អន្តរជាតិ
ព្រះសង្ឃមួយក្រុមនៅកាណាដាទិញបង្កងដើម្បីព្រលែងចូលសមុទ្រវិញ
× ក្រុមព្រះសង្ឃពុទ្ធសាសនាមួយក្រុមនៅកោះ Prince Edward Island ប្រទេសកាណាដា បាននិមន្តទៅតាមផ្សារនានាដើម្បីទិញបង្កង ដែលសរុបប្រមាណ៣០០គីឡូក្រាមដើម្បីព្រលែងចូលទៅក្នុងសមុទ្រវិញ។
«សង្ឃឹមថា យើងអាចជួយឲ្យបង្កងទាំងនោះ គេចផុតពីអន្ទាក់នានា»។ នេះជាសង្ឃដីការបស់ព្រះអង្គ Dan នៃសមាគម Great Enlightenment Buddhist Institute Society ដែលស្ថិតនៅតំបន់ Little Sands នៃកោះ Prince Edward Island ប្រទេសកាណាដា។
តាមការដកស្រង់របស់សារព័ត៌មាន CBC ព្រះអង្គ Dan បានបញ្ជាក់ថា ការចុះនិមន្តទិញបង្កងតាមផ្សារនោះ មិនមែនជាយុទ្ធនាការប្រឆាំងអ្វីមួយនោះឡើយ។ ព្រះអង្គបានលើកថា៖ «ក្រុមអាត្មាគោរពរាល់ជម្រើសបរិភៅករបស់មនុស្ស ហើយទង្វើរបស់យើងមិនមែនចង់ឲ្យមនុស្សទាំងអស់បរិភោគអាហារបួសនោះឡើយ»។
ព្រះអង្គបានពន្យល់ថា សកម្មភាពរបស់សមាគម Great Enlightenment Buddhist Institute Society ចង់បណ្តុះចិត្តករុណាមិនមែនសម្រាប់តែបង្កងនោះឡើយ គឺរាល់ជីវិតទាំងអស់លើលោក ដែលអាចជន្លេន រុយ ឬសត្វអ្វីមួយ។
មុននឹងព្រលែងបង្កងចូលសមុទ្រ ក្រុមព្រះសង្ឃបានរៀបចំពិធីសាសនាប្រហែល២០នាទី ដោយមានការគាំទ្រពីបណ្តាពលរដ្ឋនៅលើកោះ រួមទាំងអ្នកនេសាទផងដែរ។ «ក្រុមអ្នកនេសាទ ប្រាប់យើងពីកន្លែងដែលបង្កងអាចមានសុវត្ថិភាព ហើយពួកគេនឹងមិនចាប់ពួកវាមកវិញនោះឡើយ»។ នេះជាការបញ្ជាក់របស់ព្រះអង្គ Dan៕
Tag:
កាណាដា
ព្រះពុទ្ធសាសនា
© រក្សាសិទ្ធិដោយ thmeythmey.com