អន្តរជាតិ
នយោបាយអន្តរជាតិ
ជប៉ុន ទទូចឲ្យមេដឹកនាំទាំងអស់យកគំរូលោកអូបាម៉ាក្នុងការទៅទស្សនកិច្ចតំបន់ទម្លាក់គ្រាប់បែកបរមាណូ លោក អូបាម៉ា គោរពវិញ្ញាណក្ខន្ធនៅហ៊ីរ៉ូស៊ីម៉ា កាលពីខែឧសភា ដោយ Xinhua
×
គឺថ្ងៃទី០៦ ខែសីហា នេះហើយ ដែលជាថ្ងៃដែលអាមេរិកទម្លាក់គ្រាប់បែកបរមាណូនៅក្នុងកោះហ៊ីរ៉ូស៊ីម៉ារបស់ជប៉ុន។ នាឱកាសនៃការរម្លឹកខួបលើកទី៧១នៃសោកនាដកកម្មនេះ រដ្ឋាភិបាលក្រុងតូក្យូ បានទទូចឲ្យមេដឹកនាំពិភពលោកយកគំរូតាមប្រធានាធិបតីអាមេរិក លោក បារ៉ាក់ អូបាម៉ាក្នុងការមកទស្សនកិច្ចនៅតំបន់ទម្លាក់គ្រាប់បែកនេះដើម្បីស្វែងយល់ពីព្យសនកម្មនៃការប្រើប្រាស់អាវុធប្រល័យលោកមួយនេះ។
ក្នុងសុន្ទរកថាស្តីពីសេចក្តីប្រកាសសន្តិភាពនាពិធីរម្លឹកខួបប្រចាំឆ្នាំនៃការទម្លាក់គ្រាប់បែបបរមាណូនៅកោះហ៊ីរ៉ូស៊ីម៉ា នៅថ្ងៃសៅរ៍នេះ អភិបាលក្រុងហ៊ីរ៉ូស៊ីម៉ា លោក Kazumi Matsui បានទទូចឲ្យមេដឹកនាំពិភពលោកចូលរួមសកម្មភាពបន្ថែមទៀតក្នុងការលុបបំបាត់អាវុធនុយក្លេអ៊ែរ និងយកគំរូតាមលោកប្រធានាធិបតីអាមេរិក បារ៉ាក់ អូបាម៉ា ដែលបានបំពេញទស្សនកិច្ចនៅក្នុងតំបន់កើតហេតុនោះ។ នេះបើយោងតាមសារព័ត៌មាន Japan Times។
សូមរម្លឹកផងដែរថា ថ្ងៃ ៦ សីហា ឆ្នាំ១៩៤៥ នៅម៉ោងប្រហែល ២ ៖ ៤៥នាទីព្រឹក (ម៉ោងប្រទេសជប៉ុន) យន្តហោះទម្លាក់គ្រាប់បែក B-29 អាមេរិកមួយគ្រឿងឈ្មោះ Enola Gay បានហោះចេញពីកោះ Tinian ដើម្បីកម្ទេចទីក្រុងជប៉ុន ហ៊ីរ៉ូស៊ីម៉ា។ យន្តហោះនេះបានធ្វើដំណើរមកដល់ទីក្រុងហ៊ីរ៉ូស៊ីម៉ា (Hiroshima) និងដាច់ចិត្តទម្លាក់គ្រាប់នៅម៉ោង៨៖១៦នាទីព្រឹក។ រឿងដែលរន្ធត់បំផុតនោះគ្រាន់តែគ្រាប់បែកបរមាណូធ្លាក់ដល់ដីភ្លាម ទីក្រុងទាំងមូលខ្ទេចស្ទើរគ្មានសល់ ហើយមនុស្សប្រហែល ៨ម៉ឺននាក់ស្លាប់ភ្លាមៗ និងមនុស្សប្រហែល៣៥០០០នាក់ទៀតរងរបួសផងដែរ ។
អ្វីគួរកត់សម្គាល់នោះ គ្រាប់បែកបរមាណូដែលសម្លាប់មនុស្សរាប់សែននាក់នៅទីក្រុង ហ៊ីរ៉ូស៊ីម៉ាត្រឹមជាគ្រាប់បែកទីមួយ ហើយត្រូវបានគេស្គាល់ឈ្មោះថា Little Boy ។ បីថ្ងៃក្រោយការទម្លាក់គ្រាប់នេះ គ្រាប់បែកបរមាណូមួយគ្រាប់ទៀតត្រូវបានទាហានជើងអាកាសអាមេរិកទម្លាក់កម្ទេចទីក្រុងជប៉ុនមួយទៀត គឺ ណាកាសាគី (Nagasaki) ដែលបណ្តាលឲ្យប្រជាជនរាប់ម៉ឺននាក់ផ្សេងទៀតស្លាប់យ៉ាងអាណោចអាធម។
ទាក់ទិនសោកនាដកម្មនៅហ៊ីរ៉ូស៊ីម៉ានេះដែរ លោក បារ៉ាក់ អូបាម៉ា គឺជាប្រធានាធិបតីអាមេរិកដំបូងបំផុតដែលអញ្ជើញទៅគោរពវិញ្ញាណក្ខ័ន្ធប្រជាជនជប៉ុនដែលបានស្លាប់បាត់បង់ជីវិតនៅហ៊ីរ៉ូស៊ីម៉ាកាលពីខែឧសភាកន្លងទៅ ប៉ុន្តែលោកមិនបានសុំអភ័យទោសចំពោះការទម្លាក់គ្រាប់បែកនេះឡើយ។ យ៉ាងណាមិញ លោកបានឆ្លៀតផ្ញើសារទៅកាន់មេដឹកនាំឯទៀតជាពិសេសប្រទេសដែលមានអាវុធនុយក្លេអ៊ែរទប់ស្កាត់កុំឲ្យមានការសាយភាយ ឬឈានដល់ការប្រើប្រាស់អាវុធប្រល័យលោកនេះជាថ្មីទៀត។ ប្រជាជនជប៉ុនសង្ឃឹមថា បណ្តាមេដឹកនាំពិភពលោកផ្សេងទៀតនឹងធ្វើតាមលោក បារ៉ាក់ អូបាម៉ា ហើយជប៉ុនក៏ប្តេជ្ញាបន្តតួនាទីជាតស៊ូមតិជំរុញឲ្យមានការធ្វើឲ្យពិភពលោកក្លាយជាពិភពដែលគ្មានអាវុធនុយក្លេអ៊ែរថែមទៀតផង៕
Tag:
ជប៉ុន
ហ៊ីរ៉ូស៊ីម៉ា
ណាកាសាគី
© រក្សាសិទ្ធិដោយ thmeythmey.com