលរដ្ឋកម្ពុជា នាពេលអនាគត់ដ៏ខ្លីខាងមុខ»។
បន្ថែមលើសពីនេះ លោកបានប្រកាសជាសាធារណៈថា នាពេលឆាប់ៗខាងមុខ លោកនឹងផ្សព្វផ្សាយពីការសម្រេចផែនការរយៈពេល១០០ថ្ងៃ លើកដំបូង នៅលើទ័ព័រហ្វេសប៊ុក ចាប់តាំងពីលោកចូលកាន់តំណែងក្នុងក្រសួងសាធារណការ និងដឹកជញ្ជូនផងដែរ៕
Tag:
ស៊ុន ចាន់ថុល
សាធារណការ
ដឹកជញ្ជូន
© រក្សាសិទ្ធិដោយ thmeythmey.com
