អន្តរជាតិ
រដ្ឋអាជ្ញាតួកគី៖ CIA និងFBI នៅពីក្រោយរដ្ឋប្រហារថ្ងៃទី១៥ ខែកក្កដា
× របបដឹកនាំតួកគីរបស់ប្រធានាធិបតី Tayyip Erdogan បានបន្តការរិះគន់ និងចោទប្រកាន់អាមេរិកថា នៅពីក្រោយការរៀបចំធ្វើរដ្ឋប្រហារដែលមិនជោគជ័យ ដើម្បីទម្លាក់រដ្ឋាភិបាលស្របច្បាប់តួកគី។ ដោយសារតែហេតុការណ៍រដ្ឋប្រហារនេះ ទំនាក់ទំនងរវាងតួកគី ជាមួយនិងបស្ចឹមប្រទេស បានល្អក់កករនឹងគ្នា ហើយថែមទាំងរាលដាលដល់បញ្ហាជនភៀសខ្លួនផងដែរ។
រដ្ឋអាជ្ញារបស់តួកគី បានអះអាងថា ស្ថានប័នចារកម្មពីររបស់អាមេរិក គឺទីភ្នាក់ងារចារកម្មមជ្ឈិម (CIA) និងការិយាល័យស៊ើបអង្កេតសហព័ន្ធ (FBI) ផ្ដល់ការហ្វឹកហាត់ដល់អ្នកដើរតាមបព្វជិតសាសនាលោក Fethullah Gulen។ បព្វជិត Gulen នេះហើយដែលរដ្ឋាភិបាលតួកគីចាត់ទុកជាមេខ្លោងនៅពីក្រោយការប៉ុនប៉ងធ្វើរដ្ឋប្រហារមិនសម្រេច ដែលបណ្ដាលឲ្យមនុស្សជាច្រើន ស្លាប់និងរបួស ហើយដែលការបោសសម្អាតអ្នកពាក់ព័ន្ធ កំពុងតែធ្វើនៅឡើយនោះ។
ក្នុងដីកាចោទប្រកាន់ ដែលចេញដោយការិយាល័យរដ្ឋអាជ្ញា Edirne Public និងត្រូវបានបញ្ជូនទៅតុលាការព្រហ្មទណ្ឌទីពីរ អ្នករួមគំនិតធ្វើរដ្ឋប្រហារចំនួន៤៣នាក់ ត្រូវបានចោទប្រកាន់ និងត្រូវប្រឈមមុខនឹងការដាក់ទោសធ្ងន់ធ្ងរបំផុត។ ដីកាដដែលបន្តថា រដ្ឋអាជ្ញា ចោទប្រកាន់សមាជិកនៃអង្គការភេរវកម្ម Fethullah ត្រូវបានបង្វឹកដោយ CIA និង FBI។
បើតាមដីកាខាងលើ ស្ថាប័នចារកម្មទាំងពីររបស់អាមេរិក បានផ្ដល់ការហ្វឹកហាត់ជាច្រើនដល់ក្រុមអ្នកបង្ហាត់ ដែលនៅក្រោមមជ្ឈមណ្ឌលវប្បធម៌របស់លោក Gulen។ ជាមួយគ្នានេះ រដ្ឋប្រហារមិនបានសម្រេចនេះ មាគោលបំណងធ្វើឲ្យតួកគីចុះអន់ថយ ហើយអ្នកដែលធ្វើការឲ្យលោក Gulen ទាំងអ្នកនៅក្នុងស្ថាប័នតុលាការក្ដី ក្នុងក្រុមសន្តិសុខក្ដី និងអ្នកដែលទទួលការហ្វឹកហ្វឺន ជាអ្នកទទួលអនុវត្តការងារទាំងនេះ។
សារព័ត៌មាន Sputnik បានឲ្យដឹងដែរថា ការលើកឡើងរបស់រដ្ឋអាជ្ញាខាងលើនេះ គឺស្របគ្នានឹងគំនិតរបស់ប្រធានាធិបតី Erdogan ឆ្លើយតបនឹងការរិះគន់របស់មេទ័ពអាមេរិក។ លោក Erdogan បញ្ជាក់ថា ប្រជាជនតួកគី ដឹងថាអ្នកណានៅពីក្រោយហេតុការណ៍ដែលកើតឡើង ហើយស្ថាប័នចារកម្មកំពូលណា ដែលនៅពីក្រោយផងដែរ។
នៅថ្ងៃទី៣០ ខែកក្កដា ប្រធានាធិបតី Erdogan បានបន្តការចោទប្រកាន់របស់លោក ដោយហៅបព្វជិត Gulen ជាកូនអុក និងគាំទ្រដោយមេគំនិត ដែលគេសង្ស័យថា ជាអាមេរិក ដែលជាសម្ព័ន្ធមិត្តជិតស្និទ្ធរបស់តួកគី។ យ៉ាងណាមិញ សហរដ្ឋអាមេរិក តែងទាត់ចោលរាល់ការចោទប្រកាន់ទាំងនេះ និងបានអះអាងថា ការចោទប្រកាន់នេះនឹងប៉ះពាល់ទំនាក់ទំនងទ្វេភាគី៕
Tag:
អាមេរិក
តួកគី
CIA
FBI
រដ្ឋប្រហារ
© រក្សាសិទ្ធិដោយ thmeythmey.com