ជាតិ
×![]()
សៀមរាប៖ ការសម្រេចដកបេក្ខភាពចេញពីបញ្ជីប្រឡងបាក់ឌុបចំនួន ១៤០នាក់របស់វិទ្យាល័យ១០មករា ឆ្នាំ១៩៧៩ បានធ្វើឲ្យមានការភ្ញាក់ផ្អើលមួយកើតឡើង។ ចំនួននេះហាក់ច្រើនបន្តិច បើធៀបនឹងសាលារៀនដទៃនៅក្នុងប្រទេស។ ថ្នាក់គ្រប់គ្រងវិទ្យាល័យ១០មករា ក្នុងខេត្តសៀមរាបបាននិយាយថា តួលេខនេះមានការយោគយល់ខ្លះៗហើយ ហើយសាលាក៏គ្មានដំណោះស្រាយអ្វីផ្សេងទៀតនោះដែរ។
លោក ប៊ី ប៊ុនសុផុន្នី ជំនួយការនាយកសលាវិទ្យាល័យ១០មករា បានប្រាប់សារព័ត៌មានថ្មីៗនៅថ្ងៃទី៦ សីហានេះថា ក្រោយកិច្ចប្រជុំជាមួយខាងមន្ទីរអប់រំ គឺសាលានៅតែរក្សាគោលជំហរ រឿងបញ្ជីដកបេក្ខភាពសិស្សទាំង១៤០នាក់ដដែល។ កាលពីម្សិលមិញ មន្ទីរអប់រំ បានបើកកិច្ចប្រជុំមួយ ដើម្បីត្រួតពិនិត្យ និងរកដំណោះស្រាយ ចំពោះតួលេខច្រើនរបស់សិស្សសាលា១០មករា ដែលមិនអាចចូលរួមប្រឡងបាក់ឌុបនៅឆ្នាំនេះបាន។
លោក ប៊ី ប៊ុនសុផុន្នី បានពន្យល់បន្ថែមថា តាមការពិនិត្យជាក់ស្តែងឃើញថា សិស្សដែលនៅក្នុងបញ្ជីដកបេក្ខភាព គឺពួកគេពិតជាគ្មានលទ្ធភាពគ្រប់គ្រាន់ ដើម្បីចូលប្រឡងបានមែន។ លោកបន្តថា៖« ទីមួយពួកគាត់អត់បានដាក់ពាក្យ ទីពីរ អត់ប្រឡងឆមាសទី២ និងទីបី ធ្លាក់មធ្យមភាគ។ យើងមានហេតុផលត្រឹមត្រូវ សូម្បីអាណាព្យាបាលពួកគេ ដែលមកដល់សាលា ក៏គាត់ទទួលស្គាល់ថា កូនគាត់មិនដែលមករៀនមែន...»។
ជំនួយការនាយកសាលា១០មករា បានបញ្ជាក់ទៀតថា៖«...នេះយើងជួយសម្រួលសិស្សខ្លះអវត្តមានច្រើន យោគយល់អីខ្លះ បើតាមជាក់ស្តែង មាន២០០ទៅ៣០០នាក់ឯណោះ ដែលត្រូវមានឈ្មោះក្នុងបញ្ជីដកបេក្ខភាពនេះ...»។
ទាក់ទងនឹងបញ្ហានេះដែរ ប្រធានមន្ទីរអប់រំ យុវជន និងកីឡាខេត្តសៀមរាប លោក សយ ទិត្យាវង្ស បានឲ្យដឹងថា ក្រោយទទួលបាន លទ្ធផលនៃកិច្ចប្រជុំកាលពីម្សិលមិញជាមួយខាងតំណាងវិទ្យាល័យ ១០ មករា ហើយលោកនឹងប្រជុំជាមួយថ្នាក់ដឹកនាំមន្ទីរបន្តទៀត នៅរសៀលថ្ងៃទី៦ សីហានេះ។
គួររម្លឹកថា វិទ្យាល័យ១០មករា បានសម្រេចដកបេក្ខភាពសិស្សចំនួន ១៤០នាក់មិនឲ្យប្រឡងបាក់ឌុប ដោយហេតុផល៣សំខាន់ៗ ដូចជាអត់បានដាក់ពាក្យប្រឡង អត់ចូលប្រឡងឆមាសទី២ និងធ្លាក់មធ្យមភាគ។ អាណាព្យាបាលខ្លះអះអាងថា បញ្ហានេះទំនងជាចេតនារបស់លោកគ្រូអ្នកគ្រូ ដែលខឹងសិស្សមិនបានរៀនគួរជាមួយខ្លួនជាដើម៕
© រក្សាសិទ្ធិដោយ thmeythmey.com
