បើរៀបចំបញ្ជីបោះឆ្នោតបានរលូន ការងារបោះឆ្នោតឃុំ-សង្កាត់នឹងបានជោគជ័យ

ជាតិ

បើរៀបចំបញ្ជីបោះឆ្នោតបានរលូន ការងារបោះឆ្នោតឃុំ-សង្កាត់នឹងបានជោគជ័យ

05, Aug 2016 , 9:59 pm

រូបភាព

ដោយ: ម៉ៅ សុផា

ភ្នំពេញ៖ បញ្ជីឈ្មោះបោះឆ្នោត គឺចំណុចដ៏សំខាន់ ដើម្បីឈានទៅដល់ការរៀបចំការបោះឆ្នោត ដោយជោគជ័យ។ ដើម្បីទទួលបានជោគជ័យក្នុងការរៀបចំបញ្ជីឈ្មោះអ្នកបោះឆ្នោត គណៈកម្មាធិការជាតិរៀបចំការបោះឆ្នោត ត្រូវពឹងផ្អែកលើកត្តាជាច្រើន ដូចជា ភាគីពាក់ព័ន្ធ ធនធានមនុស្ស និងសម្ភារបច្ចេកទេសជាដើម។

លោក ស៊ិក ប៊ុនហុក ប្រធានគជប បានលើកឡើងថា ប្រសិនបើការចុះឈ្មោះបោះឆ្នោត ប្រព្រឹត្តទៅដោយរលូន និងមានប្រសិទ្ធភាពខ្ពស់ ដូចការគ្រោងទុកមែននោះ គជប ហាក់ដូចជាទទួលបានជោគជ័យពី៦០ទៅ៧០ភាគរយរួចជាស្រេចហើយ ក្នុងការរៀបចំបោះឆ្នោតថ្នាក់ឃុំ-សង្កាត់ នាឆ្នាំ២០១៧។ លោក ស៊ិក ប៊ុនហុក បន្ថែមថា ដើម្បីទទួលបានជោគជ័យក្នុងការរៀបចំបញ្ជីឈ្មោះបោះឆ្នោត និងការបោះឆ្នោតនាពេលខាងមុខ គជប ត្រូវតែបន្តសហការជាមួយនឹងភាគីពាក់ព័ន្ធផ្សេងៗ។

ដៃគូដែលប្រធានគជបរូបនេះ ចាត់ទុកថាសំខាន់ ហើយមិនអាចខ្វះបាននោះ គឺ គណបក្សនយោបាយ, អ្នកបោះឆ្នោត, រដ្ឋសភា, រដ្ឋាភិបាល, អង្គភាពដោះស្រាយជម្លោះ, ប្រព័ន្ធតុលាការ, អង្គការក្រៅរដ្ឋាភិបាល, ប្រព័ន្ធផ្សព្វផ្សាយ, សហគមន៍អន្តរជាតិដែលជាម្ចាស់ជំនួយ, អ្នកត្រួតពិនិត្យ និង អ្នកអង្កេតការណ៍ក្នុងការបោះឆ្នោត។

ការថ្លែងរបស់លោក ស៊ិក ប៊ុនហុក ខាងលើ ធ្វើឡើងក្នុងកិច្ចពិភាក្សាស្តីពី «ការត្រៀមរៀបចំការចុះឈ្មោះបោះឆ្នោត» ដែលប្រព្រឹត្តទៅនៅសាលសន្និសីទគជប នាថ្ងៃទី៥ ខែសីហា ឆ្នាំ២០១៦។ការពិភាក្សា ដោយបើកចំហនេះ មានការចូលរួមពីភាគីពាក់ព័ន្ធនានាផងដែរ ដូចជាតំណាងគណបក្សនយោបាយ តំណាងអង្គការក្រៅរដ្ឋាភិបាល និងតំណាងសហគមន៍អន្តរជាតិ ដែលជាម្ចាស់ជំនួយជាដើម។

យោងតាមទិន្នន័យរបស់គជប ដែលត្រូវបានផ្សព្វផ្សាយក្នុងកិច្ចប្រជុំនោះ ប្រជាពលរដ្ឋកម្ពុជា ដែលមានអាយុចាប់ពី១៨ឆ្នាំឡើងទៅ មានចំនួន ប្រមាណ៩លាននាក់។ ក្នុងចំណោមប្រជាពលរដ្ឋទាំងនោះ ប្រជាពលរដ្ឋប្រមាណ៧លាន មានអត្តសញ្ញាតបណ្ណហើយប្រហែលជា២លានអ្នកទៀត នៅមិនទាន់មានអត្តសញ្ញាណបណ្ណនៅឡើយទេ។ យ៉ាងណាក៏ដោយ គជបនៅតែបន្តជំរុញឲ្យក្រសួងមហាផ្ទៃ រួមទាំងអាជ្ញាធរ ផ្តល់អត្តសញ្ញាណបណ្ណគំរូថ្មី ដល់ប្រជាពលរដ្ឋ ដើម្បីឲ្យពួកគេ អាចចូលរួមចុះឈ្មោះបោះឆ្នោត។

ទាក់នឹងនឹងការចុះឈ្មោះបោះឆ្នោតនេះ សហគមន៍អន្តរជាតិមួយចំនួន បានផ្តល់ជំនួយផ្នែកសម្ភារបច្ចេកទេសជាច្រើន ទៅដល់គជប។ ជាក់ស្តែង កាលពីពេលថ្មីៗនេះ សហភាពអឺរ៉ុបបានប្រគល់ឲ្យគជប នូវកំព្យូទ័រចំនួន ២៦០០គ្រឿង រួមទាំងសម្ភារផ្សេងៗទៀត ដូចជាកាមេរ៉ាសុវត្ថិភាព (Security Camera), ម៉ាស៊ីនព្រីន (Printer), ទឹកខ្មៅ, ឧបករណ៍ផ្ទុកភ្លើង (Power Bank), ឧបករណ៍ផ្ទុកឯកសារ (Flash) និងឧបករណ៍ស្កេនមេដៃ ជាដើម ។ កំព្យូទ័រ និងសម្ភារទាំងនោះ មានតម្លៃប្រមាណជា៧លានដុល្លារ។

សូមបញ្ជាក់ថា គ.ជ.ប បានត្រៀមថវិកាចំនួន២៣លានដុល្លារផងដែរ ដើម្បីចាយវាយក្នុងអំឡុងពេលនៃការចុះឈ្មោះបោះឆ្នោតថ្នាក់ឃុំ-សង្កាត់ នាឆ្នាំ២០១៧ ខាងមុខ។ រហូតមកដល់ពេលនេះ គ.ជ.ប បានចេញសេចក្តីជូនដំណឹងជាផ្លូវការហើយ ជុំវិញកាលបរិច្ឆេទនៃការចុះឈ្មោះបោះឆ្នោត។ យោងតាមសេចក្តីជូនដំណឹងនោះ គ.ជ.ប នឹងចាប់ផ្តើមចុះឈ្មោះបោះឆ្នោត នៅថ្ងៃទី១ កញ្ញា ឆ្នាំ២០១៦ តទៅ៕