ជាតិ
នយោបាយជាតិ
លោក យ៉ង សាំងកុមារ៖ មុនពេលស្លាប់លោក កែម ឡី គ្មានគំនិតចូលរួមនយោបាយជាមួយCNRPទេ លោក យ៉ង សាំងកុមារ (កណ្តាល) នាពិធីរំលឹកខួបមួយឆ្នាំនៃការបង្កើតបក្ស GDP
× ភ្នំពេញ៖ លោក យ៉ង សាំងកុមារ ប្រធានកម្មវិធីពង្រឹងសមត្ថភាពថ្នាក់ដឹកនាំមូលដ្ឋានរបស់គណបក្សប្រជាធិបតេយ្យមូលដ្ឋាន បានថ្លែងថា កាលនៅរស់លោក កែម ឡី មិនដែលបានមានគំនិតចង់ចូលរួមជាមួយគណបក្សណាទេ ។ លោក យ៉ង សាំងកុមារ ដែលជាមិត្តភក្តិជិតស្និទ្ធជាមួយលោក កែម ឡី អះអាងបែបនេះ គឺផ្ញើសារទៅមេដឹកនាំគណបក្សនយោបាយមួយចំនួន ដើម្បីកុំឲ្យពួកគេយកសពលោកបណ្ឌិតកែម ឡី មកពាក់ព័ន្ធរឿងនយោបាយ។
«មុនគាត់ស្លាប់ លោក កែម ឡី មិនបាននិយាយប្រាប់ខ្ញុំមួយម៉ាត់ទេ ថា គាត់ចូលគណបក្សណា ឬគណបក្សសង្គ្រោះជាតិឡើយ»។ នេះជាការបញ្ជាក់របស់លោក យ៉ង់ សាំងកុមារ ដែលបានឆ្លើយតបទៅប្រធានគណបក្សប្រឆាំង ឯកឧត្តម សម រង្ស៊ី ដែលធ្លាប់អះអាងថា មូលហេតុដែលលោក កែម ឡី ត្រូវបានឃាតករបាញ់ស្លាប់ដោយសារតែលោក កែម ឡី គ្រោងចូលរួមសកម្មភាពនយោបាយជាគណបក្សសង្គ្រោះជាតិ។ លោក យ៉ង សាំងកុមារ ដែលជាមិត្តភក្តិជិតស្និទ្ធជាមួយលោក កែម ឡី បានអំពាវឲ្យអ្នកនយោបាយខ្មែរទាំងអស់ ឈប់យកការស្លាប់របស់លោក កែម ឡី មកលាបពណ៌គ្នា ដែលធ្វើឲ្យខ្មែររងគ្រោះគ្មានទីបញ្ចប់ទៀត។
ថ្លែងក្នុងសន្និសីទសារព័ត៌មាននាពិធីរំលឹកខួបមួយឆ្នាំនៃការបង្កើតគណបក្សប្រជាធិបតេយ្យមូលដ្ឋាន នៅទីស្នាក់ការកណ្តាលបក្សព្រឹកនេះ លោក យ៉ង សាំងកុមារ បានបញ្ជាក់ដូច្នេះថា«មុនគាត់ស្លាប់ លោក កែម ឡី សម្រេចលោតចូលមកឈរឈ្មោះជាបេក្ខជននាយករដ្ឋមន្ត្រីនៅគណបក្សប្រជាធិបតេយ្យមូលដ្ឋាន ពីព្រោះ បេក្ខជននាយករដ្ឋមន្ត្រីគណបក្សប្រជាធិបតេយ្យមូលដ្ឋាន មិនមែនបានលើប្រធានបក្សជាស្វ័យប្រវត្តិនោះទេ»។
បើតាមអតីតប្រធានអង្គការសេដាករូបនេះ មុនពេលស្លាប់លោក កែម ឡី និងស្ថាបនិកគណបក្សប្រជាធិបតេយ្យមូលដ្ឋានដទៃទៀត បានបែងចែកគ្នាបំពេញការងារសង្គម ដោយលោក កែម ឡី លោក មាស នី និងលោក ប៉ាង ងួនទៀង ទៅធ្វើការងារជាមួយបណ្តាញសង្គមខ្មែរដើម្បីខ្មែរវិញ។ ចំណែក លោក សាម អ៊ីន លោក យ៉េង វីរៈ រួមនឹងបញ្ញាវ័ន្តមួយចំនួនទៀត មកបំពេញការងារក្នុងគណបក្សប្រជាធិបតេយ្យមូលដ្ឋាន ដើម្បីស្វែងរកដំណើការលទ្ធិប្រជាធិបតេយ្យក្នុងប្រទេសពិតប្រាកដដែលជាបំណងប្រាថ្នារបស់លោក កែម ឡី។
ជាមួយគ្នានេះប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ បានថ្លែងថា គណបក្សរបស់លោកនឹងស្នើទៅរដ្ឋាភិបាល ឲ្យកំណត់យកថ្ងៃទី១០ កក្កដា ជាថ្ងៃទិវាជាតិនៃសេរីភាពនៃការបញ្ចេញមតិ ដើម្បីរំម្លឹកពីវីរភាពរបស់លោក កែម ឡី និងដើម្បីលើកកម្ពស់សិទ្ធិ និងសេរីភាពបញ្ចេញមតិនៅកម្ពុជា។ លោកបញ្ជាក់យ៉ាងដូច្នេះ៖ «ក្រៅពីគោរពវិញ្ញាណក្ខន្ធរបស់គាត់(កែម ឡី)ថ្ងៃនេះ បក្សយើង នឹងស្នើឲ្យរដ្ឋាភិបាលកំណត់ថ្ងៃទី១០ កក្កដា ជាថ្ងៃទិវាជាតិនៃសេរីភាពបញ្ចេញមតិ ដើម្បីឲ្យរដ្ឋាភិបាលយកទៅពិចារណា តែបើរដ្ឋាភិបាលមិនយល់ព្រម ពេលយើងកាន់អំណាច យើងនឹងកំណត់ថ្ងៃទី១០ កក្កដា ជាទិវាជាតិ នៃការបញ្ចេញមតិ»។
សូមបញ្ជាក់ថា លោក កែម ឡី ត្រូវបានឃាតករបាញ់សម្លាប់នៅក្នុងម៉ាតមួយ ក្បែរស្តុបបូកគោ កាលពីថ្ងៃទី១០ កក្កដា។ មុនពេលស្លាប់លោក កែម ឡី រួមជាមួយបញ្ញវន្តមួយចំនួនទៀត បានរួមគ្នាបង្កើតគណបក្សប្រជាធិបតេយ្យមូលដ្ឋានឡើង ដើម្បីប្រកួតប្រជែងនយោបាយក្នុងគោលបំណងរៀបចំប្រទេសឲ្យមានដំណើការលទ្ធិប្រជាធិបតេយ្យពិតប្រាកដ។ ថ្ងៃទី០២ សីហានេះ គណបក្សប្រជាធិបតេយ្យមូលដ្ឋានបានបង្កើតឡើងមានរយៈពេលមួយឆ្នាំហើយ ៕
Tag:
យ៉ង សាំងកុមារ
កែម ឡី
© រក្សាសិទ្ធិដោយ thmeythmey.com