ជាតិ
ភ្លៀងធ្លាក់ពីតិចទៅច្រើនក្នុងសប្តាហ៍នេះ ដោយសារឥទ្ធិពលខ្យល់មូសុងនិរតី
× ខ្យល់មូសុងនិរតី នឹងមានឥទ្ធិពលខ្លាំង ចាប់ពីថ្ងៃទី ២ ដល់ទី៤ ខែសីហា ហើយជ្រលងសម្ពាធទាបនឹងបង្កើនឥទ្ធិពលមកលើប្រទេសកម្ពុជា ចាប់ពីថ្ងៃទី៥ ដល់ថ្ងៃទី៧ ខែសីហា ឆ្នាំ២០១៦ ។ នេះជាព្យាករណ៍អាកាសធាតុរបស់ក្រសួងធនធានទឹក និងឧតុនិយម។
យោងតាមព្យាករណ៍នេះ ស្ថានភាពអាកាសធាតុនៅតំបន់មាត់សមុទ្រ នៅថ្ងៃទី១ ខែសីហា អាចនឹងមានភ្លៀងធ្លាក់តិចតួច ហើយចាប់ពីថ្ងៃទី២ ដល់ថ្ងៃទី៥ ខែសីហា អាចនឹងមានភ្លៀងធ្លាក់ជោគជាំ។ ដោយឡែកអាកាសធាតុនៅតំបន់វាលទំនាប និងខ្ពង់រាប នៅថ្ងៃទី១ ខែសីហា អាចនឹងមានភ្លៀងធ្លាក់តិចតួច ហើយចាប់ពីថ្ងៃទី២ ដល់ថ្ងៃទី៧ ខែសីហា ភ្លៀងនឹងបង្កើនការធ្លាក់រាយប៉ាយក្នុងបរិមាណពីមធ្យម ទៅច្រើន។
ទន្លឹមនឹងនោះដែរ ក្រសួងធនធានទឹក បានប្រាប់ឲ្យប្រជាពលរដ្ឋប្រុងប្រយ័ត្នចំពោះផ្ទៃមេឃអាប់អួរ និងមានពពកដេរដាស ខណៈនៅតំបន់ឆ្នេរ និងលើផ្ទៃសមុទ្រ ភ្លៀងនឹងធ្លាក់ច្រើនជាប់ៗគ្នា លាយឡំនឹងខ្យល់បោកបក់ខ្លាំង ចាប់ពីថ្ងៃទី២ ដល់ថ្ងៃទី ៥ ខែសីហា៕
© រក្សាសិទ្ធិដោយ thmeythmey.com