ការប្រើប្រាស់ទូរសព្ទចល័ត និងអចល័តនៅកម្ពុជា លើសចំនួនប្រជាជនសរុប

ជាតិ

សេដ្ឋកិច្ច

ការប្រើប្រាស់ទូរសព្ទចល័ត និងអចល័តនៅកម្ពុជា លើសចំនួនប្រជាជនសរុប

30, Jul 2016 , 10:19 pm

រូបភាព

ដោយ: ថ្មីៗ

ភ្នំពេញ៖ គិតត្រឹមខែមិថុនាឆ្នាំនេះ អ្នកប្រើប្រាស់ទូរសព្ទចល័ត និងទូរសព្ទអចល័តនៅកម្ពុជាមានចំនួនជាង ១៩,៧លាន (ស៊ីម) ដែលស្មើនឹង ១៣៣ភាគរយធៀបនឹងចំនួនប្រជាជនសរុប។ នេះបើតាមតួលេខរបស់ក្រសួងប្រៃសណីយ៍ និងទូរគមនាគមន៍។

របាយការណ៍បង្ហាញថា នៅកម្ពុជាមានអ្នកប្រើប្រាស់ទូរសព្ទចល័តដល់ទៅ ១៩,៤៨លាន (ស៊ីម) ខណៈអ្នកប្រើប្រាស់ទូរសព្ទអចល័តមានចំនួន ២៣,៨ម៉ឺន (ស៊ីម) ។ បើតាមតួលេខនេះ ឃើញថា ចំនួនអ្នកប្រើប្រាស់ទូរសព្ទនៅកម្ពុជា គឺស្មើ ១៣៣ភាគរយ ធៀបនឹងចំនួនប្រជាជនសរុប។

របាយការណ៍ដដែលនេះ ឲ្យដឹងទៀតថា ក្រុមហ៊ុនផ្គត់ផ្គង់សេវាទូរសព្ទចល័តនៅកម្ពុជាមានចំនួន ៩ក្រុមហ៊ុន ខណៈការបម្រើសេវាទូរសព្ទអចល័តក៏មានចំនួន ៩ ក្រុមហ៊ុនផងដែរ។
ដោយឡែកអ្នកប្រើប្រាស់សេវាអ៊ីនធឺណេតនៅកម្ពុជាមានចំនួនជាង ៧,១លាន ដែលក្នុងនោះអ្នកប្រើអ៊ីនធឺណេតចល័តមានចំនួន ៧,០៧ លាន ខណៈចំនួនអ្នកប្រើប្រាស់អ៊ីនធឺណេតអចល័តមានជាង ៨ម៉ឺនប៉ុណ្ណោះ។ រីឯចំនួនក្រុមហ៊ុនផ្គត់ផ្គង់សេវាអ៊ីនធឺណេតចល័តនៅកម្ពុជាមាន ៦ក្រុមហ៊ុន ខណៈក្រុមហ៊ុនបម្រើសេវាអ៊ីនធឺណេតអចល័តមានចំនួន ៣៣។នេះបើតាមរបាយការណ៍ដដែលនេះ៕