ជាតិ
លោក ហង់ ជួនណារ៉ុន នឹងរៀបចំសន្និសីទកាសែតពីដំណើរការប្រឡងបាក់ឌុប
× ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួនណារ៉ុន នឹងរៀបចំសន្និសីទសារ ព័ត៌មាន ស្ដីពីការរៀបចំការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា នៅរសៀលថ្ងៃទី៣ ខែសីហា ឆ្នាំ២០១៦ នៅទីស្តីការក្រសួងអប់រំ។
សន្និសីទកាសែតនេះ រៀបចំឡើងក្នុងគោលបំណងផ្សព្វផ្សាយពីដំណើរការរៀបចំប្រឡង និងបទប្បញ្ញត្តិមួយចំនួនក្នុងសម័យប្រឡងបាក់ឌុបដែលនឹងប្រព្រឹត្តឡើងនៅថ្ងៃទី ២២ ខែសីហា ២០១៦នេះ ជូនដល់សារព័ត៌មានជាតិ-អន្តរជាតិ ដើម្បីបន្តផ្សព្វផ្សាយដល់សាធារណជន។ នេះបើតាមសេចក្តីជូនដំណឹងរបស់ក្រសួងអប់រំ ចុះថ្ងៃទី១ ខែសីហា។
សម័យប្រឡង សញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា(បាក់ឌុប) នឹងប្រព្រឹត្តឡើងរយៈពេលពីរថ្ងៃ គឺថ្ងៃទី២២ និងថ្ងៃទី២៣ ខែសីហា ឆ្នាំ២០១៦។ ទាំងថ្នាក់វិទ្យាសាស្ត្រពិត និងថ្នាក់វិទ្យាសាស្ត្រសង្គម បេក្ខជនត្រូវប្រឡង ៧វិញ្ញាសាដូចគ្នា។
វិញ្ញាសាប្រឡងសម្រាប់សិស្សថ្នាក់វិទ្យាសាស្ត្រសង្គម វិញ្ញាសាដែលត្រូវប្រឡងរួមមាន ភូមិវិទ្យា ប្រវត្តិវិទ្យា ផែនដីនិងបរិស្ថានវិទ្យា ភាសាបរទេស គណិតវិទ្យា សីលធម៌-ពលរដ្ឋវិជ្ជា និងអក្សរសាស្ត្រខ្មែរ។ ចំណែកឯសិស្សថ្នាក់វិទ្យាសាស្ត្រពិត វិញ្ញាសាដែលត្រូវប្រឡងរួមមាន គណិតវិទ្យា រូបវិទ្យា គីមីវិទ្យា ជីវៈវិទ្យា អក្សរសាស្ត្រខ្មែរ ប្រវត្តិវិទ្យា និងភាសាបរទេស។
សម័យប្រឡងបាក់ឌុបឆ្នាំ២០១៦នេះ មានបេក្ខជនសរុបចំនួន៩៣.៧៥២នាក់ មានមណ្ឌលប្រឡងចំនួន ១៥៧មណ្ឌល និង ៣.៧៨១បន្ទាប់ នៅទូទាំង២៥ រាជធានី-ខេត្ត។សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល ក្រសួងនឹងប្រកាសលទ្ធផលនៅរសៀលថ្ងៃទី១៣ ខែកញ្ញា ឆ្នាំ២០១៦ រីឯមណ្ឌលនៅតាមបណ្តាខេត្តនានា នឹងប្រកាសនៅថ្ងៃទី១៤ ខែកញ្ញា ឆ្នាំ២០១៦ ៕
Tag:
ហង់ ជួនណារ៉ុន
បាក់ឌុប
អប់រំ
© រក្សាសិទ្ធិដោយ thmeythmey.com