ជាតិ
បាក់ឌុប៖ សិស្សធ្លាក់ឆ្នាំមុន តាំងចិត្តក្តោបក្តាប់ឱកាសឲ្យបាននៅឆ្នាំនេះ
× ភ្នំពេញ៖ បរាជ័យគ្មានអ្វីគួរឲ្យខ្លាចឡើយ អ្វីដែលសំខាន់ គឺការយកបទពិសោធន៍នៃបរាជ័យនោះ មកសិស្សាដើម្បីកែប្រែទៅជាភាពវិជ្ជមាន។ ទាំងនោះ ក៏ជាការតាំងចិត្តរបស់បេក្ខជនដែលប្រឡងធ្លាក់សញ្ញាបត្រមធ្យមសិក្សាទុតិយភូមិ (បាក់ឌុប) កាលពីឆ្នាំមុនផងដែរ ដោយពួកគាត់សុទ្ធតែបង្ហាញពីការខំប្រឹងប្រែងដើម្បីទទួលបានលទ្ធផលល្អនាការប្រឡងខាងមុខ។
កំពុងអង្គុយលើបង់ក្រោមដើមឈើ ក្នុងបរិវេណវិទ្យាល័យ សម្ដេច ហ៊ុន សែន ភ្នំពេញថ្មី យុវសិស្សមួយក្រុម មានគ្នា៤នាក់ កំពុងតែរៀនធ្វើលំហាត់ ដោយមានការពន្យល់គ្នាទៅវិញទៅមក ទាក់ទងនឹងមេរៀនដែលត្រូវប្រឡងបាក់ឌុបនាចុងខែសីហា ខាងមុខនេះ។
កញ្ញា សុខហេង ដែលរៀនថ្នាក់ទី១២ពីរឆ្នាំជាប់ៗគ្នា មើលឃើញដោយខ្លួនឯងថា ការមករៀនឡើងវិញ ធ្វើឲ្យនាងទទួលបានចំណេះដឹងច្រើនជាង។ សុខហេង បានបញ្ជាក់ថា៖ «ការប្រឡងនាពេលខាងមុខនេះ ខ្ញុំសង្ឃឹមថានឹងទទួលបានលទ្ធផលល្អ (C) ព្រោះសមត្ថភាពខ្ញុំមាន៨០ភាគរយហើយ បើធៀបនឹងឆ្នាំមុន ខ្ញុំអត់ចេះសោះ»។
ដ្បិតការសិក្សាពីឆ្នាំមុន មិនបានលទ្ធផលល្អ ដោយសារការធ្វេសប្រហែស មិនបានប្រឹងរៀនបន្ថែម ធ្វើឲ្យនាងប្រឡងធ្លាក់ ព្រោះសុខហេងមិនសូវចេះ ម្យ៉ាងទៀតមិនបានចិត្តទុកដាក់ក្នុងការសិក្សា។ ក្រោយពីប្រឡងធ្លាក់ សុខហេង មានការបាក់ទឹកចិត្ត ប៉ុន្តែមានក្រុមគ្រួសារ និងមិត្តភក្ត្រ ផ្ដល់ជាកម្លាំងចិត្តសម្រាប់នាង។ សុខហេង បានខំប្រឹងសម្រុករៀនយ៉ាងខ្លាំង រហូតដល់នាងជឿជាក់លើសមត្ថភាពខ្លួនផ្ទាល់ ថាអាចធ្វើបាន ។
«បរាជ័យជាគន្លឹះនៃភាពជោគជ័យ» នេះជាការលើកឡើងរបស់យុវតី សុខហេង។ យុវតីរូបនេះ បានបន្តថា គ្មានភាពជោគជ័យណាដែលកើតឡើងដោយគ្មានភាពបរាជ័យនោះទេ។ បើទោះបីការសិក្សាម្ដងទៀតត្រូវចំណាយអស់ថវិកាច្រើនពិតមែន ប៉ុន្តែការសិក្សានោះនឹងទទួលបាននូវផ្លែផ្កា និងភាពជោគជ័យ នៅពេលដែលមានការតាំងចិត្ត និងខំប្រឹង។ នៅពេលទំនេរនាងតែងតែយកពេលទៅធ្វើលំហាត់ និងកំណត់ម៉ោងសម្រាប់ការអនុវត្ត។ ទន្ទឹមនឹងនេះ ប្រសិនបើធ្វើមិនចេញនាងនឹងទូរសព្ទសួរគ្រូបង្រៀន ឬមិត្តភក្ត័ ពីចំណុចនោះ។
ដោយសារសម័យប្រឡងនេះក្រសួងអប់រំរឹតបន្តឹង ហើយត្រូវការអ្នកចេះពិតប្រាកដ នាងគិតថាសញ្ញាបត្របាក់ឌុបមានតម្លៃសម្រាប់នាង។ បន្ថែមលើសនេះសុខហេង មានក្ដីស្រមៃចង់ក្លាយជាគ្រូបង្រៀនដ៏ល្អម្នាក់ ហើយចង់សិក្សាផ្នែកអក្សរសាស្ត្រអង់គ្លេសបន្ថែមទៀតផង។
ចំណែកឯ កញ្ញា លីណែត ជាសិស្សថ្នាក់ទី១២ ដែលធ្លាប់ប្រឡងធ្លាក់កាលពីឆ្នាំមុន បានរៀបរាប់យ៉ាងដូច្នេះថា ការមកសិក្សានូវថ្នាក់ទី១២ ម្ដងទៀត លីណែត ៖ «គោលដៅសំខាន់គឺចង់ប្រឡងជាប់ ប្រសិនបើខ្ញុំនៅតែខ្មាសគេ ឬនៅតែអន់ចិត្តការងាររបស់ខ្ញុំមិនអាចសម្រេចគោលបំណងបានទេ»។ ម្យ៉ាងវិញទៀត «បើសិនខ្ញុំធ្លាក់ថ្នាក់ទី១២ហើយ ខ្ញុំឈប់មករៀនគោលដៅរបស់ខ្ញុំរឹតតែមិនទៅមុខទៀតហើយ» នេះជាការលើកឡើងរបស់លីណែត ។
បន្ថែមលើនេះ ការប្រឡងពីឆ្នាំកន្លងទៅ ដោយសារតែលីណែតពូកែតែខាងផ្នែកវិទ្យាសាស្ត្រសង្គម ដែលធ្វើឲ្យការសិក្សាផ្នែកវិទ្យាសាស្ត្រពិតមានការធ្លាក់ចុះខ្សោយ។ បើទោះបីលីណែត ជាសិស្សពូកែផ្នែកវិទ្យាសាស្ត្រសង្គមពិតមែន ប៉ុន្តែសម្រាប់ការប្រឡងគឺផ្ដោតទៅផ្នែកវិទ្យាសាស្ត្រ លីណែតបានខិតខំប្រឹងប្រែងផ្នែកវិទ្យាសាស្ត្រអោយកាន់តែល្អ ហើយខ្លាំង ព្រោះដើម្បីប្រឡងឲ្យបានលទ្ធផលល្អ ឈានបន្តថ្នាក់មហាវិទ្យាល័យ។ លីណែត បានបញ្ជាក់ថា ការសិក្សារបស់មនុស្សម្នាក់ៗមានភាពខុសគ្នា ហើយលីណែត មានត្រៀមខ្លួនរួចរាល់ហើយ សម្រាប់ការប្រឡងរយៈពេលខ្លីខាងមុខនេះ។ កញ្ញា លីណែត បានរៀបរាប់ថា៖ «សម្រាប់ការរៀនខ្ញុំមិនបានផ្ដោតសំខាន់ចំពោះរឿងចំណាត់ថ្នាក់ ឬពិន្ទុក្នុងការប្រកួតប្រជែងជាមួយមិត្តរួមថ្នាក់នោះទេ ដោយខ្ញុំធ្វើការវាស់ស្ទង់សមត្ថភាពខ្លួនឯងនៅពេលប្រឡងប្រចាំខែ ឬប្រចាំឆមាស ដោយមិនបានលួចចម្លងសំណៅឯកសារ ឬមិត្តរួមថ្នាក់នោះទេ»។
យុវនារីវ័យ១៨ឆ្នាំរូបនេះ បានលើកឡើងថា នៅពេលដែលការប្រឡងឈានមកដល់ពាក្យខាងមុខនេះ លីណែត បានចំណាយពេលវេលាពេញមួយសប្ដាហ៍ក្នុងការសិក្សា។ ម្យ៉ាងទៀតក្រៅពីបានធ្វើការរៀនជាមួយគ្រូ លីណែតបានបង្កើតក្រុមសិក្សាបន្ថែម ដើម្បីពន្យល់មេរៀន ឬលំហាត់គ្នាទៅវិញទៅមក នូវចំណុចណាមួយដែលមិនសូវយល់ច្បាស់។
លីណែត បានគិតថាសម្រាប់ការប្រឡងនាពេលខាងមុខនេះ នាងសង្ឃឹមថាសមត្ថភាពខ្លួនអាចទទួលនិទ្ទេស B ឬ C ប៉ុន្តែគ្មានសង្ឃឹមរហូតដល់ A នោះទេ។ កញ្ញា លីណែត មិនព្រួយបារម្ភ និងភ័យ ចំពោះការប្រឡងទេ ព្រោះកញ្ញា លីណែត ជឿជាក់លើសមត្ថភាពខ្លួនឯង។ ក្រោយពីបញ្ចប់ថ្នាក់ទី១២ កញ្ញា លីណែត មានបំណងចង់បន្តការសិក្សាផ្នែកច្បាប់ នៅមហាវិទ្យាល័យ ស្របពេលដែលលីណែតពូកែផ្នែកសង្គម។
ស្រដៀងគ្នានេះដែរ យុវសិស្ស សុវណ្ណមុន្នី ជាសិស្សថ្នាក់ទី១២ នៃវិទ្យាល័យ សម្ដេច ហ៊ុន សែន ភ្នំពេញថ្មី ដែលធ្លាប់ប្រឡងធ្លាក់កាលពីឆ្នាំមុនដូចទៅនឹងយុវតីទាំងពីរខាងលើផងដែរ។ យុវសិស្ស សុវណ្ណមុន្នី មានការបិទបាំងនូវលទ្ធផលរបស់ខ្លួន ហើយមានអារម្មណ៍ខ្មាសមិត្តភក្ត័ ព្រោះមិត្តភក្ត័សុវណ្ណមុន្នីភាគច្រើនសុទ្ធតែទទួលបានលទ្ធផលល្អៗ។ ទោះបីទទួលបានលទ្ធផលមិនល្អក្ដី យុវសិស្ស សុវណ្ណមុន្នី មិនអស់សង្ឃឹមឡើយ ដោយសារមានការលើកទឹកចិត្តពីក្រុមគ្រួសារ លោកគ្រូ អ្នកគ្រូ និងមិត្តភក្ត័ បានជួយជំរុញឲ្យប្រឹងប្រែងរៀនសូត្រ។
យុវជន សុវណ្ណមុន្នី បានរៀបរាប់ថា មិនចង់ទៅរៀនបរិញ្ញាបត្ររងទេ សុខចិត្តមកចូលរៀនថ្នាក់ទី១២ជាថ្មីម្ដងទៀតវិញ ព្រោះចង់ប្រឡងជាប់ដើម្បីទៅសិក្សានៅក្រៅប្រទេសផ្នែកវិស្វករ។ សុវណ្ណមុន្នី មិនមែនជាមនុស្សមិនចូលរៀន ឬគេចសាលានោះទេ ដោយសារការធ្វេសប្រហែស និងមើលស្រាលការប្រឡង បានធ្វើឲ្យរូបគេប្រឡងធ្លាក់។ យុវសិស្សសម្បុរស្រអែមរូបនេះ បានអះអាងថា៖ «ខ្ញុំនឹងទទួលបានលទ្ធផលល្អ សម្រាប់ការប្រឡងនាពេលខាងមុខនេះ ព្រោះសមត្ថភាពខ្ញុំមានការកាន់ឡើងជាងឆ្នាំមុន»។
ការសិក្សានៅសាលាជាមួយគ្រូជាកត្តាសំខាន់ផងដែរ តែការសិក្សាដោយខ្លួនឯងគឺជាកត្តាដ៏សំខាន់បំផុត។ ពេលទំនេរពីការសិក្សាម៉ោងរដ្ឋ សុវណ្ណមុន្នី បានយកវិញ្ញាសាចាស់ៗ ឬវិញ្ញាសាឆ្នាំកន្លងទៅមកហាត់ធ្វើ ហើយបានវាសស្ទង់សមត្ថភាពតាមរយៈការធ្វើលំហាត់។
សុវណ្ណមុន្នី រឹតតែមានភាពជឿជាក់លើខ្លួនឯង នៅពេលដែលខ្លួនអាចដោះស្រាយលំហាត់ទាំងនោះបាន ហើយគិតថាវិញ្ញាសាឆ្នាំមុនមានភាពងាយស្រួល ដែលខុសពីឆ្នាំមុន វិញ្ញាសាដែលចញប្រឡងនោះ សុវណ្ណមុន្នីមិនអាចធ្វើបាននោះទេ។ គេថ្លែងអមដោយទឹកមុខញញឹមដែរថា៖ «ខ្ញុំមិនអាចប្រឡងធ្លាក់បានឡើយ ព្រោះខ្ញុំបានរៀនពីរឆ្នាំហើយ ខ្ញុំដឹងពីសមត្ថភាពខ្ញុំច្បាស់ បើខ្ញុំធ្លាក់ម្ដងទៀត ខ្ញុំពិតជាមិនអាចទទួលយកបានទេ»។ «គ្មានអ្វីៗកើតឡើងដោយគ្មានការខំប្រឹងនោះទេ វាស្ថិតនៅលើការខំប្រឹងប្រែងអំណត់» នេះជាការលើកឡើងរបស់សុវណ្ណមុន្នី។ ការខំប្រឹងបែបនេះ អាចផ្លាស់ប្ដូរសមត្ថភាពពីទាបដល់ខ្ពស់ ពីការមិនយល់អ្វីសោះ រហូតដល់យល់ច្បាស់។
គួរបញ្ជាក់ផងដែរថា សម័យប្រឡងមធ្យមសិក្សាទុតិយភូមិ(បាក់ឌុប) សម្រាប់ឆ្នាំសិក្សា២០១៥-២០១៦ នឹងចាប់ផ្តើមនៅថ្ងៃទី ២២-២៣ ខែសីហា ឆ្នាំ២០១៦ ។ ដោយឆ្នាំសិក្សា២០១៥-២០១៦នេះ មានបេក្ខជនប្រឡងប្រមាណ៩៣.៧៥២នាក់ ទាំងថ្នាក់វិទ្យាសាស្ត្រពិត និងវិទ្យាសាស្ត្រសង្គម ចែកចេញជា ១៥៧ មណ្ឌល និងចំនួន ៣,៧៨១ បន្ទប់ប្រឡងនៅទូទាំងរាជធានី-ខេត្ត។ ជាមួយគ្នានេះ បេក្ខជនប្រឡងឆ្នាំនេះ កើនឡើងច្រើនជាងឆ្នាំកន្លងទៅប្រមាណជាង៥ពាន់នាក់ ដោយឆ្នាំសិក្សា២០១៤-២០១៥ មានបេក្ខជនប្រឡងប្រមាណតែ ៨៨.៤៨៨នាក់ប៉ុណ្ណោះ៕
© រក្សាសិទ្ធិដោយ thmeythmey.com