ជាតិ
សង្គមជាតិ
លោក ប្រាក់ សុខុន អង្គុយលើកៅអីខាងស្តាំ។ រូបថត ទំព័រហ្វេសប៊ុកក្រសួងការបរទេស
×![]()
ភ្នំពេញ៖ កម្ពុជា-អ៊ីស្រាអែលមានបំណងបង្កើនកិច្ចសហប្រតិបត្តិការរួមគ្នាលើវិស័យកសិកម្ម ការគ្រប់គ្រងធនធានទឹក និងការបោសសម្អាតមីន ព្រមទាំងការការពារវិនិយោគទ្វេភាគី ដើម្បីអភិវឌ្ឍប្រទេសទាំងពីរ។
រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោក ប្រាក់ សុខុន និងលោក SIMON RODED ឯកអគ្គរដ្ឋទូតអ៊ីស្រាអែលប្រចាំកម្ពុជា បានជួបពិភាក្សាគ្នាជាសំខាន់ពីការងារកសិកម្ម ធនធានទឹក និងការបោសសម្អាតមីន នៅព្រឹកថ្ងៃទី ២៩ កក្កដា ដើម្បីពង្រីកកិច្ចសហប្រតិបត្តិការទ្វេភាគី។
អ្នកនាំពាក្យក្រសួងការបរទេសលោក ជុំ សុន្ទរី បានប្រាប់ក្រុមអ្នកសារព័ត៌មាន ក្រោយជំនួបពិភាក្សាការងារទ្វេភាគីកម្ពុជា-អ៊ីស្រាអែល ក្នុងទីស្តីការក្រសួងការបរទេសថា លោក ប្រាក់ សុខុន បានស្នើលោក SIMON RODED ឲ្យជួយជំរុញការអនុវត្តកិច្ចព្រមព្រៀងផ្នែកបច្ចេកទេសភាគីទាំងពីរ ក្នុងឆ្នាំ១៩៩៤ និងអនុស្សារណៈយោគយល់លើកិច្ចសហប្រតិបត្តិការទ្វេភាគីក្នុងឆ្នាំ ២០០៥។
អ្នកនាំពាក្យបានបន្តស្រង់ខ្លឹមសារសំខាន់របស់លោក ប្រាក់ សុខុន ប្រាប់អ្នកសារព័ត៌មានថា កម្ពុជាចាប់អាម្មណ៍បច្ចេកវិទ្យាទំនើបក្នុងវិស័យកសិកម្ម និងធនធានទឹករបស់អ៊ីស្រាអែល ស្របពេលនិស្សិតខ្មែរកំពុងសិក្សាជំនាញនេះ ក្នុងប្រទេសអ៊ីស្រាអែលស្រាប់ ដើម្បីពង្រឹងកិច្ចសហប្រតិបត្តិការផ្នែកកសិកម្ម។
ក្រៅពីនេះ លោកបន្តប្រាប់ក្រោយពីជំនួបពិភាក្សានេះថា រដ្ឋមន្ត្រីការបរទេសកម្ពុជា បានបង្ហាញបំណងចង់ធ្វើកិច្ចសហប្រតិបត្តិការលើផ្នែកបោសសម្អាតគ្រាប់មីនផងដែរ ព្រោះវាជាបញ្ហាសំខាន់សម្រាប់ការអភិវឌ្ឍន៍ប្រទេសកម្ពុជា។
«កម្ពុជាចាប់អារម្មណ៍នឹងបច្ចេកទេសកសិកម្ម និងធនធានទឹករបស់អ៊ីស្រាអ៊ែល ហើយកម្ពុជាក៏បានប្រាប់ពីបំណងសហប្រតិបត្តិការផ្នែកបោសសម្អាតមីន គឺកម្ពុជាស្វាគមន៍គ្រប់បណ្តាប្រទេស រួមទាំងប្រទេសអ៊ីស្រាអែលផងដែរ»។ អ្នកនាំពាក្យថ្លែងបញ្ជាក់។
ជាមួយគ្នានេះ ឯកអគ្គរដ្ឋទូតអ៊ីស្រាអែលប្រចាំកម្ពុជាដែលមាននិវេសនដ្ឋានក្នុងទីក្រុងបាងកក ប្រទេសថៃ បានបង្ហាញការចាប់អារម្មណ៍លើការបោសសម្អាតមីន និងពាណិជ្ជកម្មទ្វេភាគី ផងដែរ។
លោក ជុំ សុន្ទរី និយាយថា លោក SIMON RODED បានប្រាប់ លោក ប្រាក់ សុខុនវិញថា អ៊ីស្រាអែលបានបណ្តុះបណ្តាលនិស្សិតកម្ពុជាលើផ្នែកកសិកម្ម ហើយពួកគេត្រៀមទទួលសញ្ញាបត្រក្នុងឆ្នាំនេះដែរ។ ហើយថា អ៊ីស្រាអែលចាប់អាម្មណ៍តួនាទីសម្អាតមីនរបស់កម្ពុជាទាំងក្នុង និងក្រៅប្រទេស។ លើសពីនេះ លោកថា អ៊ីស្រាអែលចង់ចុះហត្ថលេខាលើកិច្ចព្រមព្រៀងការពារការវិនិយោគទ្វេភាគីទៀតផង៕
Tag:
កម្ពុជា
អ៉ីស្រាអែល
កសិកម្ម
គ្រាប់មីន
© រក្សាសិទ្ធិដោយ thmeythmey.com
