ជាតិ
នយោបាយជាតិ
រឿង កែម ឡី៖ សម្តេច ហ៊ុន សែន ប្តឹងឯ.ឧ សម រង្ស៊ី និងអ្នកស្រី ថាក់ ឡានី ទារសំណង ១០០ រៀល លោក គី តិច មេធាវីការពារក្តីសម្តេច ហ៊ុន សែន
× នៅថ្ងៃនេះមេធាវីរបស់សម្តេច ហ៊ុន សែន បានដាក់ពាក្យប្តឹងឯកឧត្តម សម រង្ស៊ី និងអ្នកស្រី ថាក់ ឡានី សមាជិកព្រឹទ្ធសភាគណបក្សសម រង្ស៊ី ពាក់ព័ន្ធនឹងករណីឃាតកម្មលើលោក កែម ឡី។ លោក គី តិច មេធាវី ការពារក្តីសម្តេច ហ៊ុន សែន បានថ្លែងថា សម្តេច ហ៊ុន សែន ទាមទារសំណងជំងឺចិត្តពីឯកឧត្តម សម រង្ស៊ី និងអ្នកស្រី ថាក់ ឡានី តែម្នាក់ ១០០ រៀលតែប៉ុណ្ណោះ។
ក្នុងពេលតែមួយ សម្តេចនាយករដ្ឋមន្រ្តី ហ៊ុន សែន បានឲ្យមេធាវីរបស់ខ្លួនប្តឹងឯកឧត្តម សម រង្ស៊ី ដែលសរសេរនៅលើទំព័រហ្វេសប៊ុកចោទរដ្ឋាភិបាលថា ជាអ្នករៀបចំអំពើភេរវកម្មសម្លាប់លោកបណ្ឌិត កែម ឡី និងប្តឹងអ្នកស្រី ថាក់ ឡានី ដែលចោទសម្តេច ហ៊ុន សែន ថា ជាអ្នកសម្លាប់លោក កែម ឡី ។ នេះបើតាមលោក គី តិច មេធាវីការពារក្តីឲ្យសម្តេច ហ៊ុន សែន ដែលថ្លែងប្រាប់អ្នកកាសែតនៅមុខតុលាការដំបូងរាជធានីភ្នំពេញនៅព្រឹកថ្ងៃចន្ទនេះ។ លោក មេធាវី គី តិច មិនបញ្ជាក់ពីបទចោទប្រកាន់អ្វីឲ្យច្បាស់លើឯកឧត្តម សម រង្ស៊ី និង អ្នកស្រី ថាក់ ឡានី ព្រោះលោកទុកឲ្យតុលាការជាអ្នកចោទប្រកាន់។
លោក មេធាវីខាងលើបន្តថា មូលហេតុដែលសម្តេច ហ៊ុន សែន ទារសំណងជំងឺចិត្តពីឯកឧត្តម សម រង្ស៊ី និងអ្នកស្រី ថាក់ ឡានី ម្នាក់តែ ១០០ រៀល ដោយសារតែសម្តេចមិនចង់បានប្រាក់អ្វីនោះឡើយ តែសម្តេចចង់បានតែការបញ្ជាក់ពីភាពស្អាតស្អំតែប៉ុណ្ណោះ។
សូមស្តាប់សំឡេងលោក គី តិច ខាងក្រោម៖
Tag:
គី តិច
សម រង្ស៊ី
ថាក់ ឡានី
© រក្សាសិទ្ធិដោយ thmeythmey.com