អន្តរជាតិ
នយោបាយអន្តរជាតិ
ចិន យកទីតាំងសមុទ្រចិនខាងត្បូងហ្វឹកហ្វឺនកងទ័ពអាកាសពីការប្រយុទ្ធ និងល្បាត
×
កងកម្លាំងយន្តហោះចម្បាំងនៃកងទ័ពអាកាសចិន បានបញ្ចប់ការហ្វឹកហ្វឺនលើវិញ្ញាសារនៃការល្បាតតាមដែនអាកាសនៅតំបន់ប្រជុំកោះ Nansha (ឬស្ព្រាតលី) នៃសមុទ្រចិនខាងត្បូង។ ការហ្វឹកហ្វឺននេះ មានការចូលរួមពីយន្តទម្លាក់គ្រាប់បែកប្រភេទ H-6K និងយន្តហោះចម្បាំងប្រភេទ Su-30 ជាច្រើនគ្រឿង។
អ្នកនាំពាក្យកងទ័ពជើងអាកាសនៃកងទ័ពរំដោះប្រជាជនចិន លោក Shen Jinke បានថ្លែងបញ្ជាក់ថា ការហោះហើរនៅលំហអាកាសសមុទ្រចិនខាងត្បូងគឺជាផ្នែកមួយនៃការហ្វឹកហ្វឺនប្រយុទ្ធដើម្បីបង្កើនសមត្ថភាពកងទ័ពអាកាសក្នុងការឆ្លើយតបទៅនឹងការគំរាមកំហែងសន្តិសុខផ្សេងៗ។
អ្នកនាំពាក្យរូបនោះ ក៏បានកំណត់សម្គាល់ឲ្យបានដឹងដែរថា កងកម្លាំងជើងអាកាសនៃកងទ័ពរំដោះប្រជាជនចិន ដែលត្រូវបានបង្កើតអស់រយៈពេល៦៧ឆ្នាំហើយ បានរៀបចំការល្បាតជាទៀងទាត់នៅសមុទ្រចិនខាងត្បូងដើម្បីរក្សាសុវត្ថិភាពអធិបតេយ្យ សន្តិសុខ និងផលប្រយោជន៍ដែនសមុទ្ររបស់ប្រទេស។
លោក ក៏បានបញ្ជាក់ដែរថា កងទ័ពអាកាសកន្លងមកបានបំពេញបេសកម្មក្នុងការហ្វឹកហ្វឺនជាច្រើនបន្តបន្ទាប់ដូចជា សមយុទ្ធក្នុងការព្រមានការពារដែនអាកាស, ការប្រយុទ្ធក្នុងដែនអាកាស និងការល្បាតនៅលើដែនកោះជាដើម។
បើទោះបីជារដ្ឋាភិបាលក្រុងប៉េកាំង អះអាងថា ការហ្វឹកហ្វឹន និងសមយុទ្ធនៅសមុទ្រចិនខាងត្បូង ត្រូវបានធ្វើឡើងតាមទម្លាប់ក៏ដោយ គេសង្កេតឃើញថា រយៈពេលចុងក្រោយនេះ រដ្ឋាភិបាលក្រុងប៉េកាំង បានកម្តៅសាច់ដុំយោធាជាញឹកញាប់នៅសមុទ្រចិនខាងត្បូងទាំងដែនអាកាស និងដែនទឹក។ ហើយ វា ក៏ស្របទៅនឹងការប្រកាសសាលក្រមសមុទ្រចិនខាត្បូងរបស់តុលាការអន្តរជាតិក្រុងឡាអេដែលសម្រេចឲ្យចិនចាញ់ក្តីហ្វីលីពីនកាលពីខែកក្កដាកន្លងទៅផងដែរនោះ។
សូមជម្រាបផងដែរថា បញ្ហាតំបន់សមុទ្រចិនខាងត្បូងដែលពោរពេញទៅដោយធនធានធម្មជាតិ ក៏ដូចជាជាតំបន់ពាណិជ្ជកម្មដែនទឹកដ៏មមាញឹករបស់ពិភពលោកលំដាប់ទី២ មានរដ្ឋពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន វៀតណាម និងចិន៕
Tag:
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com