កីឡាជាតិ
ជាតិ
ការពារជាតិព្យាយាមរក៣ពិន្ទុនៅទឹកដីភ្នំពេញក្រោន ដើម្បីរក្សាការប្រដេញតាមបឹងកេត រូបភាព៖ ហ្វេសប៊ុកភ្នំពេញក្រោន
× សម្រាប់ការប្រកួតពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ ក្នុងសប្តាហ៍ទី១៤ នាវេលាម៉ោង៦ល្ងាចនេះ ក្រសួងការពារជាតិ(ទ័ព)រំពឹងថានឹងអាចសងសឹកក្រុមម្ចាស់ផ្ទះភ្នំពេញក្រោន ដើម្បីរក្សាគម្លាតប្រកួតប្រជែងក្នុងតារាងឲ្យកាន់តែកៀកជាមួយក្រុមបឹកកេតអង្គរនៅកីឡដ្ឋានRSN។ ចំណែកក្រុមណាហ្គាវើលត្រូវជួបប្រកួតជាមួយក្រុមអាស៊ីអឺរ៉ុបនៅពហុកីឡដ្ឋានជាតិ។
នាជំនួបនៅកីឡដ្ឋានRSN វេលាម៉ោង៦ល្ងាចនេះ ក្រសួងការពារជាតិរំពឹងអាចសងសឹកដៃគូចាស់ភ្នំពេញក្រោនដែលធ្វើឲ្យខ្លួនស្គាល់បរាជ័យជាលើកដំបូងក្នុងពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ កាលពីសប្តាហ៍ទី៥ក្នុងជើងទី១នៅកីឡដ្ឋានកងយោធពលខេមរភូមិន្ទនាពេលកន្លងមក។ ក្រសួងការពារជាតិត្រូវការឈ្នះមិនត្រឹមតែដើម្បីសងសឹកប៉ុណ្ណោះទេ ថែមទាំងដើម្បីទទួលបាន៣ពិន្ទុសម្រាប់រក្សាគម្លាតប្រកួតប្រជែងឲ្យកាន់តែកៀកជាមួយក្រុមបឹងកេតអង្គរដែលកំពុងឈរលំដាប់លេខ១ក្នុងតារាង។
ដោយបច្ចុប្បន្នក្រុងបឹងកេតអង្គរកំពុងឈរលំដាប់លេខ១ក្នុងតារាងដោយមាន៣៧ពិន្ទុ ខណៈក្រសួងការពារជាតិមាន៣១ពិន្ទុ ធ្វើឲ្យគម្លាតនៃការប្រកួតប្រជែងរបស់ទ័ពចាញ់បឹងកេតរហូតដល់៦ពិន្ទុ ប៉ុន្តែប្រសិនបើក្រុមនេះអាចយកឈ្នះភ្នំពេញក្រោននាល្ងាចនេះ គឺគម្លាតនៃការចាញ់តែ៣ពិន្ទុប៉ុណ្ណោះ។ លើសពីនេះវាជួយឲ្យ ទ័ព អាចជម្រះបញ្ជីចាស់ជាមួយ ភ្នំពេញក្រោន ដែលខ្លួនធ្លាប់ចាញ់ ២-១ ក្នុងសប្តាហ៍ទី៥ នៃជើងទី១ទៀតផង។
ចំណែកនាជំនួបនៅពហុកីឡដ្ឋានជាតិនាវេលាម៉ោង៦ល្ងាចនេះ ក្រុមណាហ្គាវើល ត្រូវការឈ្នះអាស៊ីអឺរ៉ុបយូណាយធីតផងដែរ ដើម្បីទទួលបាន៣ពិន្ទុបន្ថែមសម្រាប់បន្តឈរលំដាប់លេខ៣ក្នុងសប្តាហ៍ទី១៤ និងដើម្បីរក្សាគម្លាតឲ្យកាន់តែឆ្ងាយពីព្រះខ័នរាជស្វាយរៀង ដែលបច្ចុប្បន្នកំពុងឈរលំដាប់លេខរៀងទី៤ ដោយមាន២២ពិន្ទុ។
*កម្មវិធីប្រកួតពានរង្វាន់ក្របខណ្ឌមិត្តហ្វូនខេមបូឌានលីកថ្ងៃនេះ៖
- ម៉ោង១៨:០០នាទី៖ ភ្នំពេញក្រោន ជួប ក្រសួងការពារជាតិ នៅកីឡដ្ឋាន RSN
- ម៉ោង១៨:០០នាទី៖ ណាហ្គាវើល ជួប អាស៊ីអឺរ៉ុប នៅពហុកីឡដ្ឋានជាតិ
Tag:
បាល់ទាត់
Cambodian League 2016
© រក្សាសិទ្ធិដោយ thmeythmey.com