អន្តរជាតិ
អធិរាជជប៉ុន អាគីហ៊ីតុ បង្ហាញបំណងដាក់រាជ្យ ទោះជារដ្ឋធម្មនុញ្ញមិនអនុញ្ញាត
× នៅថ្ងៃចន្ទនេះ ព្រះអធិរាជជប៉ុនអាគីហ៊ីតុ បានមានព្រះរាជបន្ទូលដ៏កម្រមួយដែលបង្ហាញអំពីព្រះរាជបំណងដាក់រាជ្យសម្បត្តិរបស់ព្រះអង្គ។ ព្រះរាជបំណងយ៉ាងនេះត្រូវបានគេមើលឃើញតាមរយៈ ព្រះរាជសារមួយ ដែលព្រះអង្គបានលើកឡើងច្រើនអំពីស្ថានភាពនៃការធ្លាក់ចុះនៃព្រះរាជសុខភាព និងសមត្ថភាពនៃការបំពេញព្រះរាជតួនាទី។ នៅពេលនេះរដ្ឋាភិបាលជប៉ុនកំពុងពិចារណាលើព្រះរាជបំណងរបស់អធិរាជជប៉ុន ខណៈច្បាប់ជប៉ុនចែងមិនឲ្យអធិរាជដាក់រាជ្យ។
នៅថ្ងៃចន្ទនេះ ព្រះចៅអធិរាជជប៉ុន អាគីហ៊ីតុ បានថ្លែងព្រះរាជសារតាមទូរទស្សន៍ដ៏កម្រមួយ និងបានធ្វើឲ្យមានការភ្ញាក់ផ្អើលផងដែរ។ បើទោះជាមិនបានលើកឡើងចំៗក៏ដោយ គេអាចយល់បានថា ព្រះចៅអធិរាជជប៉ុនមានបំណងចង់ដាក់រាជ្យសម្បត្តិ ដែលច្បាប់ជប៉ុនមិនអនុញ្ញាត។
នៅក្នុងព្រះរាជសារ១០នាទី ប្រជាជាតិជប៉ុនបានស្តាប់ឮ ព្រះចៅអធិរាជលើកឡើងតែអំពីបញ្ហាសុខភាព រាជកិច្ចមមាញឹក ក៏ដូចជាការបារម្ភពីការធ្លាក់ចុះសមត្ថភាពក្នុងការបំពេញរាជកិច្ច។
ព្រះចៅអធិរាជដែលបានគ្រងរាជសម្បត្តិរ២៨វស្សានោះ បានមានព្រះរាជឱង្កាយ៉ាងដូច្នេះថា៖«ព្រះជន្មរបស់ខ្ញុំលើស៨០វស្សាហើយ ខ្ញុំរីករាយដែលសុខភាពនៅតែមាំមួន។ ប៉ុន្តែនៅពេលដែលខ្ញុំគិតដល់ការធ្លាក់ចុះនៃភាពរឹងប៉ឹងនោះ ខ្ញុំបារម្ភជាខ្លាំងថា ខ្ញុំមិនអាចបំពេញព្រះរាជតួនាទីតំណាងប្រទេសនេះបាន»។
គួរកត់សម្គាល់ដែរថា ក្នុងរយៈពេលនៃព្រះរាជសុន្ទរកថា ព្រះចៅអធិរាជមិនបានមានព្រះរាជបន្ទូលដល់ការផ្ទេររាជសម្បត្តិនោះឡើយ ដ្បិតច្បាប់បានចែងថា អធិរាជជប៉ុន មិនអាចដាក់រាជ្យមុនពេលចូលទិវង្គតនោះទេ។
ក្រោយពីមានព្រះរាជសុន្ទរកថារបស់ព្រះចៅអធិរាជ ក៏មានការអត្ថាធិប្បាយរបស់ប្រមុខរដ្ឋាភិបាលជប៉ុនភ្លាមៗដែរ។ យោងតាមទីភ្នាក់ងារព័ត៌មានបារាំង AFP លោកនាយករដ្ឋមន្ត្រីជប៉ុន Shinzo Abe នឹងពិចារណាលើព្រះរាជសុន្ទរកថារបស់ព្រះចៅអធិរាជឲ្យបានម៉ត់ចត់ ទាក់ទងនឹងព្រះរាជសុខភាព និងអម្រែកនៃរាជកិច្ចរបស់ព្រះអង្គ។
សូមរម្លឹកថា ក្នុងខែកក្ដដាកន្លងទៅ សារព័ត៌មានជប៉ុន NHK បានរាយការណ៍ ព័ត៌មានស្តីពីបំណងដាក់រាជ្យរបស់ព្រះចៅអធិរាជម្តងរួចហើយ។ ដោយស្រង់ប្រភពព័ត៌មានពីព្រះរាជខុទ្ទកាល័យនៃព្រះចៅអធិរាជ ទូរទស្សន៍ NHK នៅពេលនោះ បានផ្សាយដែរថា ព្រះរាជបំណងរបស់អធិរាជ ត្រូវបានមហេសីព្រះអង្គ មីឈីកុ (Michiko) និងរាជ្ជទាយាទ ណារុហ៊ីតុ យល់ព្រមហើយ៕
© រក្សាសិទ្ធិដោយ thmeythmey.com