ជាតិ
គ.ជ.ប ទទួលបានសម្ភារបច្ចេកទេសពីសហភាពអឺរ៉ុប ជិត២០០០គ្រឿងហើយ
× ភ្នំពេញ៖ សហភាពអឺរ៉ុប បានបញ្ជូនសម្ភារបច្ចេកទេសចំនួន១៦០០គ្រឿង ទៅកាន់គ.ជ.ប។ សម្ភារបច្ចេកទេសទាំងអស់ ដែលសហភាពអឺរ៉ុប នឹងផ្តល់ឲ្យគ.ជ.ប មានចំនួន២៤០០គ្រឿង។ សម្ភារបច្ចេកទេសទាំងនេះ គឺជាជំនួយដ៏សំខាន់សម្រាប់ ការរៀបចំបោះឆ្នោតនៅពេលមុខ ឲ្យប្រព្រឹត្តទៅដោយប្រសិទ្ធភាព។
លោក ហង្ស ពុទ្ធា អ្នកនាំពាក្យរបស់ គ.ជ.ប បានអះអាងថា ឧបករណ៍បច្ចេកទេសទាំងអស់ ដែលសហភាពអឺរ៉ុប នឹងផ្តល់ឲ្យគ.ជ.ប មានរហូតទៅដល់២៤០០គ្រឿង។ លោក ហង្ស ពុទ្ធា លើកឡើងថា បច្ចុប្បន្ននេះ គ.ជ.ប បានទទួលឧបករណ៍ទាំងនោះ ចំនួន១៦០០គ្រឿងហើយ។ យ៉ាងណាក៏ដោយ លោក មិនបានបញ្ជាក់ថា ឧបករណ៍ចំនួន៨០០គ្រឿងទៀត នឹងបញ្ជូនទៅកាន់ គ.ជ.ប នៅពេលណានោះទេ។
អ្នកនាំពាក្យរូបនេះ បញ្ជាក់ថា ឧបករណ៍បច្ចេកទេស ដែលគ.ជ.ប ទទួលបាន មានដូចជា កំព្យូទ័រ, កាមេរ៉ាសុវត្ថិភាព (Security Camera), ម៉ាស៊ីនព្រីន (Printer), ទឹកខ្មៅ, ឧបករណ៍ផ្ទុកភ្លើង (Power Bank), ឧបករណ៍ផ្ទុកឯកសារ (Flash) និងឧបករណ៍ស្កេនមេដៃ ជាដើម។
ថ្លែងប្រាប់សារព័ត៌មានថ្មីៗ លោក ហង្ស ពុទ្ធា បន្តថា ក្រៅពីជំនួយផ្នែកសម្ភារខាងលើ សហភាពអឺរ៉ុប នៅតែជួយជ្រោមជ្រែង គ.ជ.ប បន្ថែមទៀត។ លោក សង្កត់ធ្ងន់ថា ជំនួយសំខាន់ៗដែល សហភាពអឺរ៉ុប នឹងបន្តជួយ គ.ជ.ប គឺការអប់រំ និងការបោះពុម្ពឯកសារផ្សេងៗ ដែលជាជំនួយដល់ការយល់ដឹងរបស់ប្រជាពលរដ្ឋ ទាក់ទងនឹងការបោះឆ្នោត។
លោក ហង្ស ពុទ្ធា បន្ថែមទៀតថា ប្រទេសជប៉ុន ក៏ជាម្ចាស់ជំនួយដ៏សំខាន់ផងដែរ។ លោក ប្រាប់ថា ភាគីជប៉ុន នឹងឈរពីក្រោយ គ.ជ.ប ជានិច្ច ដើម្បីជាបង្អែកក្នុងការអប់រំ ដល់ប្រជាពលរដ្ឋ ជុំវិញការបោះឆ្នោត។ តួយ៉ាង ការបើកវគ្គបណ្តុះបណ្តាលដល់អ្នកសារព័ត៌មានជាតិនិងអន្តជាតិ ស្តីពី «ការចុះឈ្មោះបោះឆ្នោត» ដែលនឹងប្រព្រឹត្តទៅនៅថ្ងៃទី១២ ខែសីហា ឆ្នាំ២០១៦ គឺជាការជ្រោមជ្រែងរបស់ទីភ្នាក់ងារសហប្រតិបត្តិការអន្តរជាតិជប៉ុន (JICA)។
បើតាមការអះអាងរបស់លោក ហង្ស ពុទ្ធា កន្លងមក សម្ភារបច្ចេកទេសទាំងអស់ ដែលសហភាពអឺរ៉ុបផ្តល់ឲ្យគ.ជ.ប មានតម្លៃប្រមាណជា៧លានដុលា្លរ។ លោក ធ្លាប់មានប្រសាសន៍ទៀតថា នៅពេលគ.ជ.ប ទទួលបានសម្ភារខាងលើរួចហើយ ដំណើរការរៀបចំការបោះឆ្នោត នឹងប្រព្រឹត្តទៅកាន់តែរលូត និងមានប្រសិទ្ធភាពកាន់តែខ្ពស់។
សូមបញ្ជាក់ថា គ.ជ.ប បានត្រៀមថវិកាចំនួន២៣លានដុល្លារផងដែរ ដើម្បីចាយវាយក្នុងអំឡុងពេលនៃការចុះឈ្មោះបោះឆ្នោតថ្នាក់ឃុំ-សង្កាត់ នាពេលខាងមុខ។ រហូតមកដល់ពេលនេះ គ.ជ.ប បានសេចក្តីជូនដំណឹងជាផ្លូវការហើយ ជុំវិញកាលបរិច្ឆេទនៃការចុះឈ្មោះបោះឆ្នោត។ យោងតាមសេចក្តីជូនដំណឹង គ.ជ.ប នឹងចាប់ផ្តើមចុះឈ្មោះបោះឆ្នោត នៅថ្ងៃទី១ កញ្ញា ឆ្នាំ២០១៦ តទៅ៕
Tag:
សហភាពអឺរ៉ុប
គជប
ហង្ស ពុទ្ធា
សម្ភារ
© រក្សាសិទ្ធិដោយ thmeythmey.com