ជាតិ
ករណីទេសចរជប៉ុនម្នាក់បាត់កង់ ហើយអាជ្ញាធររកឃើញវិញ ល្បីពេញហ្វេសប៊ុក រូបថត៖ ប៉ុស្តិ៍នគរបាលសង្កាត់ស្ទឹងមានជ័យ
× ទីបំផុតទៅបុរសជនជាតិជប៉ុន Shun Yanagisawa អាចបន្តដំណើរផ្សេងព្រេងជាមួយនឹងកង់សំណព្វរបស់ខ្លួនវិញហើយ បន្ទាប់ពីគាត់បានទទួលបានកង់ពីអាជ្ញាធរប៉ុស្តិ៍នគរបាលសង្កាត់ស្ទឹងមានជ័យ ក្នុងពិធីប្រគល់ផ្លូវការមួយនៅស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី១ ខែសីហានេះ។ រឿងរ៉ាវទាក់ទងនឹងការបាត់កង់ និងការតាមដើររកពេញទីផ្សារក្នុងរាជធានីភ្នំពេញ របស់លោក Yanagisawa ទទួលបាននូវការចាប់អារម្មណ៍យ៉ាងច្រើនពីសំណាក់អ្នកប្រើប្រាស់បណ្តាញសង្គមហ្វេសប៊ុក។
តាមរយៈការផ្សាយរបស់កាសែតកោះសន្តិភាព លោក Shun Yanagisawa បានចេញដំណើរដោយកង់ពីប្រទេសជប៉ុន ដោយឆ្លងកាត់ប្រទេសមួយចំនួនដូចជាកោះតៃវ៉ាន់ ហ្វីលីពីន សិង្ហបុរី ម៉ាឡេស៊ី និងថៃ មុននឹងមកដល់កម្ពុជា ដោយចំណាយពេលជិត១ឆ្នាំ។
កង់សំណព្វរបស់លោកត្រូវបានចោរលួចកាលពីថ្ងៃទី១៨ ខែកក្កដា ខណៈស្នាក់នៅសណ្ឋាគារមួយក្រោយព្រះបរមរាជវាំង។ ដោយសារតែមានអនុស្សាវរីយ៍ដ៏ធំធេងជាមួយនឹងកង់នោះ លោក Yanagisawa បានត្រាច់ចរតាមកន្លែងលក់កង់នានាក្នុងរាជធានីភ្នំពេញ ដោយរំពឹងថា អាចរកឃើញវិញ។
ដោយសារតែមើលឃើញអនុស្សាវរីយ៍ដ៏កម្សត់បែបនេះ អ្នកកាសែត និងអ្នកប្រើប្រាស់បណ្តាញសង្គម នាំគ្នាដុតដៃដុតជើងយ៉ាងខ្លាំង ដោយអំពាវនាវដល់អ្នកដែលបានឃើញកង់ ឬអ្នកលួចផ្ទាល់ យកកង់ឲ្យលោក Yanagisawa វិញ រហូតដល់អ្នកខ្លះប្រកាសចេញសំណងថ្លៃខូចខាតជំនួស។
ដំណឹងល្អបានមកដល់ ដោយកាលពីព្រឹកថ្ងៃទី៣១ ខែកក្កដា ប៉ុស្តិ៍នគរបាលសង្កាត់ស្ទឹងមានជ័យបានប្រកាសតាមរយៈទំព័រហ្វេសប៊ុករបស់ខ្លួនថា កង់របស់ Yanagisawa ត្រូវបានរកឃើញវិញហើយ ដោយចោរបានយកទៅប្លុងចោលនៅមូលដ្ឋានរបស់ខ្លួន។ ភ្ជាប់ជាមួយរូបថតកង់ នគរបាលស្ទឹងមានជ័យ បានប្រកាសឲ្យបុរសជនជាតិជប៉ុនទៅយកទ្រព្យសំណព្វរបស់ខ្លួនវិញ។
លោក Yanagisawa បានទទួលកង់របស់ខ្លួនវិញដោយផ្ទាល់ដៃពីលោក ឯម ភារី នាយ រងប៉ុស្ដ៍នគរបាល ស្ទឹងមានជ័យ ក្នុងពិធីដែលរៀបចំនៅស្នងការដ្ឋាននគរបាលរាជធានីភ្នំពេញ។ ជាមួយនឹងទឹកចិត្តសប្បាយរីករាយ និងអរគុណដល់ពលរដ្ឋខ្មែរ លោក Yanagisawa បានសម្រេចបានទិដ្ឋាការបស់ខ្លួននៅកម្ពុជា ហើយអំពាវនាវអ្នកដែលចូលចិត្តជិះកង់ចូលរួមជិះកម្សាន្តជាមួយលោក៕
© រក្សាសិទ្ធិដោយ thmeythmey.com