កីឡាអន្តរជាតិ
អន្តរជាតិ
Jeremy Menez ដាច់ត្រចៀកនាការប្រកួតដំបូងឲ្យក្លិប Bordeaux
× កីឡាករ Jeremy Menez មានអនុស្សាវរីយ៍ដែលមិនអាចបំភ្លេចបានឡើយ នាថ្ងៃប្រកួតដំបូងឲ្យក្លិបបាល់ទាត់បារាំង Girondins de Bordeaux ក្រោយផ្ទេរមកពីក្លិប AC Milan របស់អ៊ីតាលី។
បន្ទាប់ពីបង្ហាញខ្លួនបានត្រឹម១០នាទីដំបូងប៉ុណ្ណោះក្នុងការប្រកួតមិត្តភាពជាមួយក្លិប Lorient កីឡាករ Jeremy Menez ដែលទើបផ្ទេរពី AC Milan បានប៉ះទង្គិចជាមួយខ្សែបម្រើ Didier Ndong នៃក្លិប Lorient។ ត្រចៀកស្តាំរបស់ Menez ចំមួយទំហឹងស្បែកជើងរបស់ Ndong រហូតដាច់ទាំងដុំ។
ក្លិប Bordeaux បានចេញសេចក្តីប្រកាសព័ត៌មានថា ខ្សែប្រយុទ្ធបារាំង Jeremy Menez ស្ថិតនៅក្នុងស្ថានភាពមួយដែលមិនទាន់អាចវាយតម្លៃបាន។ រូបគេត្រូវរង់ចាំការព្យាបាលឲ្យបានធូរស្បើយ ដែលគេមិនទាន់ដឹងថា យូរ ឬឆាប់នោះឡើយ។
លោក Jocelyn Goennec គ្រូបង្វឹកក្លិប Bordeaux បានអះអាងថា៖ «ត្រចៀករបស់ Jeremy Menez បានដាច់ចេញជាពីរ […] ទោះជាវាបង្កឡើយដោយអចេតនាក៏ដោយ ប៉ុន្តែវាកើតចេញពីការលេងរបៀបកាចៗ »។
ខ្សែបម្រើហ្គាបុង Didier Ndong បានសម្តែងការសុំទោសចំពោះឧប្បត្តិហេតុដែលបានកើតឡើង ដោយអចេតនា។ «ខ្ញុំគាំទ្រ និងលើកទឹកចិត្តឲ្យគាត់ឆាប់ជា ហើយយើងរំពឹងជួបគ្នានាពេលខាងមុខសម្រាប់ការប្រកួតក្របខណ្ឌ Ligue 1» ។
បើទោះបីជាយ៉ាងណាក៏ដោយ នាការប្រកួតមិត្តភាពនោះ Bordeaux បានទទួលជ័យជម្នះ ៣-០ លើ Lorient។ ជាមួយគ្នានេះ គេក៏សង្កេតឃើញថា Ndong បានបង្កឲ្យកីឡាករផ្សេងទៀតរងរបួសនៅលើទីលានផងដែរ៕
© រក្សាសិទ្ធិដោយ thmeythmey.com