ប្រធានាធិបតីរុស្ស៊ីលោក វ្ល៉ាឌីមៀ ពូទីន ត្រៀមជួបជាមួយនាយករដ្ឋមន្ត្រីជប៉ុនលោក ស៊ីនហ្សូអាបេ និងប្រធានាធិបតីកួរ៉េលោកស្រី ប៉ាក ហ្គឺនហេ នៅក្នុងខែកញ្ញានៅទីក្រុង Vladivostok។ ជំនួបនេះធ្វើឡើងក្នុងក្របខណ្ឌនៃកិច្ចប្រជុំវេទិកាសេដ្ឋកិច្ចបូព៌ា ហើយប្រធានបទជាច្រើនរួមទាំងបញ្ហាសន្តិសុខនិងនុយក្លេអ៊ែរកូរ៉េខាងជើងអាចនឹងស្ថិតនៅក្នុងរបៀបវារៈនៃជំនួបទ្វេភាគីនេះ។
អ្នកនាំពាក្យវិមានក្រេមឡាំងលោក Dmitry Peskov បានប្រកាសថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងជួបជាមួយនាយករដ្ឋមន្ត្រីជប៉ុនលោក ស៊ីនហ្សូ អាបេ និងប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ នៅក្នុងទីក្រុង Vladivostok នៅដើមខែកញ្ញាខាងមុខនេះ។
មេដឹកនាំនៃប្រទេសទាំងពីរជប៉ុននិងកូរ៉េខាងត្បូងនេះនឹងអញ្ជើញចូលរួមក្នុងវេទិកាសេដ្ឋកិច្ចបូព៌ា ដែលរុស្ស៊ីនឹងធ្វើជាម្ចាស់ផ្ទះចាប់ពីថ្ងៃ ២ ដល់ថ្ងៃ ៣ ខែកញ្ញា។ វេទិការសេដ្ឋកិច្ចបូព៌ាដែលធ្វើឡើងនៅខែកញ្ញាខាងមុខនេះ ជាសន្និសីទធុរៈកិច្ចប្រចាំឆ្នាំលើកទី២ ហើយដែលរៀបចំដោយរុស្ស៊ី។ ហើយវាមានការចូលរួមពីបណ្តាអ្នកជំនួញ និងអ្នកជំនាញមកពីប្រទេសជាច្រើនក្នុងនោះមាន ចិន, ជប៉ុន, កូរ៉េខាងត្បូង, ឥណ្ឌា, អូស្ត្រាលី, វៀតណាម, អាមេរិក, និងសិង្ហបុរីផងដែរ។
ត្រលប់មកវិញ បើតាមអ្នកនាំពាក្យដដែល ដែលស្រង់សម្តីដោយទីភ្នាក់ងារព័ត៌មានរុស្ស៊ី TASS ជំនួបទ្វេភាគី រវាងលោក ពូទីន និងលោក អាបេ ក៏ដូចជារវាងលោក ពូទីន ជាមួយលោកស្រី ប៉ាក នឹងត្រូវរៀបចំឡើងដាច់ដោយឡែកពីវេទិកានេះ ហើយគេរំពឹងថា ប្រធានបទសំខាន់ៗជាច្រើនទាំងសន្តិសុខ សេដ្ឋកិច្ច និងនយោបាយក្តី នឹងត្រូវលើកយកមកពិភាក្សាក្នុងជំនួបនេះផងដែរ។
និយាយទៅ ជំនួបនៅខែកញ្ញារវាងលោក ពូទីន និងលោក អាបេ នឹងក្លាយជាជំនួបទ្វេភាគីលើកទី២ ហើយគ្រាន់តែក្នុងឆ្នាំ ២០១៦នេះ។ ក្នុងខែឧសភាកន្លងទៅ លោក អាបេ បានស្កាត់ជួបលោក ពូទីន ម្តងដែរនៅតំបន់ Sochi សមុទ្រខ្មៅ ប៉ុន្តែវាមិនមែនជាជំនួបផ្លូវការឡើយ។ កាលនោះមេដឹកនាំទាំងពីរបានជជែកពិភាក្សាគ្នាលើបញ្ហាជម្លោះកោះគូរីល និងការបង្កើតកិច្ចព្រមព្រៀងសន្តិភាពផង។ ប៉ុន្តែមិនមានលទ្ធផលច្រើនកើតឡើងឡើយក្រោយជំនួបនេះ។
ដូច្នេះ ជំនួបខាងមុខនេះ នឹងក្លាយជាវេទិកាសំខាន់ថ្មីមួយទៀតសម្រាប់មេដឹកនាំទាំងពីរពិភាក្សារកដំណោះស្រាយនិងពង្រឹងកិច្ចសហប្រតិបត្តិការរួមគ្នាផងដែរ។
ចំណែក លោកស្រី ប៉ាក ហ្គឺនហេ ប្រហែលជានឹងឆ្លៀតយកឱកាសក្នុងជំនួបជាមួយលោក ពូទីន ដើម្បីពិភាក្សាឲ្យបានស៊ីជម្រៅពីទំនាក់ទំនងសេដ្ឋកិច្ច និងសន្តិសុខផង។ វាជារឿងមិនអាចចៀសផុតឡើយ ដែលមេដឹកនាំកូរ៉េខាងត្បូងនឹងលើកយកបញ្ហានុយក្លេអ៊ែរកូរ៉េខាងត្បូងមកពិភាក្សាជាមួយសមភាគីរុស្ស៊ី។ កូរ៉េខាងត្បូងសង្ឃឹមថា រុស្ស៊ីអាចនឹងដើរតួនាទីសំខាន់ក្នុងការជំរុញឲ្យក្រុងព្យុងយ៉ាងត្រលប់ចូលតុចរចាវិញក្នុងក្របខណ្ឌកិច្ចពិភាក្សា៦ភាគី ដែលជាប់គាំងអស់ពេលយូរមកហើយនោះ៕