កីឡាអន្តរជាតិ
អន្តរជាតិ
លោកយាយអាយុ១០១ឆ្នាំហែលទឹកចម្ងាយ៤០០ម៉ែត្រក្នុងរយៈពេល២៦នាទី
×
លោកយាយ Mieko Nagaoka ដែលនឹងឈានដល់វ័យ១០២ឆ្នាំនាពេលខាងមុខ មិនដែលបោះបង់ការតស៊ូរបស់ខ្លួនក្នុងការប្រកួតប្រជែងហែលទឹកនោះឡើយ។ កាលពីពេលថ្មីៗកន្លងមកនេះ លោកយាយបានប្រើថេរវេលា ២៦នាទី និង១៦វិនាទី លើការហែលសេរីចម្ងាយ៤០០ម៉ែត្រក្នុងការប្រកួតមួយដែលរៀបចំដោយសមាគមកីឡាហែលទឹកជប៉ុន។
«ខ្ញុំចង់បន្តហែលទឹករហូតដល់អាយុ១០៥ឆ្នាំ ឬលើសពីនេះ»។ នេះជាការបញ្ជាក់យ៉ាងម៉ឺងម៉ាត់របស់លោកយាយ Mieko Nagaoka អាយុ១០១ឆ្នាំ ក្នុងបទសម្ភាសមួយជាមួយទីភ្នាក់ងារព័ត៌មាន AFP។ លោកយាយបានអះអាងថា នៅចន្លោះពីអាយុ១០០ ឆ្នាំ១០៤ ឆ្នាំ គាត់ចង់ចូលការប្រកួតប្រជែងធំៗចំនួន៩លើក ហើយអាចឈានដល់ការហែលចម្ងាយ១៥០០ម៉ែត្រ។
កើតនៅឆ្នាំ១៩១៤ នៅតំបន់ Yamaguchi លោកយាយ Nagaoka តែងតែនាំភាពភ្ញាក់ផ្អើលដល់គ្រូបង្វឹក និងកូនចៅរបស់ខ្លួន។ កូនប្រុសរបស់គាត់ឈ្មោះ Hiroyuki អាយុ៧៦ឆ្នាំ បានរៀបរាប់ថា ម្តាយរបស់ខ្លួនតែងទទួលបាននូវភាពរីករាយនៅពេលដែលគាត់ចុះហែលទឹក ហើយចាប់តាំងពីអាយុ៩០ឆ្នាំមក គាត់ទទួលបានកំណត់ត្រាថ្មីៗជាបន្តបន្ទាប់ពីការប្រកួត។
លោកយាយ Nagaoka បានរៀបរាប់ប្រាប់ AFP ថា សុខភាពរបស់គាត់គ្មានបញ្ហាអ្វីនោះឡើយ។ គាត់បានលើកឡើងថា៖ «វិធីនាំឲ្យមានអាយុវែងនោះ គឺញ៉ាំឲ្យបានទៀងទាត់ និងមានសកម្មភាពជាប្រចាំ។ មិនល្អនោះឡើយក្នុងអង្គុយនៅតែមួយកន្លែងសម្រាប់មនុស្សចំណាស់ដូចជារូបខ្ញុំ»។
នាការប្រកួតដែលរៀបចំដោយសមាគមកីឡាហែលទឹកនៅតំបន់ Chiba ជាយក្រុងតូក្យូ កន្លងមក លោកយាយបានហែលទៅដល់ទីក្រោយជ័យលាភីលេខមួយចំនួន១៧នាទី។ អ្នកដែលទទួលបានចំណាត់ថ្នាក់លេខមួយ គឺលោកយាយ Etsuko Azumi អាយុ៨០ឆ្នាំ។
បច្ចុប្បន្ន លោកយាយ Nagaoka រៀនហែលបីលើកក្នុងមួយសប្តាហ៍ ដោយមានលោក Shintaro Sawada អាយុ៤១ឆ្នាំ ជាគ្រូបង្វឹក។ ទោះបីជាយ៉ាងណាក៏ដោយ លោកយាយមានបញ្ហាត្រចៀកដែលធ្វើឲ្យលោកយាយមិនសូវលឺគេនិយាយនោះឡើយ៕
© រក្សាសិទ្ធិដោយ thmeythmey.com